СЫНЫХТАҒЛАР ТОЛДЫРАЗЫНАҢ ИРТІРІЛЧЕ
17.05.2023
Хабарлар
Магнит-резонанс томография кабинедін кӧрчелер
Нацпроект. Ӱр ниместе Г.Я.Ремишевскаяның адынаң республиканың имнег туразында чӱрек-тамырлар ағырығлары кінінде магнит-резонанс томография (МРТ) кабинеді пайрамни азылған
Аны азарында араласханнар Хакасия пазы Валентин Коновалов паза имнег туразының ӧӧн имҷізі Алексей Тихонович. Наа амғы тусха килістіре МРТ аппарадын имнег туразында турғызар ӱчӱн, хоза ӧнетін пӧлік пӱдірілген. Ағаа республика бюджедінең 43 миллион салковай позыдылған.
– Республиканың имнег учреждениелерінде пӧзік технологиялығ имнег оборудованиезі турғызылчатханы Хакасия паза Хызылчар крайының ӱстӱнзархы чирлерінің чуртағҷыларына уғаа тузалығ. МРТ кабинеді республика «Хазых хайраллиры» нацпроектте араласханы хоостыра азылған. Нацпроекттер хазнада Россия президенті Владимир Путиннің чахиинҷа чуртасха кирілчелер. «Хазых хайраллиры» национальнай проект хоостыра пістің республикада имнег учреждениелері пӱдірілчелер паза нааҷылалчалар, оларзар амғы тусха килістіре имнег тиріглері алылча, пастағы имнег полызиин пирері чахсыландырылча, – таныхтаан Хакасия пазы Валентин Коновалов.
Имнег туразына хоза пӱдіріг наа ла тимге сых парған, анзын сыр чызынаң сизінерге чарир. Че магнит-резонанс томография кабинеді ӱр ниместең дее тоғынчатса, анда 14 пациент істезіг иртерге маңнанған. Пастағы сыныхтағларны Г.Я.Ремишевскаяның адынаң республиканың имнег туразында чатчатхан кізілер ирткеннер. Ӧріндірче, пу чағында андағ істезіглерні пасха даа амбулаторнай оңдайнаң имненчеткеннер ирт поларлар, оларға имҷідең андағ істезіг киректелчеткеннеңер пічік алып аларға кирек. Пӱӱл андағ істезіге прай 500 кізее квота пирері кӧріл парған. МРТ аппарат хараа-кӱнӧрте тохтағ чох тоғынча. Имнег туразында чарытхы сыбыра паза тохтағ чох пирілер ӱчӱн, аппаратха килістіре генератор турғызылған. Март айда МРТ турғызыл парған. Апрель айда имнег туразының тоғынҷылары аппаратнаң тоғынҷаң ӱгредіг иртібіскеннер, олох айда имнег туразына сыныхтағ иртірерге чаратчатхан пічікте хол салыл парған.
– Амды пістің имнег туразында пациенттерге прай даа кӧрімніг лучевой сыныхтағ иртер оңдай пар, ол чонға имнег полызиин пирерін чахсыландырча. Амғы тусха килістіре МРТ аппарады кізілернің инсульт паза наа ла сығысчатхан ағырығларны ілезіне сығарарға оңдай пирче. Наа оборудование полызиинаң пациенттің оорхазынаң пасти тамырларына теере істезіг иртірілче, аппарат тынысты паза чӱрек сабылчатханын кӧзітче. Істезіг тузында тынызын тохтадарға киректелбинче. Ағаа хоза пістің аппараттың істі аллығ, 70 сантиметр. Аның сылтаанда сыныхтағ тузында кізілернің чабых хызаат орыннаң хорғыс пол парбас. Мындағ оборудованиеде сыныхтағларны кемге дее иртерге чарир, – чарытхан Г.Я.Ремишевскаяның адынаң имнег туразының ӧӧн имҷізі Алексей Тихонович.
Г.Я.Ремишевскаяның адынаң республиканың имнег туразындағы чӱрек-тамыр ағырығлары кіні 2021 чылда «Хазых хайраллиры» национальнай проектче «Чӱрек-тамырлар ағырығларынаң кӱрезіг» федеральнай паза регион проекттерін чуртасха киріп, 17 имнег оборудованиезі алылған, оларға 66 миллион азыра салковай хорадылған.
Республикадағы чӱрек-тамырлар ағырығлары кініне хоза пӧліктің пӱдірии 2022 чылда пасталған, ағаа федеральнай бюджеттең 76,5 миллион салковай хорадылған.
– Халғанҷы чылларда, хазнаның хазых хайраллир системазында, имнег тураларында материально-техническай база чахсыландырылча. Хакасияның имнег тураларынзар аймах хазна программаларынҷа тиксі чӱзер миллион салковайға пӧзік технологиялығ оборудованиелер алылғаннар паза алылчалар. Наа тиріглернең тоғынҷаң кізілер хоза ӱгредіг иртібіскеннер, амды тоғынчалар. Пӱӱнгі кӱнде, республиканың имнег учреждениелерінде ікі ангиограф пар, олар Г.Я.Ремишевскаяның адынаң республиканың имнег туразындалар, ӱс МРТ аппарады, олар Ағбандағы аймахтар аразындағы имнег туразында, Г.Я.Ремишевскаяның адынаң имнег туразында, республиканың онкология диспансерінде паза 10 КТ аппарады, олар республика городтарындағы паза Шира аймаандағы имнег тураларында турчалар. Ідӧк пӱӱл чыл тоозылғанҷа КТ аппараттары республиканың олған имнег туразынзар, Г.Я.Ремишевскаяның адынаң имнег туразынзар паза Асхыстағы аймахтар аразындағы имнег тураларынзар алыларлар, – чоохтаан Хакасияның хазых хайраллаҷаң министрі Олег Ананьевский.
Автор :
Наталья ТЮКПЕЕВА
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
