Талған – хакас чонның худы
16.08.2023
Хабарлар
«Казановка» музей-заповедниктің директоры Виктория Кулимеева,
Хакасия пазы Валентин Коновалов паза Улуғлар чӧбі кнезінің пастағы орынҷызы Андрей Асочаков
Ӱлӱкӱн. Ирткен тынағ кӱннерде Асхыс аймаандағы Казанов аалдағы музей-заповедникте «Алтын ас» ӱлӱкӱн таныхталған
Пӱӱл талған ӱлӱкӱні сигізінҷі хати иртірілген. Анда Хакасия пазы Валентин Коновалов, культура министрі Светлана Окольникова араласханнар. Пайрам алнында, чоныбыс иптіг чуртазын тіп сурынып, отха ас-тамах салылған.
Хайди таныхталған, талған хакас чонның иң саблығ ас-тамаа полча. Чон аны хаҷаннаң чіпчеткенін пір дее кізі орта чоохтап полбас. Че пістің эраның алнындағы 3000 чылларда унадылған тамахты андада чуртаан чон чіҷең полтыр. Кип-чоох хоостыра, пістің чир-суубыссар хыйал килгенде, чазылар хара пол парғанда, худайлар кізее тоғыс арға азыра ирт парыбызарға чахааннар, анда чонның арачыланызын таап аларзың тееннер. Кізі кирек чолны ирт парыбысханда, ол орындағы чон ас ӧскірчеткенін кӧр салған. Ол кӧче полтыр. Аны чіҷең полтырлар. Чағбан чӱректіг чон ол кізее кӧче ӱренін пирген. Анзы, тізең, ибінзер айланып, ӱреннерні одыртып, кӧчені ӧскіріп пастаан. Іди ол постың чонын азырап алған.
Пайрамны азып, чон алнынзар сығып, Валентин Коновалов чоох тутхан.
– Пу сіліг, ызых орында піс сигізінҷі хати чыылыс пардыбыс. Чонны піліп алар ӱчӱн, аның культуразынаң, кибірлерінең танызып аларға, кибірліг чиизін чіп аларға киректелче. Талған – хакас чонның худы. Аны аймах оңдайнаң тимнепчелер. Пӱӱн піс аның аймах тадиин амзап аларбыс. Тиктең нимес ӱлӱкӱнібіс «Алтын ас» адалча. Талған пісті азырапча, піске кӱс пирче. Пістің культурабысты, кибірлерібісті хайраллазабыс, пістің чирібіс чуртир, – таныхтаан Валентин Олегович.
Ідӧк кресен-фермер хоныхтар ассоциациязының директоры Андрей Попковха сӧс пирілген. Аның чооғынаң, тамахты аарлапчатханы алынҷа чонның на нимес, тиксі тилекейнің культуразын улуғлапчатханы полча. Суғ паза ас кізее іпек сыйлап пиргеннер. Іпек прай тилекейдегі чоннар кип-чоохтарында таныхталча. Аннаң аалҷыны удурлааны аны улуғлапчатханын таныхтапча. Хакасия иң пастағы регионнар санында полча, хайда креативнай пастағлар чыындызы тӧстел парған. Ол тоғыс Валентин Коноваловтың пастаанынаң толдырылған. Чыындының кӧстее – моданы, театрны, киноны паза ас-тамах туризмін тилідері.
– Алтын астаңар чоохтаза, хайди даа экономиканы таныхтирға кирек. Тамах хазнабыс экспортының ӧӧні полча, иң килкім парыс пирче. «Россияның 100 иң артых товары» тиксі Россия марииның региондағы чардығында Минсуғдағы ун уғаа пӧзік паалалған. Ол Хакасияның хоныхтарында ӧскірілген тамахтаң иділген. Анзы регион тилізін таныхтапча, – чоохтаан Андрей Попков.
Алғыстастар соонаң чыылысхан аалҷылар талғаннаң тоғылағастар иткеннер. Оларны Валентин Коновалов, Светлана Окольникова паза хакас чонның Улуғлар чӧбі кнезінің пастағы орынҷызы Андрей Асочаков тимнееннер. Устағҷылар чағбан хайахсар сахарлығ талған урып, пулғабысханнар. Анаң чыылысхан чон, талғаннаң тоғылағастар идіп, амзап кӧрген.
Хайди таныхтаан талған тимнепчеткен предприятиенің устағҷызы Валерия Боргоякова, талған «Россияның 100 иң артых товары» марығда ӱс хати араласхан. Прайзында даа иң артыхтар санына кірген.
Пайрам азыл парғанда, Валентин Коновалов халых пірігістері паза хазна учреждениелері тимнеен тураларҷа ааллап чӧрген. Прайзында даа аны аймах чииснең удурлааннар. Хайди таныхталған, пістің чоныбыс пайрамнарда пай стол салҷаң.
Любовь Нербышева пайрамға пос холынаң чайаан аймах-пасха сувенирлер ағылған. Пу кирекнең ол хынып айғасча. Іди ол татхыннығ чиистең паза хузухтаң букеттер чайапча. Аның тун оолғы Никита 3D принтерде ойнаҷахтар сығарча. Аннаң пасха, Любовь Сергеевна пайрамға чейлер ағылған.
– Чейлерні мин позым теерчем. Талғанны позымох, тамахты хоорып, теербенде тартчам. Букеттерні кӧңнім хоостыра чайапчам, ідӧк кізілер сурынызын толдырчам. Тоғызымны пастапчатсам, мин олардаңар сурастырғлабысчам. Оларның хылиин піліп алзам, тоғызым позы ла парча. Букеттерні конфеттердең, хузухтаң паза чей оттарынаң чайапчам. Тӧӧй букеттер хаҷан даа полбинча. Ідӧк гипстең хакас хоостарны чахчам. Пӱӱн пастағызын андағ тоғызымны кӧзідіге сығардым, – чоохтапча Любовь Сергеевна.
«Кӱг» база Хакасия пазын уғаа чылығ удурлаан.
– Чалахай кӱннең, аарлығ аалҷыларыбыс. Аймах чирдең килген аалҷыларыбысты арығ чӱреебіснең удурлапчабыс. «Алтын ас» ӱлӱкӱнге тимнелген ис-пайыбысты чіп алыңар, – аалҷыларны удурлап, чоохтааннар чурт ээлері.
«Кӱг» базаның кізілері Хакасия устағҷыларын талғаннаң тимнеен аймах-пасха чииснең удурлааннар. Че иң пастағызын ээзі кізілер аалҷыларны айраннаң сыйлааннар, полған на чиис хайди иділгенін чарытханнар.
Асхыс чоғархы аал чуртағҷызы Анисья Кыржинакова пу пайрамда чыл сай араласча. Ол талғаннаң аймах чиис тимнеп килген. Аның чооғынаң, мының алнында тамах ӱртӱнде чахсы хурудылҷаң полған, аннаң уғаа татхыннығ талған иділҷең. Амғы туста тамах читіре пыспин кизілче.
– Талған идерге тамахты пір чыл Табаттаң алғабыс. Пылтыр садығ опт базаларында чахсы тамах садылған. Че иң чахсы тамахты кӱскӱзін садызарға кирек, – таныхтапча Анисья Андреевна.
Ӱлӱкӱн марығ оңдайынаң ирткен. Хайди таныхтаан чарғыҷыларның пірсі Андрей Попков, араласчылар талғанны хайди тимнеені паалалған, чарғыҷылар чииске ниме хозылғанын амзааннар.
– Амғы туста піс сын чиистің тадиин чідір салғабыс тіп сағынчам. Оларның татхынын амзап кӧрзең, чиисті хатап оңарчазың. Мындағ фестивальлар арығ чиисті чіп аларға оңдай пирче, – таныхтаан Андрей Владимирович.
Пайрамда ідӧк талған итчеткен устарның марии полған. Араласчылар постары хоорған тамахты теербенде кӧрілген тусха тартханнар. Талғанны ілгебізіп, сыныхтаға пиргеннер. Чарғыҷылар оларға талғаннаңар хоза сурығлар пиргеннер. Іди марығның чиңісчізі табылған.
Ӱлӱкӱн тоозыл парғанда, иң татхыннығ чиис тимнеп салған араласчыларны чеестееннер. «Новатор» номинацияда 1 орынға «Хуртуйах тас» музей турысхан, 2 орынға – «Кӱг» база, 3 орынға – Любовь Нербышева. «Кибірлер хайраллағҷызы» номинацияда 1 орында – Нуржан Шамшыкадырова, 2 орында – Валентина Ахпашева, 3 орында – Мария Сагалакова. «Талған итчеткен ус» марығда 1 орынға Анисья Кыржинакова турысхан, 2 орында Жанна Иптышева пол парған, 3 орынға Мария Сагалакова сыххан.
Сомнар авторни
Автор :
Антон Чертыков
Пн | Вт | Ср | Чт | Пт | Сб | Вс |
27 | 28 | 29 | 30 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде