«Саяны» команда – Суперлигада!
19.07.2023
Хабарлар
В.Н.Штыгашев паза Ю.А.Шпигальских «Саяны» команданың хоккеисттерінең паза тренерлерінең хада
Спорт. Меспектіг хоккейге хынчатхан республика чуртағҷыларына 2023-2024 чылларның сезоны «ізіг» полар
Сағынған сағыстар хаҷан полза толча. «Саяны» команда Cуперлигада ойнир! Аны прай республика 10 чыл сағыды. Амға теере киртіністіг нимес. Олох туста мында таңнаҷаң ниме чоғыл. «Саяныда» кӱстіг хоккеисттер ойнапчалар. Олар халғанҷы пис чыл аразына Россияның саблығ тренерлері Евгений Ерахтиннің паза Евгений Баженовтың устаанынаң ікі хати чиңіс тутханнар (2019, 2023 чылларда). 2021 чылда Хакасияның ӧмезі хола призёр полыбысхан, пылтыр кӱмӱс медаль холға кирген. 2020 чылны алынҷа таныхтирға кирек, андада пандемия полып, Пӧзік лиганың командалары аразында азах меет иртірілбеен.
Пір сӧснең, пістің оолларның Суперлигада ойнирға устары чидерҷік, че ахча сурии харығ пол парҷаң. Пӱӱл Хакасияның правительствозы паза Ӧӧркі Чӧп узы-пазына сығып алдылар. Амды «Саяны» Хакасия ӱчӱн Россия чемпионадында турызар. Анда Суперлигаа кірчеткен командаларға ла аралазарға чарадылча. Чииттер ӧмезі, тізең, Пӧзік лигада кӱзін сынир. Хакасия пазы Валентин Коноваловтың чахиинаң чииттер командазынзар орындағы спортшколаларның ӱгренҷілерін аларлар.
«Саяны» Суперлигазар айланғаны Хакасияа ла нимес, меспектіг хоккейҷе Россияның спорт федерациязына танығлығ кирек. Аны федерацияның президенті Борис Скрынниктің пічии киречілепче. Пічікте Борис Иванович Хакасия пазы Валентин Коноваловха орыс хоккейнің тилізін хайығда тутчатхан ӱчӱн алғызын читірген. 14 июльда хоккеисттерге паза тренерлерге чылығ сӧcтер Ӧӧркі Чӧп кнезі Владимир Штыгашев читірген. Владимир Николаевич чоохтаан:
– Чӱрекке толдыра ӧрініс. Хакасия правительствозы паза Ӧӧркі Чӧп ахча суриин позына алча. Піс спортсменнерге спорт тириинең, наа оборудованиенең, чахсы стадионнаң полыс пирерге кирекпіс. Хоккеисттерге ізенчебіc. Олар хайди даа чиңіс тударлар. Хакасияның спорт министерствозын улуғ тоғыс ит салған ӱчӱн алғыстапчам. Прайзын спорт пайрамынаң!
Меспектіг хоккейҷе Хакасияның спорт федерациязының президенті Юрий Шпигальскихті истерге чӱрексіністіг полған. Хайди таныхтаан Юрий Александрович, пӱӱл Хакасия чуртағҷыларының танығлығ чыл. Пу чидігде «ағырчатхан» улустың хозымы парох. Команданың тренерлерін паза спортсменнерін кӧп тоғыс сағыпча. Кибір хоостыра Ю.А.Шпигальских чооғын «Саяны – чемпион!» хыйғынаң тоосхан.
Спорт министрі Сергей Кочанның искіриинең, чииттер ӧмезінең тренер Евгений Баженов тоғынар. Евгений Ерахтин, тізең, опыттығ хоккеисттерні Россия мариина тимнир. Евгений Владимировичтің чооғынаң, хоккеисттер тынанып аларға маңнантырлар. 10 июльдаң тренировкалар толдыра кӱзінең парчалар. 16 – 23 августта Иркутскта Россия кубогының І чардығы иртер. Ағаа спортсменнер Хызылчарда тимненерлер. Евгений Владимирович теен:
– Ахча сурии пӧгіл парғаны уғаа чахсы. Позым 30 часха теере «Саяны» ӱчӱн ойнаам. Командаа киртінчем. Прайзын ойыннарға хығырчам. Санапчам, пістің кӧрігҷілерге турыстығ кізі чир ӱстӱнде чоғыл. «Саяны» Ағбанда ойыннар хайди даа иртірер. Ізенчем, стадионда пос орын чох полар.
Меспектіг хоккейге хынчатханнарны «ізіг» сезон сағыпча. «Саяныдаң» пасха чииттер ӧмезі ойнир. Оларға ідӧк хабазарға кирек. Чағдапчатхан сезонда Хакасияның ӧмезінде ойнирлар Владислав Атапин (капитан, хаалха хадағҷызы), Алексей Барабанщиков (хаалха хадағҷызы), Иван Гращенков (хаалха хадағҷызы), Иван Касаткин, Евгений Корин, Денис Соловьев, Кирилл Толмачев, Виталий Шнайдер, Артем Варламов, Тимофей Ващук, Николай Верещагин, Сергей Демин, Виталий Дроздов, Александр Захваткин, Роман Козулин, Михаил Лисюк, Денис Петров, Олег Селиверсткин, Виталий Усов, Чингис Хандамаев, Руслан Гавричков, Константин Неустроев, Михаил Селедков, Никита Терехин.
Сомнар Валерия Тамбовцевани
Автор :
Майя Кильчичакова
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
