Чапчаңнар устарын кӧзіткеннер
20.10.2023
Хабарлар
Спортсменнер сидік маршруттар иртчелер
Марығ. Ағбанда хайаҷа cығарынҷа Хакасияның чемпионады паза первенствозы ирткен
Хайаҷа сығары – олимп спорт кӧрімі. Хакасияда аннаң ӧӧнінде Ағбанда айғасчалар. Пасха муниципалитеттерде скалодром чоғыл нооза. Итсе, республиканың ӧӧн городында даа 13 метрліг скалодром пӱӱл ле тузаланысха кирілді. Чиит спортсменнерге марығлар Ағбанның 19-ҷы паза 5-ҷі школаларында иртірілҷең. Анда олғаннар пӧзии 6 метрліг скалодромҷа сых чӧрҷеңнер. Пу спорт кӧрімінің тилізі ӱчӱн Туризмҷе cпорт школазы нандырча. Аның хайаҷа сығарынҷа пӧлиинде 100 артиинаң кізі cаналчаттыр.
13-14 октябрьда олар Хакасияның мариина чыылысханнар. 2008-2009 чылларда тӧреен улус первенствода кӱзін сынаан, улуғлар – чемпионатта. Хайаҷа сығарынҷа марығлар ӱс кӧрімніг полчалар. Пастағы кӧрімде кем трассаны прайзынаң табырах иртібізер, ол чиңіс тутча. Ікінҷі кӧрімде спортсменнер сидік маршруттарға cығып марығласчалар. Ӱзінҷізі «боулдеринг» адалча. Боулдерингте спортсменнер пӧзік нимес хайаларға пағлар чох, азах-холлар полызиинаң на сыхчалар. Манежте пу дисциплинаа алынҷа cкалодром кӧрілген.
Амғы турнир ікі оңдайлығ марығ чіли ирткен. Оол-хыстар пастап сидік маршруттарға сыхханнар, анаң боулдерингте устарын кӧзіткеннер. Хайаҷа cығарында табырах сағыстығ, чапчаң поларға киректелче. Кізінің, иді-сӧӧгі ле нимес, миизі матап тоғынча. Пӱӱлгі чемпионатта артыхтарның артығына Никита Воробьевнаң Маргарита Козлова сыхханнар. Кӱмӱс медальларны холға киргеннер Георгий Недилько паза Дарья Курагина, хола медальларны – Никита Пашков паза Роксана Костюнина. Первенствоның салтарларынаңар чоохтаза, Иван Марковнаң Варвара Грошева чиңіс тутханнар, Дмитрий Конгаров паза Мария Харина кӱмӱс призёрлар полыбысханнар, ӱзінҷі орында – Дмитрий Максимов. Тиксі алза, марығда 50-ҷе кізі араластыр.
Пӱӱнгі кӱнде Хакасияда хайаҷа сығарынҷа Евгений Козлов ла Россияның спорт узы нормативін толдырыбысхан. Амды пӧзік устығ спортсменнернің саны хозылар тіп ікінҷілес чоғыл. Итсе, ағбандағылар Хакасиядаң Олимп ойыннарының араласчылары хайди даа сығар тіп ізенчелер. Че анзын чуртас кӧзідер.
Сом Людмила Крайторни
Автор :
Майя Кильчичакова
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
