Людмила Александровна 1957 чылда 30 апрельде Шира аймаандағы Азах Сӧӧт аалда тӧреен. Соонаң сӧбiрезi Асхыс аймаандағы Ӱс чул аалзар кӧскен. Анда кiчiг Людаҷахтың чайаачызы улам тилеен. Хызыҷах хакас тiлiне паза культуразына чағын полған. 1985 чылда ол Хызылчардағы хазна искусство институдын тоосхан.

1989 чылда, «Ӱлгер» ансамбльның ырҷызы полыбызып, Людмила Александровна чуртазын филармониянаң пик палғалыстыр салған. Ол ӧтiг паза сiлiг ӱнiнең, чалахайынаң кӧрiгҷiлерiн табырах аптап алған. Людмила Арыштаеваның репертуары уғаа пай полған. Ол республиканың чуртағҷыларын орыс паза пасха хазналарның опера классиказынаң, совет композиторларның cарыннарынаң, иргi орыс романстарнаң, эстрада сарыннарынаң ӧрiндiрҷең. Че Людмила Александровнаның ӧӧн хынызы хакас кӧглерi полҷаң.

Людмила Арыштаева тилекейнiң хайдағ даа пулиинда Хакасияның культуразын турыстығ сабландырҷаң – Великий Новгород, Хызылчар, Москва, Хельсинки, Женева...

Хакасияның культура министерствозының паза В.Г.Чаптыковтың адынаң Хакас Республика филармониязының ӧмелерi Людмила Александровнаның туған-чағыннарынаң улуғ чобағнаң ӱлесчелер.

Людмила Александровна Арыштаеваны 5 мартта 11.30 – 12.30 часта филармония туразынаң сығара тӱгенҷi чолына ӱдезерлер (Ағбан город, Лениннiң ор., 76).