ЧЕМПИОННАР КУБОГЫ ПІСТИ!
10.03.2023
Хабарлар
Меспектіг хоккей. «Саяны» хоккей ӧмезі Пӧзік лиганың командалары аразында тиксі Россиядағы марығларда чиңіс тутхан
ТАНЫҒЛЫҒ МАРЫҒ
Меспектіг хоккейге хынчатханнар неделя тооза маң чохха тӱстiлер. Хакасия тиксі Россиядағы марығларның финал ойыннарын удурлады нооза. Ол уғаа танығлығ кирек. Халғанҷызын Пӧзік лиганың азах мееді пістің республикада 2011 чылда ирттір. Финалда 11 команда араласхан: «Водник-2» (Архангельск), «Зоркий» (Красногорск), «Никельщик» (Верхний Уфалей), «Кузбасс-2» (Кемеров), «Байкал-Энергия-2» (Иркутск), «Енисей-2» (Хызылчар), «Саяны» (Ағбан), «Старт-2» (Нижний Новгород), «Строитель» (Сыктывкар), «Знамя-Удмуртия» (Воткинск), «СКА-Свердловск» (Екатеринбург). Олар пустығ чазыда чемпионнар кубогы ӱчӱн харбасханнар.
Марығлар 2 – 8 мартта ирткеннер. Аны пайрамни азарында улуғ пастыхтар, артисттер, хоккеисттер, спортха хынчатхан улус араласханнар. Мероприятие орыс паза хакас тіллерінең апарылған. Чоныбыстың кибірі хоостыра «Читіген» театрның чайаачылары сеек-сеек идіп аластааннар. Ідӧк сценаа «Иренек хан» рок-ӧме сыххан. Олар «От ине» сарынны таллап алтырлар. Анаң аарлығ аалҷыларға сӧс пирілген. Республика пазының орынҷызы Михаил Побызаков чиңістер тударға, сіліг ойын кӧзідерге алғаан. Ӧӧркі Чӧп кнезінің пастағы орынҷызы, Хакасияның меспектіг хоккей федерациязының президенті Юрий Шпигальских теен:
– Прайзын спорт пайрамынаң алғыстапчам. Хакасияда финал ойыннары иртерін ӱр сағаабыс. Меспектіг хоккейҷе Россияның федерациязына піске андағ оңдай пирген ӱчӱн алғызым читірчем.
Мероприятие тузында таныхталған, Хакасияда меспектіг хоккей ӧӧн спорт кӧрімі полча. Аннаң 2 муң артиинаң кізі айғасчаттыр. Меспектіг хоккейҷе cекцияларны 30 артиинаң тренер апарча. Ағбаннаң илееде саблығ хоккеист сыххан. Оларның санында Виктор Менжуренко, Андрей Галеев, Евгений Ерахтин, Евгений Баженов, Виктор Лабун паза пасхазы.
«САЯНЫНЫҢ» ОЙЫННАРЫ
Пайрамнығ чардых соонда «Саяны» команда пастағы ойынны иртірген. Марығ оңдайларынҷа араласчыларны ікі чарыбысханнар. «А» группада пис команда ойнаан, «Б» группада – алты ӧме. Пістің хоккеисттерге пастағы ӧмеде ойнир ӱлӱс тӱскен. Тоғазығлар хайди иртерлер ни? «Саяны» – кӱстіг команда. Че амғы сезон хоккей ӧмезіне аар иртче. Алында оолларыбыс IV подгруппада тӧреміл пастағы орынға сыхчаңнар, пӱӱл, тізең, тӧртінҷі орында чадап тудыл халғаннар. Кӧрігҷілер «Саяны» азах меетте аралас полбас тіп cағынғаннарох. Итсе, финаллар пасталғанда, анзы ундудылған.
2 мартта иирде «Саяны» команда «СКА-Свердловск» ӧменең тоғасхан. Хакасия хоккеисттері пастағы минутадаң ӧткін хайын сыхтылар. Утарға пӧгінчелер. 9-ҷы минутада Михаил Селедков Виталий Шнайдернің полызиинаң «ыырҷының» хаалхазынзар гол кирібісті. Трибунада – ӧрініс. Тӱрчедең «СКА-Свердловск» командаа пазох меспек учух килді. Анзы Руслан Гавричковтың чидии. «Саяны» турыстыра ойнапчатханда, матчты кӧрерге хынығ. Пастағы тайм 6:0 саннаң тоозылды. Ойынның ікінҷі чардығында «СКА-Свердловск» ӧменің «Саяныға» 12 метрдең пір меспекті кире сабызарға кӱзі читкен. Че аалҷылар хоккеисттерібіске унада саптырыбысханнар. Матч 10:1 саннаң тоозылған.
4 мартта «Саяны» Челябинск областьтағы «Никельщик» ӧменең ойнаан. Пу команда Верхний Уфалей городта 1935 чылдох тӧстелтір. «Саяны» кем стадионның ээзі полчатханын пастағы таймдох кӧзіткен. Соон сӱрістіре «Никельщикке» голлар Руслан Гавричков, Михаил Селедков паза Олег Селивёрсткин кирібіскеннер. Сан – 3:0, «Саяны» алнында. «Ыырҷы» чідірінмеен. 30-ҷы минутада пістіңнернің хаалхазынзар меспек учух килді. Ойын тиксі чазыда пар сыххан. Пу тоғазығ сайбағларнаң танығлығ. Чарғыҷылар хоккеисттерні ойыннаң сығарарға маңнанминчатханнар. Іди дее полза, харбазығ ойын тооза парған. Анзы спортта ӧӧні полча. «Саяны» команда «Никельщикті» 9:4 саннаң утхан.
Че сынап «валидоллығ» матч кӧрігҷілерні 5 мартта сағаан. Ол кӱн «Саяны» Хызылчардағы «Енисей-2» команданаң тоғасхан. Ікі ӧменің аразында ойыннар тӧреміл хазыр иртче. Кибір хоостыра санны «Саяны» асхан. Чонның кӧңнін пазох Артём Самойлов кӧдірді. Итсе, «Саянының» хаалхазы ӱр хуруғ турбаан. Сан 1:1 пол парды. Стадионға толдыра хысхырыс: «Енисей! Енисей!» Орындағы кӧрігҷілер пастап алаң ас парғаннар, анаң на ӧменең хысхыр сыхханнар: «Саяны! Саяны!» Пастағы тайм 2:1 саннаң тоозылған, ікінҷі голның «авторы» – Тимофей Ващук. Ікі ӧменің хоккеисттері прай кӱстерін салып ойнааннар. 48-ҷі минутада Гавричков хызылчардағыларға гол сабысхан. Тӱрчедең «ыырҷы» нандыр пирген. Сан – 3:2. Ікінҷі тайм тооза стадионда суум-саам турған. Кӧрігҷілернің пірcі хысхырча: «Ващук, кӧйтіктенме!» Ікінҷі команданың тренері Евгений Ерахтинге чӧптер пирче. Кем-де Захваткиннің ойынына морсынминча. Сынында прайзы «Саяны» утыр саларына чочынған, хысхырып, чӱреен амыратхан. Салтарында матч 5:3 саннаң тоозылған. Халғанҷы меспекті «ыырҷаа» Александр Захваткин кире сабысхан. Сах андох хысхырыс: «Саша, чахсы ойнапчазың!»
6 мартта оолларыбыс Архангельсктегі «Водник-2» команданаң ойнааннар. Чир-суғҷыларыбыс аалҷыларны 8:3 саннаң утханнар. «Саяны» чемпионнар кубогы ӱчӱн харбазар.
«Саяны» ӧменің ойынын пӧзік паалирҷыхпым. Хоккеисттер пастағы минутадаң гол кирібізерге кӱстенҷеңнер. Ойыннар ӧӧнінде «ыырҷыларның» саринда парған. Хаалха хадағҷызын чалғызан артыспааннар. Марығлар тузында андағ ниме пол парча. Спортсменнер пуста хада-пірге тудынғаннар. Олар китеніп алай арачыланып порастанмааннар.
СИДІК ОҢДАЙЛАР
Хакасияда ирткен финал ойыннары араласчыларның сағызында ӱрге халар, неке. Прай матчтар тасхар ирткеннер. Командалар «Саяны» паза «Химик» стадионнарда ойнааннар. Ікінҷі пустығ чазы Ағбан пилтірі поселокта орныхча. Республикада кинетін чылып килерін пірдеезі cағыбаан. Пус хайыл сыхханда, марығ программазынзар алызығлар кирілгеннер. Пастап Хакасияда ойыннар 8.00 частаң 23.00 часха теере иртерге кирек полғаннар. Чарғыҷылар чарадиинаң 6-7 мартта ойыннар 6.00 час иртен пасталғаннар, тоозылғаннар 2.00 час хараада. Кӱнӧрте хоккеисттер ойнабааннар.
7 мартта иирде искіргеннер: саннар хоостыра «А» группадаң азах меетке «Саяны» паза «Енисей-2» сыхханнар, «Б» группадаң – «Кузбасс-2», «Зоркий» командалар. Чоохтирға кирек, «Б» ӧмеде ойыннар сағыбаан оңдайнаң парыбысханнар. Турнир таблицазында ӱс кӱн изере Нижний Новгородтағы «Старт-2» пастағы орында полған. Салтарында хоккеисттер 7-ҷі орын ӱчӱн харбасханнар. Ағаа хоза, «Б» группада ӱс тоғазығ тиң саннаң тоозылтыр. «Байкал-Энергия-2» паза «Старт-2» командалар 6:6 саннаң ойнабысханнар, «Кузбасс-2» паза «Байкал-Энергия-2» – 5:5 саннаң, «Зоркий» паза «Строитель» – 8:8 саннаң.
АЗАХ МЕЕТТЕР
Сыйыхтығ орыннар ӱчӱн харбазығ 6.00 часта пасталған. Пуста «Енисей-2» паза «Зоркий» ӧмелер тоғасханнар. Азах мееттi кӧні эфирде 200-че кізі кӧртiр. Красногорсктағы ӧмені махтирға кирек. Олар, 0:2 саннаң утырчадып, 7:5 саннаң чиңіс тутханнар.
Че ӧӧн тоғазығ 9.00 часта ирткен. Пістің «Саяны» кемеровтағыларнаң хада ойнаан. Хоккеисттерібіс олох тактикаа тудынғаннар. 13-ҷі минутада санны Артём Самойлов асхан. Ол 12 метрдең меспекті кире сабысхан. Спортсменні финалның матырына санирға чарир. Тайм тоозылғанҷа ол позының адына ӱс гол пас салған. Ойынның пастағы чардығы 5:1 саннаң тоозылған. Ол тусха кӧрігҷілер «Саяны» чиңіс тударында ікінҷілебееннер. «Кузбасс-2» удурланғанох, аннаңар ойын хынығ ирткен. Пістің ооллар 8:2 саннаң утып алғаннар. «Саяны» команда пизінҷі хати Пӧзік лиганың чемпионы атха турысхан.
Азах меетке чон чахсы чыылысхан. Пос хараанаң ӧӧн матчты 1 муң артиинаң кізі кӧрген, «ютуб» канал пастыра – 6,2 муң кӧрігҷі.
Ойын тоозылғандох, сыйыхтас пасталған. Медальлар читірер алнында спортсменнерні чидіглернең Хакасияның спорт министрі Сергей Кочан, меспектіг хоккейҷе Россия федерациязының толдырығлығ комитедінің нандырығлығ хачызы Алексей Плешаков, республиканың меспектіг хоккейҷе федерациязының президенті Юрий Шпигальских паза «Саяны» спорт школазының сыныхтағда тутчаң чӧптің кнезі Сергей Ромашов алғыстааннар. Хайди таныхтаан Сергей Владимирович, турнирні иртірерге оой полбаан. Хоккеисттер сидік оңдайларда ойнааннар, аннаңар оларға сыйыхтығ орыннарға сыхханы уламох аарлығ. Алексей Плешаков, меспектіг хоккейҷе Россия федерациязының адынаң чоох тудып, иң пурнада Хакасияның правительствозына финал ойыннарын иртірген ӱчӱн алғызын читірген. Хоккеисттерге, тізең, ол чуртаста паза спортта наа чиңістер тударға алғаан. Юрий Шпигальскихтің сӧстерін трибунадағы кізілер ізіг айа сабызынаң удурлааннар. Ол чоохтаан:
– Аарлығ арғыстар, піс чиңіс туттыбыс. «Саяны» – чемпион!
Пастап хола медальларнаң «Зоркий» команда сыйыхтатхан, анаң кемеровтағылар таныхтаттырғаннар. «Саяныны» адаанда, кӧрігҷілернің ӧрінізі пу чир полбаан. Чемпионнар кубогы пісти! Ідӧк турнирнің иң чахсы спортсменнерін чеестееннер. Оларның санында «Саянының» хоккеисттері Артём Самойловнаң Алексей Барабанщиков полғаннар. 2023 чылның 8 марты Хакасия спортының тархынында хаҷанға даа халар.
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
