Волонтёрларны алғыстааннар
08.12.2023
Хабарлар
Хакасияның ӱгредiг паза наука министрiнiң орынҷызы Юлия Ворошилова сыйыхты Сергей Токояковха читiрген туста
Сыйыхтас. Пос кӧңнінең полысчатхан кізі кӱні таныхталчатханда, пу ӱлӱкӱнге чарыдып, республикадағы волонтёрларны пайрамни сыйыхтааннар
Хакасиядағы волонтёрларның пос кӧңнінең итчеткен чахсы киректерін паалап, оларны чеестир ӱчӱн, пайрамнығ мероприятиені Л.Р.Кызласовтың адынаң Хакас национальнай чир-суғ ӱгренҷең музейде иртіргеннер. Анда креатив индустриялары школазы орныхчатхан пӧлікте чыылысханнар.
Волонтёрлар полызығны кирексiпчеткен улусха, ол санда улуғ тӧлге, кинектерге, олғаннарға, пос кӧңнінең тӧреміл полысчалар. Аймах-пасха оңдайнаң хабасчалар, кӧзідімге, волонтёрлар чӧрімінде аралазып, кем-де олған тураларынзар чӧрче, гуманитарнай полызығ чыырға хабасча алай постары чӧр полбинчатхан кізілерге иблерінзер ас-тамах, имнер дее ағыл пирче, алай ба тасхархы чирлерні иптепче, пасха даа чахсы киректер итче. Хакасияда халғанҷы туста волонтёрлар чӧрімiнде кӧптең кӧп кізі араласча, iдӧк чииттер уғаа ӧткін хайынчалар.
Иң чахсы волонтёрларны сыйыхтар читіріп чеестееннер. Нинҷе-де кiзi республика правительствозының паза Ӧӧркi Чӧбінің алғыстас пічіктерінең таныхтатхан. 100 азыра волонтёрға Хакасияның ӱгредіг паза наука министерствозының алғыстас пічии читірілген. Паза иң чахсылары тиксі Россиядағы «Чиңiс волонтёрлары» халых организациязының Хакасиядағы пӧлиинің сыйыхтарына турысханнар. Iдӧк пу мероприятиеде «Хрустальное сердце Хакасии» марығның чиңicчілеріне дипломнар читірілген. Марығны тиксі Россиядағы «Союз добровольцев Хакасии» халых организациязының региондағы пӧлии иртірген.
Пасхазына пос кӧңнінең полысчатхан улусты, улуғ аалҷы полып, Хакасия пазы Валентин Коновалов ӱлӱкӱннең алғыстаан. Ол таныхтаан:
– Пiстің хазнада паза Хакас чирiнде удур-тӧдір полыс турҷаң кӱстіг кибір хаҷаннаң полған. Чуртағҷыларыбыстың кӧбiзіне, чағыннарына хабазып, мындағ чӧрімде хайди даа аралазарға киліскен, неке. Республикада пос кӧңнінең полысчатхан аймах-пасха халых организациялары саны илееде. Кӧзідімге, «Движение первых» «Юнармия» тӧстелгеннер. Волонтёр полар ӱчӱн, кізее сынап илбек, аллығ чӱректіг поларға кирек. Сірерге пасхазына пiр дее санаспин полысчатхан ӱчӱн, прай чӱрееңернең хабазарға кӱстеніп, чахсы киректер итчеткен ӱчӱн улуғ алғыс. Чидіглерге чидерге алғапчам, пасхазына полызарға кӱзіңер читкіҷе ползын.
Iдӧк улуғ аалҷылар санында полған республиканың Ӧӧркi Чӧбінің культураҷа, ӱгредігҷе паза наукаҷа комитедінің кнезi Оксана Разварина. Пайрамнығ мероприятиее чыылысхан чонны алғыстап, ол теен, волонтёрлар ноо даа кирекнең айғас турза, олар паалаҷаа чох тоғыс итчелер, полызығны кирексіпчеткеннерге тикке хабазып.
Правительствоның паза Ӧӧркі Чӧптің сыйыхтарына турысханнарның санында 20-ҷе кізi полған. Правительствоның алғыстас пiчиин алған кізілернің санындалар: Анастасия Чанкина, Ольга Элтеко, Наталья Петухова, Аким Тагоев паза пасхазы даа. Ӧӧркі Чӧп сыйии София Шумихинаа, Евгения Дорофееваа, Лилия Ещенкоға паза пасхазына даа пирілген.
Ирткен чылдаң сығара волонтёрлар ӧнетін чаа операциязында (СВО) араласчатхан чааҷыларға ӧткін хабасчалар. Асхыста андағ киректернең айғасчатханнарның пірсі Сергей Токояков полча. Ол Асхыстағы чир-суғ ӱгренҷең музейде чыындылар хайраллағҷызы полып тоғынча. Маң туста волонтёрлар киреенең айғазарға маңнанча. Сергей Аркадьевич Ада чир-суу чааҷылары сӧбірелерінің комитедінің аймахтағы пӧлиинең устапча. Аннаң iкӧлең устапчаттырлар, ікінҷі кізізі Лариса Чучунова полчаттыр. Ағбанда иртірілген мероприятиеде iкiзi таныхталған. Оларға ӱгредіг паза наука министерствозының сыйии читiрілген. Че Лариса Викторовна анда аралас полбаан.
С.А.Токояковтың чооғынаң, аймахтағы чуртағҷылар СВО-дағыларға чӱленҷең сеткалар тікчелер, блиндаж свечілерiн урып полысчалар. Кем-де чулухтар палғап алай чылығ кип-азах, ас-тамах ағыл пирче. Піреезі ахчанаң хабасча, ағаа чааҷыларға киректелчеткен ниме-ноо ал пирчелер. Кемнің кӱзі ниме идерге читче, ол син полысча. Чӱленҷең сеткаларны чайғызын Калининдегі культура туразында тимнептірлер, ам Асхыстағы 18 № профессиональнай училищеде тікчелер. Кізілер гуманитарнай полызығны ӧӧнінде Асхыс аал чӧбiнзер ағылчалар. Ӱр ниместе Асхыстаң андағ полызығны толдыра таарлалған iкi «Газель» машина ал чӧрібістір.
– Пастап піс мындағ волонтер тоғызын хайди пастирын пілбеебiс. Анаң піске таштыптағылар ол киректi Асхыста пастирға полыс пиргеннер. Мыннаң мындар iдӧк пу кӧстегҷе тоғынарбыс, аны хайди даа идерге кирек тіп санапчам, – сағызынаң ӱлескен Сергей Аркадьевич.
Алында ағаа пасха даа кӧcтеглерҷе волонтер поларға килісчең. Асхыста хара тас аныҷаң разрез азарға тідінчеткеннерінде, орындағы чуртағҷылар андағ киректең саңай тоғыр полғаннар. Асхыстағы чонның алнын алчатхан ӧткін кізілернің ӧмезінде iдӧк Сергей Токояков пос кӧңнінең араласхан. Чуртағҷылар матап тоғырланғанда, аалда разрез азылбаан.
Имҷі-волонтерлар аразында сыйыхтатханнарның пірсі – Ирина Майорова. Ол, имҷі-трансфузиолог полып, республиканың хан кінінде iстенче. Ӧӧн тоғызынаң пасха, имҷі маң туста донор киреенеңер чарыдығлығ тоғыснаң айғасча. Чуртағҷыларға ноғадаңар ханны паза оорха-сӧӧк миизін, донор полып, пирерге кирек полчатханынаңар чарыдарға кӱстенче. Пу кӧстегҷе алынҷа ӧме тӧстеп алып устапча. Пылтыр Ирина Анатольевна тиксi Россиядағы «Донорның культура коды» чӧрімнің регион синіндегі чардығын иртірерге полысхан, пӱӱл – донор чӧріміне хабазарынҷа «Давай вступай» тиксi хазна синіндегі марафонны, iдӧк андағох улуғ «Донор коды. Кӧстегҷі» мероприятиенi.
Имҷі-волонтёр Ирина Майорова
Пасхазына пос кӧңнінең полызарға студент тузындох пастаам тіпче. Ол, имҷее ӱгреніп, Н.Ф.Катановтың адынаң Хакас хазна университедін тоосхан. Андадох донорство кӧстегҷе айғасхан, анаң позы даа ханын пир сыххан. Кізі андағ халых тоғызына пос кӧңнiнең тартылза, паза аны тастап полбинча тіпче, iдӧк ле ӧткін айғазарға сағынча. Кӱстенҷік волонтер, позының проектін тимнеп, пӱӱл «Этнова» чииттер фестивальында грант утып алған. Грант ахчазы республиканың ӱгредіг паза наука министерствозынаң пирілген. Ирина Майорова ол ахчаа компьютер техниказын алып алған. Наа ноутбук ағаа волонтерлар чӧрімін иртiрерге уғаа тузалығ полар. Волонтерлар ӱлӱкӱнiнде, тізең, ол пуох министерствоның сыйиинаң таныхтатхан. Ол чииттерге чӧп пирче, мындағ чахсы кирекнең айғас сыхса, паза тохтабин, алнынзар ла хаалирға кирек, андада кізінің прай ниме килісче.
Сомнар креатив индустриялар школазыни
Автор :
Инора Боргоякова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
