АРЫҒ КИИ – ПОЛҒАНЫНЫҢ НА КИРЕЕ
23.12.2022
Хабарлар
Чидiг. Хакасияның кiчiг частығ чуртағҷылары Семён Кудерко, Александра Маркович паза Снежана Белоногова «Арығ кии – полғанының на кирее» чоннар аразындағы марығда сыйыхтығ орыннарға турысханнар
Пу марығның тӧстегҷiзi Росприроднадзор полча. Ол 6 – 17 частығ ӱгренҷiлерге кӧрiлген. Ахчалығ сыйыхтар чир-чайаанны хайраллирына чарыдылған иң чапсых паза тузалығ проекттернiң авторларына читiрiлчелер. Пӱӱл пу чоннар аразындағы марығ iкiнҷi хати ирткен. Анда Хакасияның ӱс кiчiг частығ чуртағҷызы чиңiсчi полыбысхан.
Семён Кудеркоға 10 час. Харатаста чуртапчатхан оолағас вице-премьер Виктория Абрамченконың, марығ комиссиязының кнезiнiң, 3-ҷi степеньнiг дипломына турысхан! Аның марыға ысхан тоғызы «Пiстiң городтың арығ киизi» адалча. Кiчiг iстезiгҷi анда городтағы киинi паза чир-чайаанны хайраллирынҷа позының сағыс-кӧрiзiнең ӱлесче паза чӧптер пирче.
7 частығ Александра Маркович «Экопроект» номинацияда ӱзiнҷi орынны холға кирген! Абаза городта чурттығ хызыҷах проектiнде ӧӧн хайығны арығларны хайраллирына салча паза, позы кӧзiдiм полып, ағастар одыртар киректе ӧткiн аралас турарға чӧп пирче. Ағбан пилтiрi поселоктың 8 частығ чуртағҷызы Снежана Белоногова iдӧк арығлар хайраллирына чарыдылған тоғыс марыға тимнеен. Ол, килiстiре хоостар хоостап, улуғ нимес «Чуртаан полған Арығ» мультфильм чайап салған. Аның ӱчӱн ағаа ӧнетiн сыйых читiргеннер.
Чоннар аразындағы марығда утхан пу сыйыхтарны паза дипломнарны палаларға Хакасия пазы Валентин Коновалов правительство туразында читiрген. «Ӧсчеткен тӧл экология суриина хайығ айландырчатханы, чир-чайаанның тузазын кiчiгдең пiлчеткенi тың аарлығ. Аның ӱчӱн оларға, iҷе-пабаларына, аға-ууҷаларына, ӱгретчiлерiне улуғ алғыс», – теен Валентин Олегович.
– Пу чылда марығда Россияның прай регионнарының паза 33 пасха хазнаның ӱгренҷiлерi араласханнар. Тиксi 45 муңҷа тоғыс кiрген. Таныхтирға кирек, пу сан пылтырғызынаң пис хати кӧп! Оларның аразында Хакасияның кiчiг чуртағҷылары сыйыхтығ орыннарға турысханнары тың ӧрiнiстiг паза поғдархастығ. Мин ол ӱс паланы iдӧк алғыстапчам, – хозылған Росприроднадзорның Кимдегi регионнар аразындағы устанызының пастығы Михаил Цербунов.
Сыйыхтас тузында чиит экологтарға чылығ сӧстерiн iдӧк Хакасияның чир-чайаан паза экология министрi Владимир Лебедев читiрген.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде