Хакасияда хакас кӧг тирiглерiнiң видеокаталогы тӧстелче
31.07.2023
Хабарлар
«Кӧг. Хакас инструменттерiнiң чыындызын чыып ал» культура-ӱгредiг проект хоостыра тоғыс анаң андар апарылча. Пӱӱн Анастасия Пачина Хакас филармониязында «Хан сын» ансамбльның артисттерi кӧг тирiглерiнең ойнапчатханын видеоға суурған. Прай видеолар каталогха кирiлерлер.
Хакас инструменттерi – чатхан, хомыс, ыых, хобырах, пырғы, тимiр хомыс, тӱӱр, туйғах – пурунғыдаң хайраллалғаннар. Оларнаң ойнап, орындағы чон сағыс-кӧрiзiн искiрҷең. «Хан сын» - фольклор ӧмезi. Артисттер аймах кӧглер толдырарға кӱстер. Оларның холында инструменттер «ылғапчалар», «сарнапчалар». Ансамбльның устағҷызы Евгений Улугбашев чатханнаң паза тимiр холмыснаң ойнаан, Аржан Туденев – ыыхнаң (аны виолончельнең тӧӧйлепчелер), хобырахнаң паза пырғынаң таныстырған. Ирина Боргоякова хомыснаң морсымнығ ойнапча, Татьяна Майнагашева – тӱӱрнең.
Видеокаталог Хакас филармонияның паза Л.Р. Кызласовтың адынаң чир-суғ ӱгренҷең музейiнiң сайттарына сығарылар. «Кӧг. Хакас инструменттерiнiң чыындызын чыып ал» проект Чииттер киректерiнҷе федеральнай агентствоның грант ахчазына чуртасха кирiлче.
Сом Анастасия Пачинани
Автор :
Марина Грибкова
Кӱн таңмазы
Хакасияда
Россияда
Тилекейде