IҶЕЗІНІҢ ХАРАХ ЧАСТАРЫ
23.12.2022
Хабарлар
Махачы оол. Украинада парчатхан ӧнетін чаа операциязында аралазып, чир-суғҷыбыс Сергей Токмашев чиит чуртазын пир салған. Ол турысхан Мужество орденін пу наада Ағбан городтың администрациязында iҷе-пабазына читіргеннер
Амды Мужество орденi сӧбіреде хайраллалар. Ефрейтор Сергей Анатольевич Токмашевті, ӧнетін чаа операциязында аралазып, махачылар ӧлімінең чат халған ӱчӱн Мужество орденiнең сыйыхтирдаңар Россия президентiнің чарадиин хығыр пирген Хакасияның чааҷы комиссарының тоғызын толдырчатхан подполковник Николай Видяйкин.
Анаң Николай Николаевич ефрейтор Сергей Токмашевтің iҷе-пабазына Мужество орденін читірген. Позының адынаң подполковник Видяйкин Елена Владимировнаа паза Анатолий Викторовичке Ада чир-суубысха сын чӱректіг, ӧӧн патриот кӧңніліг, махачы хылыхтығ оол ӧскір салған ӱчӱн улуғ алғызын читірген, хазнабыс ӱчӱн чуртазын пир салғаны хоостыра хомзыныснаң ӱлесчеткенін искірген.
Аның соонда чоох тутханнар Ағбан городтың пазы Алексей Лёмин, орынҷызы Владимир Крафт. Оларның хайзы даа iҷе-пабанаң хада улуғ хомзынызынаң ӱлесчеткенін искiрген, Ада чир-суубыстың сын арачылағҷызын ӧскір салған ӱчӱн алғыстаан. Город пазы Елена Владимировнаа чахайахтар читірген.
Чылығ, арығ чӱректең сыхчатхан сӧстерні истіп, iҷе кiзi ылғабысхан. Анатолий Викторович пазын тӧбін тӱзiр салтырҷых. Прайзыбыс сым пол парғабыс, махачы чир-суғҷыбысты хумартхылап, пір минута турғабыс.
Iҷе-паба чӱректерін пазынып алғанда, телевидение паза радио хабарҷылары Елена Владимировнадаң, ағаа хайдағ даа аар, сидік полза, махачы оолғынаңар кӧмес чоохтап пирерге сурынғаннар.
– Иң пастап піс Сергейнің нанҷы-арғыстарына улуғ алғызыбыс читірерге сағынчабыс. Олар хомзыныстығ-чобағлығ туста сыбыра хада полғаннар, полысханнар, пісті тыытханнар, – ағырин чоохтанып пастаан Елена Владимировна, анаң хосхан. – Оолғыбыс позын чааҷы-арачылағҷы поларына кічігдең сығара тимнеп пастаан. Сыбыра спортнаң айғасчаң, марығларда араласчаң, сыйыхтар алҷаң. Палабыс чох халдыбыс. Пасха чааҷы арғыстары ибзер хазых айлан турзыннар.
– Сергей азах-холнаң тудысчаң спорт кӧріміне хынҷаң, секцияа хынып чӧрҷең. Iкi часха кічіг Катя туңмазын матап арачылаҷаң, – сағысха кирген пабазы.
Ағбан город администрациязындағы тоғазығның ӧӧн чардығы тоозыл парғанда, хабарҷылар пазох ла Елена Владимировнаны ибірібіскеннер. Піс Анатолий Викторовичнең, сала тастыхти одырып, чоохтазығны узаратхабыс. Пабазы Сергей оолғы хыс туңмазына хайди матап ачынҷаң полғанын чоохтапчатханда, ӱні сірлезіп пастабысхан. Чуртас ағыны тузында пiрее хати истерге килісче, оолғын чiдір салған паба кізее иң аар чобағны тобырарға килісчеткен осхас.
Махачы оолның пабазы вахта оңдайынаң тоғынтыр. Ибдең пір ле сыхса, iкi-ӱс айға парыбысчаң. Сергей аның орнына чурт ээзi полып халҷаң. Амды оолғының хумартхызы Мужество орденi полып халар тіп хомзынған паба кізі.
Автор :
Анатолий СУЛТРЕКОВ
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде