Араласчылар санын хозарға
10.11.2023
Хабарлар
Проект. Хакасияның правительствозы алынҷа тураларны чарытхынаң чылыдарына кирер ӱчӱн сыныхтағлығ проектті алғытча
Амғы чылығ пирҷең туста чарытхы ӱчӱн льготанаң, Ағбан городтың «Полярный» микрорайонының чуртағҷыларынаң пасха, ікі паза ӱс ставкалығ тариф хоостыра чарытхы ӱчӱн тӧлепчеткен Ағбанның паза Алтай аймааның пасха даа чуртағҷылары тузаланарлар.
Хакасия правительствозының 2023 чылда чарыс айының 23-ҷі кӱнінде сыххан чарадии хоостыра чарытхы полызиинаң пос тураларын чылытчатханнарға пір киловатт чарытхы ӱчӱн тӧлег, 50 ахчаа асхынах полып, 35 ахчаа тиңнелер.
– Алынҷа тураларны чарытхы полызиинаң чылыдарына кирчеткенінің ӧӧн пӧгіні – киизер тасталчатхан пуртах ниме-ноо синін хызырары. Ағбан паза Харатас городтарда кии кірленчеткенінің ӧӧн сылтаа алынҷа туралар ээлері чурттарын песті хара таснаң одынып чылытчатханы полча нооза. Пӱӱнгі кӱнге Ағбанда паза Алтай аймаанда чуртты чарытхы полызиинаң чылыдарына 800-че тура кирілген. Сыныхтағлығ проектті алғыдарынҷа сурыныстығ айланыстар кіргеннер, піс чарас салғабыс. Хараағы тарифче пір киловатт чарытхы ӱчӱн тӧлег 35 ахчаа теере тӱс парғанын санға алып, сетьтерге нагрузка синері, олох туста экология сурии чахсыланары сахталча, – теен Хакасияның чир-чайаан ис-пайы паза экология министрінің тоғызын толдырчатхан Владимир Лебедев.
Хакасия правительствозы килер чылда Харатас городты сыныхтағлығ проектке киреріне республика бюджедінде ахча кӧр салған.
Проектте аралазар ӱчӱн хай пірее оңдайларға тудынарға кирек: тура пічікке кирілген поларға; тура сыныхтағлығ проектте араласчатхан орында орнығарға; тура чарытхы сетьтеріне піріктірілген поларға; тура тузаланысха киріл парған поларға; тураның улии 250 квадрат метрдең аспасха (чурт улуғ полза, тӱзірілген тариф тураның 250 м2 тузаланылар); тураны чарытхы полызиинаң чылыдар оңдайлар поларға кирек.
Сыныхтағлығ проектте аралазарына мындағ пічіктер киректелче: тураа ЕГРН-наң пічік; чарытхы сетьтеріне технологическай палғалыстаңар акт паза чӧптезіг; тура ээзінің паспорты.
Сурығларнаң айланарға пу телефон номерінҷе: 8(3902)24-81-62.
Сом Интернеттең алылған
Автор :
Юлия Бредихина
| Пн | Вт | Ср | Чт | Пт | Сб | Вс |
| 25 | 26 | 27 | 28 | 29 | 30 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
