Айланарға сағынчатхан орын ползын
08.12.2023
Хабарлар
Школа директоры Любовь Боргоякова (оң саринаң ікінҷізі) ӱгретчілерге алғыстас пічіктерін читірген
Пайрам. Асхыс аймаандағы Полтах аалда улуғ пайрам ирткен. Орындағы ортымах школа 95 чылын таныхтаан
Пайрам аалдағы Культура туразында ирткен. Школа тоғынҷыларын паза ӱгренҷілерні алғыстирға Асхыс аймааның, Ис аал чӧбінің устағ-пастаа, ідӧк пу ӱгредіг учреждениезін тоосхан улус килгеннер. Культура туразының залында чон тығырама полған.
Танығлығ иирні азып, ӱгренҷілер «Школада ӱгретчелер» сарынны толдыр пиргеннер. Ӱлӱкӱнге килгеннерні алғыстирға сценазар школа директоры Любовь Боргоякова сыххан. Аның таниинаң, пайрамға килгеннерге ӱгретчілер тың сағын парғаннар. Ӱгретчі-ветераннар килгеніне iдӧк прайзы ӧрінген.
Истегі школа 1928 чылда тоғынып пастаан, пурнада ол ікі класстығ полған, че Абрамнар аалында. Соонаң Полтах аалзар кӧскен. Мында аның чуртас чолы узарадылған.
Асхыс аймаа пазының пастағы орынҷызы Евгений Костяков, аал чуртағҷыларын алғыстап, таныхтаан:
– Истегі школаны тоосханнарны прай республика пілче. Мыннаң кӧп турыстығ кізі сыххан, аның ӱчӱн улуғ алғызым читірчем. Школаа 95 чыл толчатханы – уғаа танығлығ кирек. Ағаа ӱгренҷілерінең, ӱгретчілерінең поғдархирға кирек. Олар улуғ чидіглерге читкеннер. Ам даа ӱгренҷілер саны хызырылбазын. Піс пілчебіс, ааллардаң кізілер улуғ городтарзар кӧсчелер. Че іди дее полза, мында класстар пос турбазыннар, ӱгретчілер тоғысха хынып чӧрзіннер. Школа мыннаң мындар сабланзын.
Асхыс аймааның устағ-пастаа Истегі ортымах школаа 50 муң салковай сыйлап пирген, ахчалығ сертификатты Евгений Костяков школа директорына читірген. Паза Асхыс аймаа устағ-пастааның Аарластығ пічиинең физкультура ӱгретчізі Валерий Сагалаков, физика ӱгретчізі Зинаида Сунчугашева, пасталығ класстар ӱгретчізі Надежда Токоякова сыйыхтатханнар. Асхыс аймаа устағ-пастааның алғыстас пічиин ветераннар Михаил Казагашев, Александр Кильчичаков, Фёдор Табаев, Лидия Топоева, Галина Топоева, Валентина Мамышева, Людмила Мамышева, Галина Казагашева алғаннар.
Асхыс аймааның ӱгредіг устанызының пастығы Ирина Кучугешеваның сӧстерінең, Истегі школа ӱгренҷілерінең сабланча. Мындағы олғаннар хыйғалар, спортнаң ӧткін айғасчалар. Школаның футболист хыстары Россия чемпионнары полыбысханнар, охчаадаң атарынҷа даа ӱгренҷілер сабланчалар. Исте аар атлетикаҷа улуғ чидіглерге читкен Татьяна Бастаева ӱгренче. Школаның спорт клубы республикада иң артых пол парған. Олғаннар олимпиадаларда сыйыхтығ орыннарға сыхчалар, наука-практикалығ конференцияларда араласчалар. Ол тоғыс мыннаң мындар узарадылзын.
Асхыс аймааның ӱгредіг уcтанызының грамоталарын ӱгретчілер Галина Иптышева, Ольга Барашкова, Жанна Субракова, Зинаида Барашкова, Екатерина Канзычакова, Марина Токоякова, Светлана Баласова, Любовь Челтыгмашева, Мария Юктешева алғаннар.
Аның соонаң сценазар Хакасияның ӧӧн олған хирургы, Истегі школаны 1985 чылда тоосхан Геннадий Канзычаков сыххан. Аның сӧстерінең, 95 чыл илбек тус полча, ол тусха школа нинҷе-нинҷе тура алыстырыбысхан. Амғызында ӱгредіг учреждениезі 40 чыл артиинаң тоғын парир. Школанаң Геннадий Степановичтің кӧп ниме палғалыстығ. Мында аның іҷезі Татьяна Сергеевна тоғынған. Школаны аның харындас-пиҷезі тоосханнар.
– Пістің школа ӱгреніс, спорт паза культура саринаң хаҷан даа кӱстіг полған. Ӱгретчілер пӧзік пілістер пирҷеңнер. Школаны тоосханнар аймах-пасха ӱгредіг заведениелерінзер кіріп алчалар. Аны тоосхан кӱресче СССР первенствозының чиңісчізі Семён Самуилович Мамышев, харындазы Степан Самуилович Россия чемпионы полыбысхан. Мындох чоннар аразындағы спорт узы Иван Иванович Голощапов ӱгренген. Владимир Михайлович Еркибеевтің ӱгренҷізі Татьяна Бастаева Россияның піріктірілген командазынзар кірче. Футболист хыстар Россия чемпионнары полыбысханнар. Пістің школаны саблығ артист Юрий Топоев тоосхан. Аның харындазы Михаил Топоев саблығ режиссер полған. Школабыс ідӧк саблан турзын, – алғаан Геннадий Степанович.
Ис аал чӧбінің специализі Анастасия Боргоякова школа айланарға сағынчатхан орын ползын, ӱгренҷілер ӱгретчілерін паза школаны чылығ сӧстернең сағысха кирзіннер тіп алғаан. Мында оларның чуртассар чолы азылған нооза.
Ис аал чӧбінің грамоталарынаң пасталығ класстар ӱгретчілері Ольга Барашкова, Марина Мамышева, Юлия Топоева, Ольга Чепчигашева, биология паза география ӱгретчізі Карина Сагатаева, тархын паза обществознание ӱгретчізі Александр Топоев, орыс тілі ӱгретчізі Олеся Топоева, хакас тілі паза обществознание ӱгретчізі Юлия Чебодаева, физкультура ӱгретчізі Астимир Чебодаев, математика ӱгретчізі Кристина Кызласова, директор орынҷызы Татьяна Чепчигашева паза директор Любовь Боргоякова сыйыхтатханнар.
Пайрамға килгеннернің санында Ирина Аёшина полған. Ол школазар тимнегліг классха 1982 чылда килген. Аның клазы наа ла пӱдірілген турада ӱгренген. Палаларны ӱгретчі Анна Тютюбеева ӱгреткен. Соонаң школазар практикаа Надежда Токоякова килген, ол Иринаны пастағы классха алған. Класста 36 пала ӱгренген.
– Класста чахсы дисциплина полған, уроктар уғаа хынығ ирткен. Ӱгретчілер піске чахсы пілістер пиргеннер. Оларға алғызыбыс читірчебіс. Мин прай даа предметтерге хынғам, наа дисциплина мағаа уғаа чапсых пілдірген. Лабораторнай тоғыстар хынығ полғаннар. Химияда піс опыттар иртірҷеңмiс, – сағызынаң ӱлескен Ирина Петровна.
Cоонаң ол Хакас хазна университедінің Сойан-Алтай тюркология институдын тоосхан. Пӱӱнгі кӱнде Ирина Аёшина филология паза искусство институдының пасха хазна тіллері кафедразында істенче.
Истегі ортымах школаны кӧп саблығ кізі тоосхан. Оларның санында таныхтирға кирек Хакасияның саблығ артизі, Хакасияның хазна премиязының лауреады Юрий Топоевті, Хакасия искусствозының саблығ деятельі, режиссер, «Читіген» театрның хоос устағҷызы Михаил Топоевті, Россияның паза Хакасияның саблығ артизі Евгений Улугбашевті, Хакасияның саблығ артизі Клавдия Сазанакованы, Хакасияның чон узы Петр Топоевті, филология наукаларының кандидаттары Валентина Миндибекованы, Лариса Челтыгмашеваны, Хакасия культуразының саблығ тоғынҷызы Дина Кайлачакованы, имҷі, Асхыс, Таштып аймахтарынҷа паза Абаза городча чааҷылар комиссариадының чаа-имнег комиссия кнезі Сергей Мамышевті, Асхыс аймааның имнег туразының ӧӧн имҷі орынҷызы Надежда Артонованы, ТЮРКСОЙ пірігістегі Хакасиядаң кізізі Тимур Давлетовты, Хакасия культуразының саблығ тоғынҷызы, хоосчы Леонид Канзычаковты, Хакасия культуразының саблығ тоғынҷызы, музыкант Вениамин Боргояковты.
Пайрам сарыннарнаң паза теелбектернең узарадылған. Кічіг ӱгренҷілер, кӧг тиріглерінең ойнап, аалҷыларны хайхатханнар.
Сом авторни
Автор :
Антон Чертыков
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
