НАА ПӰДІРІГЛЕР ПАЗА ПРОЕКТТЕР
23.12.2022
Хабарлар
Спорт. Пӱӱл Хакасияда 23 спорт объектi тузаланысха кирілген, ӧӧн спорт кӧрімнерiнің cаны хозылған
ЧИДІГЛЕР
Кибір хоостыра декабрь – салтарлар тузы. 2022 чыл сидіксіністерге пай даа полза, республиканың спорт сферазына ол хомай нимес ирткен. Пӱӱл «Хакас Республикадағы физическай культурадаңар паза спорттаңар» законзар алызығлар кирілгеннер. Анзы спортсменнерге паза тренерлерге хабазар оңдай пирче. Алында пӧзік чидіглер ӱчӱн ахчалығ сыйыхха олимп спорт кӧрімнерінең не айғасчатхан улус турысчаң. Пасхазы хайығ чох халҷаң. Законның ол читпес сари чох иділді. Спортха улуғ хозым иткеннерге, чиит тренерлерге паза таланттығ олғаннарға республика бюджедінең хоза тӧлеглер кӧріл парған. Хакасияның спорт министерствозы национальнай спорт кӧрімнерін хайығда тутча. Амды законда оларның тилізіне чарыдылған алынҷа cтатья пар.
Пӱӱнгі кӱнде Хакасияда 250 муң кізі алай чуртағҷыларның 52 %-і спортнаң паза физическай культуранаң айғасча. Хазых чуртасха тартылчатханнарның санын ӧскірерге министерствоның проекттері полысчалар: «Шахмат прайзына», «Спорт пятницазы», «Республика школаларының спорт лигазы», «Хакасияны піліп ал», «Спорттағы узах чуртас», «Суғҷа чӱзері прайзына». Марығлар саны 500-ке читкен. Анда 110 муң артиинаң кізі араластыр.
2022 чылда ӧӧн спорт кӧрімнерінің саны хозыл парған. Амды, спорт кӱрезінең, ниик атлетикадаң паза дзюдодаң пасха, андар кірчелер волейбол, меспектіг хоккей, бокс паза хазии уйан улустың спорты. Илееде тус чидіглерінең теннисисттер ӧріндіргеннер. Халғанҷы чылларда стол теннизінде киректер уйан арах парчатханнаңар, аны ӧӧн спорт кӧрімнері санынаң сығарыбысханнар.
Россияның піріктірілген командаларынзар Хакасиядаң 86 кізі кірчеттір.
Пӱӱл пістің республикада 23 спорт объекті тузаланысха кирілген. Чахсы оңдай пирче «Демография» нацпроекттің «Спорт – чуртас сині» федеральнай проектi. Аны хоостыра Ағбанда ниик атлетика манежі, Тӧӧ пазында «Дельфин» бассейн тимге сых парирлар. Оларны январь-февральда пайрамни азарға киректер. Асхыс аймаанда ГТО ачығы пар, Алтай аймаандағы Очыр аалда футбол чазызы тӧзелген, кӱрес помосты алылған.
Хакасия правительствозы паза Ӧӧркі Чӧп спорт сферазынаң оортах турбинчалар. Республика бюджедінең позыдылған ахчаа Харатаста спорткомплекс алылған, Ағбанда – спортзаллар (Кравченко ор., 11 «З» адресче орныхчалар). Залларның пірcінде «Кӱрес» спорт кіні полар. Спорт ведомствозы Харатаста республика холына пӱдірігні киріп алтыр. Анда Национальнай спорт кӧрімнерінің паза таланттығ олғаннарның кіні орнығар. Республиканыңох ахчазына «Пуланнығ кӧл» тынағ лагерьiнде тиксі тыхтағ тоғыстары ирткеннер, Таштыптағы стадион, Абазадағы бассейн, Сорығдағы паза Боград аймаандағы спортзаллар нааҷылалғаннар. Алтай аймаанда, тізең, бассейнніг физкультура-хазых комплексінің пӱдірии пасталған.
2022 чылда шахматха хынчатхан улустың сағынған сағызы толды. Хакасия пазы Валентин Коноваловтың чахиинаң Ағбанда Республиканың шахмат кіні азылған. Чахығны толдырарына ікі чылҷа парыбысхан. Ікі хадыллығ пӱдірігде ӱс пӧлік, пірсі киберспортсменнерге кӧріл партыр. Интерактивнай панельлер полызиинаң шахматисттер дее, киберспортсменнер дее онлайн-турнирлерде араласчалар.
СЫЙЫХТАС
20 декабрьда Хакасияның спорт министерствозы, 2022 чылның салтарларын идіп, артыхтарның артығын таныхтаан.
Cыйыхтаттырғаннарның санында боксер Саяна Казыгашева паза кӱресчі Валерия Чепсаракова. Саяна Казыгашева Россия чемпионадында кӱмӱс медаль холға кирген паза Россияның иң кӱстіг cпортсменнерiнің Спартакиадазында ӱзінҷі орынға сыххан. Валерия – шор чонның хызы, ол Кемеров облазынаң. Хакасия ӱчӱн пӱӱл харбазып пастаан, тренер Владимир Чучуновтың холында узын таптапча. Чепсаракова пуох марығларда кӱмӱс призер полыбысхан. С.В.Казыгашеванаң В.В.Чепсаракова «Олимп спорт кӧрімнерінҷе чыл спортсменнері» атха турысханнар. Владимир Гавриловичтің ікінҷі ӱгренҷізі Наталья Малышева ідӧк сыйых алар тіп ізеніс полған. Таштып аймаанаң сыххан спортсменге чидіглер читпиндір.
Араласчыларны 16 номинацияҷа таныхтааннар. Иң чахсы спорт школалары санына Харбас кӧрімнерінің олимп резервінің спорт школазы кірген. Аннаң Россияның саблығ тренері Андрей Карамчаков устапча.
Ідӧк мероприятие тузында «Россияның спорт узы» аарластығ атха турысхан оол-хыстарға чидіглерні киречілепчеткен танығларны читіргеннер. Алты кізінiң аразында хакас боксер Евгений Чочиев полған. Чиит кізі Асхыс чоғархы аалдаң. Бокснаң, Асхыстағы ПУ-18 ӱгренчеткенде, таныстыр. Пастағы тренері – Геннадий Шадрин. Училище тоосхан соонда армияа хабылған. Анаң ХГУ-да физкультура ӱгретчізі специальность алған. Ағбанда ол тренер Вячеслав Карамашевтің устаанынаң бокснаң айғастыр. Спорт узына нормативті Евгений Чочиев пылтыр толдырыбысхан. Ол Новосибирскте тиксі Россия мариинда чиңіс тутхан, анаң Омскта ирткен турнирде алтын медаль холға кирген. Евгенийге 26 час, ол боксча тренер поларға пӧгінче. Чиит кізінің таниинаң, Хубачарзар пічіктер ызыбысхан. Нандырығны сағыпча.
САҒЫНҒАН САҒЫСТАР ТОЛЧАЛАР
Россия спортынаңар чоохтаза, 2022 чыл спортсменнердең тоғыр кирілген хатығластарнаң танығлығ. Ол сылтағнаң оол-хыстарыбыс тилекей марығларында, чоннар аразындағы турнирлерде аралас полбинчалар. Сизінгенде, анзы Хакасияның даа спортсменнерінің кӧңнін тӱзірчеттір. Итсе, хатығластар республика чуртағҷыларына саналығ чарысча олимп чемпионнары Александр Большунов, Денис Спицов, Наталья Непряева, Вероника Степанова паза пасхазы марығласчатханын кӧріп алар оңдай пирген. Тӧӧ пазы чиит Савелий Коростелёвтың спорт «чылтызын» тамысхан тиирге чарир. Россия кубогының ікі чардығында ол, иң кӱстіг спортсменнернең чарызып, ӱс алтын паза пір хола медаль утхан.
Сынап чыл матырына 15 частығ Анатолий Ворошиловты адирға чарир. Брейкингнең айғасчатхан саарбах, «Синяя птица» марығда чиңіс тудып, миллион салковай утхан. Анзы даа ӧӧні нимес. Толя пасха палаларға улуғ марығзар чол ас пирген. Теелбекчі финалда Щелкунчиктің омазын чайаан. «Щелкунчик» – саблығ балет ойыны. Аны Большой театрда 31 декабрьда, наа чыл ӱлӱкӱннерінде хайди даа кӧзітчелер. Наа чыл – хайхастар тузы. Ол чуртаста прай ниме килізер, сағынған сағыстары толар тіп ізеніс пирче. Спортсменнерібіске чоннар аразындағы турнирлерде аралазар оңдай пирзелер, чахсы поларҷых.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде