ОЛАРНЫҢ ПОЛЫЗИИН ЧОН КИРЕКСІПЧЕ
04.05.2023
Хабарлар
Хакасия пазы Валентин КОНОВАЛОВ сыйыхты фельдшер Марина ТОХТОБИНАА читірген
Сыйыхтас. Республиканың правительствозы туразында табырах имнег полызии службазының тоғынҷылары чеестелгеннер
Оларны Табырах имнег полызии тоғынҷызы кӱнінең алғыстап, Хакасия пазы Валентин Коновалов хазна сыйыхтарын иң чахсыларына читірген.
Хайди чоохтаан регион пазы, пу кӱн алында олаңай ӱлӱкӱнге саналҷаң, че, коронавирус пандемиязы пол сыхханда, 2020 чылдаң пістің хазна президентінің чахиинҷа официальнай ӱлӱкӱн чіли 28 апрельде таныхталча. Табырах имнег полызии тоғынҷыларына ковид тымозы тузында улуғ аар-чӱк артылған, олар пу чуғынҷахнаң ағырчатханнарға имнег полызиин матап пир турғаннар.
– Президент орта теен, сірерні кізілер ангеллерні чіли сахтапчалар. Сах ідӧк пандемия тузында сахтаҷаңнар. Чуртағҷылар полызииңарны пӱӱн дее кирексіпчелер, сірер, табырах имнег полызиин пиріп, кізі чуртазын ал халчазар. Пылтыр Хакасияда табырах имнег полызии службазындағылар 176 муң азыра хығыртығҷа кізілерге полыс пиргеннер, ол санда 35,5 муң палаа. Пу улуғ тоғысты 445 имнег тоғынҷызы толдырған. Тоғызыңар ӱчӱн сірерге улуғ алғыс читірчебіс. Кӧңніңер кӧдіре ползын, пик хазых паза чахсы чуртас, часка алғапчам, – таныхтаан Валентин Олегович.
Кӧп чыл тіспен істеніп, чон хазиин хайраллир киректе улуғ хозым иткен ӱчӱн табырах имнег полызии службазының 13 тоғынҷызына хазна сыйии пирілген. «Хакас Республиканың хазых хайраллирының аарластығ тоғынҷызы» аарластығ атха фельдшер Нина Островская турысхан. Ол Ағбандағы табырах имнег полызии станциязында істенче. Республиканың Аарластығ пічии 10 кізее (ікі тоғынҷы сыйыхтасха кил полбиндыр) читірілген. Ол санда – Таштып аймаандағы ӧӧн имнег туразының табырах имнег полызииның фельдшері Марина Тохтобина. Ӧлең чазы аалда тӧреен-ӧскен кізі, Ағбандағы имнег училищезінде фельдшерге ӱгреніп алғанда, Таштып чирінзерӧк айланған. Табырах имнег полызииның фельдшері полып, Таштып аймаандағы ӧӧн имнег туразында 1995 чылдаң істен парир.
– Піс пу оой нимес тоғыста смена оңдайынаң істенчебіс. Пір смена пір сутка иртче, че піреезі 12-лер дее час тоғынча. Анзы прай тоғыс графигінең палғалыстығ поладыр.Чуртағҷылардаң cутка аразына 12 – 27-лер дее хығыртығ поладыр, чолда саайға кір парған кізілерге дее полызарға маңзырапчабыс. Іди аймахтағы прай даа аалларҷа чӧр турчабыс. Пістің табырах полызығ пирҷең ікі бригада тоғынча. Ковид пандемиязы тузында тоғынғаны сағыста саңайға хал парған. Ағырыбысхан кізілерні, оларның пу чуғынҷах парын ілезіне сығарар ӱчӱн, компьютер томографиязына аалдаң Ағбанзар хараа-кӱнӧрте тарт чӧр турғабыс. Коронавируснаң тың ағырчатханнарны анда ковид пӧліктерінзер чатыр салып, ибзер хараазын даа айланҷаңмыс, – чоохтаан Марина Валерьевна.
Ол чоныбысха пик хазых, амыр чуртас алғапчам теен. Удур-тӧдір пілізізіп, паарсазып чуртазыннар. Пос хазиин хайраллирға, сыбыра сыныхтанарға, имҷізер тузында айланарға, ноо даа ағырығны улғааттырбасха кӱстензіннер.
Автор :
Инора БОРГОЯКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
