Чааҷыны хумартхылап
24.11.2023
Хабарлар
Чааҷы Роман Шулбаев
Марығ. Н.Ф.Катановтың адынаң Хакас гимназияда ӧнетін чаа операциязының араласчызы Роман Шулбаевтің хумартхызына чарыдылған волейболҷа турнир ирткен. Ол пу ӱгредіг организациязын 2012 чылда тоосхан
Роман Шулбаев 1994 чылда тӧреен. Ӱс паладаң ол иң кічии. Ағаа ӱс час полғанда, сӧбіре Сартых аалдаң Ағбанзар кӧскен. Оолах городтың 18-ҷі школазында ӱгренген. Ортын класстарда аны Хакас гимназиязар пирібіскеннер. Пу школада ідӧк аның улуғ пиҷезі Елена ӱгренген. Анда Романның класс устағҷызы ИЗО паза технология ӱгретчізі Ольга Васильевна Тугарина полған. Ӱгретчі cағысха кирче:
– Роман ӱгренген класс уғаа ынағ полған. Итсе-де, гимназияның ӱгренҷілері прайзы іди иптіг-амыр чуртапча. Андағ полбаан полза, олар школа соонаң хада-пірге тудынмасчыхтар, палғалысты хайраллабасчыхтар. Романнаң піс ирткен чылда халғанҷызын тоғасхабыс. Мин аннаң нименең айғасчатханынаңар сурғам. Класс устағҷызына чапсых нооза піліп аларға, хайди чуртапчалар аның ӱгренҷілері. Ол ӧнетін чаа операциязында аралазарға кирек поларын пілген. Аның харахтары мағаа мӧңіс пілдір парғаннар. Позыма даа кӧмес изі чох полған. Соонаң иссем, ол, палығларына сыдабин, ӱреп партыр... Тың ачырғастығ.
Школазар ол читінҷі классха килген. Англия тілі аның хынған предмеді полған. Пу предметче кӧп ӱгренҷінің cидіксіністер полчатхан, че Романның хаҷан даа полбаан. Гимназиязар килгендӧк, ол ідӧк волейбол секциязына чӧр сыххан. Анаң школа тоосханҷа меспек саап турған. Гимназияның піріктірілген ӧмезіне кірҷең.
Гимназияны тоозыбысханда, чиит оол Хызылчардағы аал хонии университедінзер кірген. Бакалавриатты паза магистратураны хызыл дипломға тоозып, логист профессиязын алған. Соонаң чиит оол армияа хабылған. Воронежте служба иртіп, ибзер айланған. Ирткен чылда Хакасияның хай пірее чуртағҷыларынаң хада мобилизацияа тартылған. Рядовой-пулеметчик полған. Аның позывнойы «Рома-шаман» полтыр.
Чааҷыны хумартхылап, Хакас гимназияда 2006 – 2009 чылларда тӧреен оолахтарның аразында волейболҷа турнир ирткен. Тиксі 8 ӧме – гимназиядағы, Сорығдағы, Ағбандағы, Таштыптағы, Аршаннардағы, Бородинодағы, Аcхыстағы, Томыҷахтардағы школалар ӱгренҷілерінің командалары. Спортсменнерзер Хакасия пазы орынҷызының тоғызын толдырчатхан Юрий Курлаев айланған:
– Романны, сомын кӧріп, мин танып салдым. Кӱскӱзін мобилизация пасталыбысханда, ол 26 сентябрьда пасха оолларнаң хада пастағы эшелоннаң Омсксар читкен. Ноға мин аны сағын салғам? Мин анда оларнаң пір айҷа чуртаам. Ол амыр хылыхтығ, че олох туста сыдамах паза кӱстіг полғанын сизінгем. Аны чахсы оңнапчам. Романның паза даа пасха чааҷыларның чуртазы іди киліс парғаны тың хомзыныстығ. Олар амыр чуртазыбыс ӱчӱн тыннарын пир салғаннар.
Турнирнің тӧстегҷілерінзер паза аның араласчыларынзар Роман Шулбаевтің улуғ пиҷезі Елена Игоревна Асочакова айланған:
– Турнир иртіріп, туңмаҷаамны хумартхылапчатхан ӱчӱн прайзына улуғ алғызым читірчем. Анзы пістің сӧбірее уғаа аарластығ... Туңмам кемге-де Рома полған полар, кем-де аны Ромка адаҷаң, кічіг туңмам алай ба палаҷаам. Кем хайди даа аны адаза, ол прайзының сағызында амыр хылыхтығ, олох туста пик сындырлығ кізі полып халзын. Ол сыннаң андағ полған нооза...
Роман Шулбаев чааҷы поларынаңар сағынмаан. Чиит оол специальнозы хоостыра тоғынарға, сӧбіре тӧстирге пӧгінген. Че Худайның кізее позының пӧгіні. Пӱӱл Роман ӧнетін чаа операциязында аар палығлат салып ӱреен. Ол Россия кӱні полған – 12 июнь 2023 чыл... Чаалазығда махачы тудынған ӱчӱн хакас оол Мужество орденіне турысхан.
Марығ араласчылары
Хайди искірген Хакасияның ӱгредіг паза наука министрінің орынҷызы Юрий Сагалаков, Роман Шулбаевтің хумартхызына чарыдылған турнир чыл сай иртірілчеткен марығ полар.
Сомнар национальнай гимназияни
Автор :
Оксана Сунчугашева
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
