ТЫНАҒА СЫХ ПАРҒАННАРҒА ТОҒАСЧАҢ ОРЫН
23.12.2022
Хабарлар
Улуғлардаңар сағыссырас. Таштыпта пу наада улуғ тӧлге тоғасчаң кiн азылған
Анда аға-ууҷаларға, чоох-чаахнаң одырып, аймах ниме-ноонаң айғазар оңдай полар – шахмат ойнирға, кинделер хығырарға, компьютернең тоғынарға.
Танығлығ пайрамда Таштып аймаа пазы Николай Чебодаев, ПФР-ның региондағы пӧлиинiң устағҷызы Людмила Иванова, Хакасия Ӧӧркi Чӧбi кнезiнiң орынҷызы Евгений Молостов, республиканың Халыхтар палатазының кнезi Ольга Левченко, Таштып аймаандағы ветераннар чӧбiнiң кiзiлерi, пенсионерлер араласханнар.
Людмила Иванова таныхтаан:
– Наа кiннiң ӧӧн пӧгiнi – тынағдағыларның маң тузын пiрее нименең толдырарға, оларны чон аразына кирерге, чуртастарын наа киректернең, наа арғыстарнаң пайыдарға. Мындох ӱлгӱнең алай ба халых ӧмелернең тоғазарға, чайаачы сағыстарны чуртасха кирерге чарир. Кiнде улуғ нимес библиотекаҷах паза стол кистінде ойыннарнаң айғазар оңдай пар. Пiр сӧснең – пiстiң пенсионерлерге мында прай ниме кӧрiл парған.
Таштып аймаа пазы, iдӧк улуғ кiзiлерге тоғасчаң кiн азылғанына ӧрiнiп, чарытхан:
– Пiстiң аймахта пис муң азыра пенсионер чуртапча, кӧбiзi чон аразына тилем кірбинче. Оларға кiзiлернең палғалыс хайди даа тударға кирек нооза. Наа киректер, ӱтертістер, тоғазығлар оларның чуртазын хынығ арах идерлер. Аннаңар пiр дее iкiнҷiлебинчем, пу кiн улуғ хайығнаң тузаланар тiп. Кiннiң тоғызына Таштып аймааның администрациязы хабазар оңдай табар, хада тоғынарбыс.
Мероприятиее пенсияа сых парған кiзiлер килгенӧктер, оларға хайығ салчатханын улуғлар пӧзiк паалааннар.
– Ахчалығ хабазығны пирiбiзерге ниик ле, че мындағ тӧремiл тоғынчатхан кiн тӧстиріне хай-хай кӧп кӱс киректелче, – ӱлесче Таштып аймааның ветераннар чӧбiнiң устағҷызы Наталья Канзычакова, – тынағдағы улусха, мындағ осхас чирде чоох-чаахнаң удур-тӧдiр алысса алай пасха нименең айғасса, чӱрек-паарына уғаа истiг поларҷых. Кӧнi чоохтаза, мин Таштыпта мындағ кiн азыл парарын пiр дее сағыбаам.
Таныхтирға кирек, пу чахсы кирек Россияның Пенсия фондының проектi полча, пiстiң республикада иң пастап андағ кiн Таштып аалда азыл парды. Ол Пенсия фондының туразында iкiнҷi хадылында орныхча (Советскай орама, 139). Тиксi хазнада пенсионерлерге 30 кiн азыбызарға пӧгiнчелер.
Таштыптағы тынағдағы улусха тоғасчаң кiнде 30 декабрьда «Зимний вечер в тихой гостиной» ӱлӱкӱн иртірілер. Кемге хынығ, оларны анда сахтапчалар.
Автор :
Тарина БУТОНАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде