Хоза тус пирчебіс!
20.12.2023
Хабарлар
Марығ. «Хакас чирі» республика газетазы хығырығҷылар аразында «Минің ӱгретчім паза минің ӱгредіг кӧстегҷім» марығ чарлапча
Улуғ хырлас айының 18-ҷі кӱнінде «Минің ӱгретчім паза минің ӱгредіг кӧстегҷім» марығның ікі номинациязынҷа – «Ӱгренҷінің иң артых тоғызы» паза «Студенттің иң артых тоғызы» – тоғыстарны алар тус тоозыларға кирек полған, че піс аны улуғ хырлас айының 25-ҷі кӱніне теере узаратчабыс. Ӱгренҷілер паза студенттер, тоғыстарны марыға ызарға маңнанмаан ползаңар, ызыңар!
«Минің ӱгретчім паза минің ӱгредіг кӧстегҷім» марығ пу пӧгіннерні толдырар кӧстегнең иртірілче: ӱгретчі тоғызын паза ӱгредіг кӧстегҷізінің тузазын сабландырарға, ӱгредіг тоғынҷыларының, ол санда ӱгредіг кӧстеенең айғасчатханнарның адын кӧдірерге, школаа, ӱгретчілерге паза школа кибірлеріне улуғласты тыыдарға, ӱгренҷілер паза ӱгретчілер аразында хайызығларны пиктирге, хығырығҷыларға чайаачы кӧңнілерін читірер оңдай пирерге, чайаачы паза талааннығ хығырығҷыларны ілезіне сығарарға, ідӧк хығырығҷыларны хакас тілінең чайаачы тоғыстар пазарға кӧӧктірерге.
Марығда ӱс номинация кӧріл парған: «Ӱгренҷінің иң артых тоғызы» (школа ӱгренҷілері аразында), «Студенттің иң артых тоғызы» (ортын паза пӧзік ӱгредіг учреждениелерінің ӱгренҷілері паза студенттері аразында) паза «Улуғларның иң артых тоғызы» (18 частаң улуғ хығырығҷылар аразында).
Пастағы ікі номинация араласчылары, ӱгренҷілер паза студенттер, чайаачы тоғыстарын 2023 чылның улуғ хырлас айының 25-ҷі кӱніне теере ызарға киректер, ӱзінҷі номинацияның араласчылары – 2024 чылның кӧрік айының 31-ҷі кӱніне теере. Почта штампы турғызылған кӱн санға алылар. Кӧрілген тустаң орай кірген тоғыстар марыға алылбас. Чайаачы тоғыстар марығның темазына килістіре, хоос оңдайларға пай, араласчының чазының синінҷе пазыларға кирек, тоғыстарның тиксі пазылған оңдайына паалағ турғызыларох. Чарғыҷылар тоғыстарны пу кӧзідіглерҷе 0 – 5 паалағнаң паалирлар. Іди полған на номинацияда чиңісчі паза сыйыхтығ орыннарға турысханнар табылар, иң артых тоғыстар «Хакас чирі» газетада сығарылар.
Чиңісчілерге паза сыйыхтығ орынға турысханнарға дипломнар паза сыйыхтар тимнелген.
Чайаачы тоғыстарға кирексіністер:
1. Чайаачы тоғыс «Минің ӱгретчім паза минің ӱгредіг кӧстегҷім» темаа чарыдылзын.
2. Тоғыс хакас тілінең пазылзын.
3. Чайаачы тоғыс Mіcrosoft Word кӧрімде Khakas клавиатуразында 12 кегльде пазылзын паза чоллар аразы 1,5 ползын. Текстті Tіmеs Nеw Roman Hak шрифтнең пазарға чарир. Ідӧк холдаң пасхан тоғыстар алылча.
4. Чайаачы тоғысха хоза сомнар паза хоостар пирерге чарир.
5. Авторлар, марығ оңдайларынаң танызып паза аннаң чаразып, марығда пос алынҷа паза пос кӧңнінең араласчалар.
6. Чайаачы тоғысха хоза автор позының ады-солазын толдыразынаң, ӱгредіг алай тоғыс орнын, палғалызар оңдайны (мобильнай телефон номерін) искірче.
Тоғыстарны «Марыға» танығлығ ызарға: «Хакас чирі» газета редакциязының электроннай почта адрезіне: stranahaіar@maіl.rғ паза Россия Почтазынҷа «Хакас чирі» газета редакциязының адрезіне: 655017, РХ, Ағбан г., Щетинкин ор., 34; ідӧк редакция адрезінҷе 15-ҷі кабинетсер ағыларға чарир.
Аарлығ хығырығҷылар, чайаачы тоғыстарыңны сағыпчабыс!
Автор :
«Хакас чирі» газета редакциязы
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде