Пайрам. Пу ирткен тынағ кӱннерiнде Алтай аймаандағы Хойбал аал 100 чазын таныхтаан. Пайрамнығ кӱнге удур анда наа амбулатория азыл парған

Хойбалдағыларны ӱлӱкӱннең Хакасия пазы Валентин Коновалов алғыстаан.

– Халғанӌы чылларда Хубачар аал чöбi Алтай аймааның устағ-пастаа паза Хакасияның правительствозынаң хада-пiрге тоғыс апарып, Хойбал аалда наа футбол чазызы азылған, орындағы клуб паза школаның чардығы тыхталғаннар. Iдöк аал хонии предприятиелерiне паза кресен-фермер хоныхтарына чахсы хабазығ пирiлче. Амды, тiзең, наа амбулатория асчабыс. Орындағыларға ол улуғ сыйых ползын! – таныхтаан чооғында Валентин Олегович.

ФАП-тың улии – 240 квадрат метр. Анда аймах процедура иртiрӌең, кiчiглерге паза улуғларға вакцина турғысчаң орыннар, ипчiлер хазиин сыныхтаӌаң, терапевттiң, тiс имӌiзiнiң кабинеттерi пар, iкi орынға кӱнöрткi стационар паза аптека азылғанох. Паза наа учреждениеде, аалда чарытхы ӱс парза даа, чарытхы паза суғ пол турар.

Амбулаторияда ӱс специалист iстенче. Фельдшер Елена Григорьевна Крамсаева полча, медсестра – Елена Петровна Могушкова. Паза наа тоғынӌы Ольга Сергеевна Максимкина олған садынзар паза школазар чöрчеткен олғаннарны хайығда тудар, кöзiдiмге, прививкалар турғызар.

Хойбалдағылар öрiнiстерiн чазырбинчалар:

– Пiстiң аалда хаӌаннаң ФАП пар, анда пöзiк пiлiстiг специалисттер тоғынчалар, че чуртас алнынзар парча. Пiс тее наа, амғы тусха килiстiре учреждениеде имненерге сағынчабыс паза имӌiлерге тоғынарға оой ползын. Пiстiң аал тöремiл тилiпче. «Хайхас» кiчiг районда кöп чиит сöбiре чуртапча. Пiс тiс имӌiзi килерiне, аптека азыл парғанына матап öрiнчебiс. Амға теере пiске Ағбанзар алай Хубачарзар чöрерге килiсчең нооза, – чоохтапча тынағдағы Елена Тутатчикова.

– Чиит сöбiрелерге олған имӌiзi килгенi паза стационар азылғаны поғдархастығ. Анзы пiстiң чуртазыбысты нииктебiзер. Кiчiг полғанда, iӌе-пабаларыбыс пiстi Хубачарзар имненерге ал чöрӌеңнер, амды, тiзең, пiс позыбыстың палаларыбысты андар ал чöрчебiс. Аннаңар наа ФАП азыларын пiс матап сахтаабыс, – ӱлескен чиит iӌе Софья Кувыркова.

Хайди чоохтапча Алтай аймаа пазының социальнай сурығларӌа орынӌызы Ольга Пономарева, Хойбал аалға наа амбулатория тың кирек полған. Аал Ағбаннаң ырах нимес орныхчатханда, анда кöп кiзi тура пӱдiрiнче.

– Сағам Хойбал аалда пiр муң азыра кiзi санға алыл парған. Сағынчам, наа амбулатория азылғанда, чуртағӌылар улам кöп пол парар, имӌiлерге дее тоғыс хозылар, – тiпче Ольга Игоревна.

Наа ФАП азылғанына уламох тың аның тоғынӌылары öрiнчетпестер бе.

– Иргi учреждениедең пiр дее ниме ағылбаабыс. Мында прай наа оборудование турғызылған: дезарлар, мебельлер, стоматология кабинедi. Амды пiс амбулаторияның ибiркiзiн, ағастар, чахайахтар одыртып, иптирбiс, – чоохтапча медсестра Елена Могушкова.

Наа амбулатория «Аалларның тиксi тилiзi» программаӌа пӱдiрiлген. Ол 15 миллион салковайға тур парған, оборудованиезi, тiзең, 10 миллион салковайға.

Сом Хакасия пазының телеграм каналынаң