Чонға табырах имнег полызиин пирері тыыдылча
18.10.2023
Хабарлар
Хакасия пазы Валентин Коновалов, Ӧӧркі Чӧп кнезі Сергей Сокол наа транспорт клӱстерін алған ӧмелернең
Наа транспорт. Пу наада Хакасия пазы Валентин Коновалов имнег учреждениелерінің устағҷыларына табырах имнег полызиин пирҷең наа автомобильлер клӱстерін пайрамни читірген
Республиканың правительство туразы алнындағы Пастағы май ачығында «Соболь» паза «Б» класстығ Nехt табырах имнег полызиин пирҷең 11 автомобиль турған, оларға тиксі 52,2 миллион салковай хорадылған. Пу транспорт Россия президенті Владимир Путиннің чахиинаң федеральнай программа хоостыра алылған.
Наа транспорт республиказар чарыс айының пастағы кӱннерінде килген. Амды прай автомобильлер республиканың аймах-городтарынҷа тарадыл парғаннар. Оларны Асхыс, Пии, Алтай, Боград, Орджоникидзе, Таштып, Ағбан пилтірі паза Шира аймахтарының имнег учреждениелері алғаннар. Ідӧк наа транспорт клӱстері Сорығ городтағы паза Нымырттығ поселоктағы имнег тураларының устағҷыларына читірілгеннер. Олар прайзы табырах имнег полызиин пирҷең станцияларға тузаланысха пирілгеннер.
Пӱӱл республиканың аймах-городтарынҷа тиксі табырах имнег полызиин пирҷең 20 автомобиль тарадылған, ирткен чылда – 12. Пістің республикаа 2018 – 2023 чылларда прай 108 транспорт пирілген.
Чарыс айының 13-ҷі кӱнінде Ағбанда Пастағы май ачығында город-аймахтар имнег тураларының ӧӧн имҷілеріне наа машиналар клӱстерін пайрамни читірерінде Хакасия пазы Валентин Коновалов, Ӧӧркі Чӧп кнезі Сергей Сокол паза республика пазының социальнай сурығларҷа орынҷызы Михаил Побызаков араласханнар.
– Республиканың полған на чуртағҷызына имнег полызии чахсы читірілер ӱчӱн, Хакасия правительствозы прай кӱзін салып тоғыс апарча. Республикада хазых хайраллирында пастағы имнег полызиин тилідерінҷе регион программазын чуртасха кирерінде федеральнай бюджет ахчазының хабазии улуғ туза ағылча. Ідӧк табырах имнег полызиин пирҷең пӧліктерде паза станцияларда материально-техническай база нааҷылалча. Таныхтирға кирек, республиканың хазых хайраллирын тилідеріне хорадығлар 2017 – 2022 чылларда ӱс азыра хати ӧс парған.
Хазна программалары полызиинаң пістің чуртағҷыларға имнег полызиин пирері чахсыландырылча. Амды чон имнег полызиин тузында ал полар, – чоохтаан Валентин Олегович.
Ідӧк Хакасияның Ӧӧркі Чӧп кнезі Сергей Сокол мероприятие араласчыларын наа машиналар клӱстері читірілгенінең алғыстаан. Имнег полызиин пирҷең наа транспорт пирілчеткені прай республикаа туза ағылча: имҷілерге дее, чонға даа.
Асхыс аймаандағы табырах имнег полызиин пирҷең станцияа ікі автомобиль пирілген – «Соболь» паза «Б» класстығ Nехt автомобиль. Наа транспорт клӱстерін Асхыстағы аймахтар аразындағы имнег туразының ӧӧн имҷізі Людмила Кичеева алған.
– Пӱӱн пістің табырах имнег полызиин пирҷең станцияа ікі транспорт пирілген. Халғанҷы ікі чыл аразына піс алтынҷы машинаа чидіндібіс. Автомобильлернің ікізін піс Асхыстағы аймахтар аразындағы имнег туразынзар пирербіс. Наа транспорттығ чӧрерге истіг, олар ыраххы чолларға кӧрілгеннер. Пістің имнег учреждениезі кізілерні Ағбанзар удаа тарт чӧрче. Піреезін имнег туразынзар чатырарға апарарға килісче, пірееде сыныхтағларға тарт чӧрчебіс. Ағаа хоза, инфаркт паза инсульт соонаң пациенттерні МРТ паза СКГ сыныхтағларына Ағбанзар тартарға килісче. Аннаңар ол автотранспорт Асхыстағы имнег учреждениезіне тың кирек. Пӱӱнгі кӱнде пістің прай табырах имнег полызиин пирҷең машиналарда пис бригада тоғынча. Наа транспортнаң улуғ опыттығ водительлер чӧрерлер. Табырах имнег полызиин пирҷең станцияда водитель полып 12 чыл істен салған Дмитрий Боргояков паза 17 чыл тоғынчатхан Александр Нагрузов. Пӱӱн олар хада килгеннер, наа транспортты Асхыссар «сӱр парарлар», – чарытхан Людмила Кичеева.
– Табырах имнег полызиин пирҷең наа автомобильлер читірілчеткені хаҷан даа ӧріністіг паза кізі кӧңнін кӧдірчеткен кирек. Автомобиль наа полза, ол чылығ паза аннаң чӧрерге дее истіг. Ырах чолға сыхса, анзын чахсы сизінчезің. Майыхханы даа пілдірбинче. Мин 2000 чылда сығарылған автомобильліг чӧргем. Аннаңар наа транспортха ӧрінчем, – кӧңнінең ӱлескен водитель Дмитрий Боргояков.
Имнег учреждениелеріне наа транспорт «Пастағы имнег-санитар полызиин нааҷылиры» федеральнай программаҷа алылча. Амды оортах таа ааллардағы чуртағҷыларға имнег полызии тузында паза чахсы пирілер. Пӱӱнгі автопарк анзына полызар тіп сағынчам. Ағаа хоза, табырах имнег пирҷең автомобильлерде кізі чуртазын ал халарына паза имнег полызиин пиреріне киректелчеткен тиріглер кӧріл парған. Анзы, амғы автомобильлер имнег учреждениелеріне пирілчетсе, хада алыл парған полча. Республиканың имнег учреждениелеріндегі автотранспорттың паза оборудованиенің нааҷылазы мыннаң мындар тохтабин узарадылар тіп сағынчам.
Сом Альбина Чистогашевани
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
