Пресс-конференция. Хакасияның культура министерствозында чағдапчатхан «Чир Чайаан на траве» фестивальға чарыдылған хабарҷыларнаң тоғазығ полған

Чибiргi чыл мының алнында 3 июльда, Хакас Республика кӱнiнде, Хакасияның чон артизi, Ах Пӱӱр паза хынған артизiбiс Алиса Алексеевна Кызласова, Ӧӧркi чайааннардаң сурынып, От иненi азырап, пастағы «Чир Чайаан» фестивальны алғаан. Аннаң сығара ол хакас чирiндегi культура чуртазына пик кiр парған.

– Пic театр искусствозын паза хакас чонның кип-чоохтарын чир-чайааннаң пiрiктiрiбiскебiс. Андағ улуғ фестиваль ӱс чардыхтаң пӱтче. Пастағызы – театр программазы, аны хоостыра аймах спектакльлар турғызылчалар. Iкiнҷiзi – ӱгредiглiг программа. Анда аралазарға паза опытнаң ӱлезерге пiс театр ӱгретчiлерiн, критиктернi, устарны хығырчабыс. Ӱзiнҷiзi чир-чайааннаң палғалыстығ. Пiс улуғ аалҷыларға Хакасияның хайхастығ чирлерiн кӧзiтчебiс. Пӱӱл олар Шира аймаанда тынанарлар, андох мастер-класстар иртер.

Сынында пу фестивальға тимненерге оой полбаан. Россияда тасхархы театрлар асхынах полтыр. Европада олар пар. Голландиядаң пiссер iкi хати килгеннер. Франциядағылар килерге итчелер, че тилекейде полчатхан сылтағлар хоостыра чарабас. Италиядағыларға морсынчабыс. Чир ӱстӱнде ниме дее полза, олар пiссер килчелер. Театр – чоннарны пiрiктiрчеткен кӱс! – таныхтапча Хакасияның культура министрi Светлана Окольникова.

«Чир Чайаан на траве» фестиваль Хакасия правительствозының, Россияның паза Хакасияның культура министерстволары кӱстенiзiнең иртер. «Разрез Бейский» паза «Разрез Майрыхский» хара тас аныҷаң компаниялар ӧӧн спонсорлар полчалар, «Бентонит Хакасии» ООО паза «СУЭК – РЕГИОНАМ» регионнарға чуртас-экономика хабазиин пирчеткен чыынды» коммерческай нимес организация – официальнай спонсорлар.

Пӱӱл фестиваль 3 – 10 июльда полар. Ол от айының ӱзiнҷi кӱнiнде 12.00 часта Ағбандағы «Орлёнок» олған паркынаң сығара чӧрiснең пасталар. Город чуртағҷылары паза аалҷылар Россияның паза пасха хазналарның артисттерiнең хада Ленин проспектiнҷе чазағ парарлар. Ол туста театр ӧмелерi, танысхан оңдайнаң, постарынаңар чоохтирлар. «Нымах» кӧклӧ театры тастында прайзын «Ах пӱӱрнiң» тӧлi удурлир. Андох От иненi азырирлар, «Чир Чайаан на траве» фестивальны азарлар. Таныхтирға кирек, фестиваль хакас чонның культуразына паза кибiрлерiне тӧстене тимнелген.

– «Нымах» кӧклӧ театры олғаннар хакас тiлiн ӱгренер паза орындағы культураа тартылар ӱчӱн улуғ тоғыс апарча. Чыл сай палаларға хакас тiлiнең наа спектакльлар турғысчабыс, – теен «Чир Чайаан» фестиваль ӱчӱн нандырығ тутчатхан «Нымах» театрның устағҷызы Игорь Окольников.

Республиканың культура министерствозы чуртағҷыларға хаҷан даа иң чахсы спектакльларны, концерттернi кӧзiт пирерге кӱстенче, аннаңар полған на ӱлӱкӱнге хазнаның кӱстiг театрларын, саблығ ырҷыларын паза артисттерiн таллапча. Пу «Чир Чайаанда» iдӧк Белоруссияның, Таджикистанның, Италияның, Сербияның, Иранның паза Россияның (Ағбан, Томск, Донецк, Москва, Самара, Хазан, Екатеринбург, Санкт-Петербург, Новосибирск городтар) иң чахсы устары сценада ойнирлар.

Москвадағы Владимир Маяковскийнiң адынаң театр «Улуғ гастрольлар» федеральнай программа хоостыра «Чир Чайаанға» килче. Ол М.Ю.Лермонтовтың адынаң Орыс драма театрында «Обломов» ойынны кӧзiдер. Мындағ саблығ паза улуғ театр хакас чирiнзер килчеткенде, аның ойынын кӧрiп алҷаң оңдайнаң хайди даа тузалан халарға кирек.

Фестивальның ойыннарын iдӧк Алтай, Асхыс, Шира аймахтарында паза Абаза городта тикке кӧрiп аларлар.

Сомда: Хакасияның культура министрi Светлана Окольникова, «Нымах» кӧклӧ театрының устағҷызы Игорь Окольников паза Хакасияның саблығ артизi Эдгард Арутюнов пресс-конференция тузында