Экономиканы тилітчелер
20.12.2023
Хабарлар
Хакасия пазы Валентин Коновалов «Прорыв года» номинация чиңісчізі Алёна Осипенконаң
«Хакасия идінҷегі». Пу наада Ағбанда С.П.Кадышевтің адынаң чон чайаачызы национальнай кінде «Хакасия идінҷегі - 2023» марығ чиңісчілеріне сыйыхтар читірілген
Кіннің кічіг залында тиксі республикадаң идінҷектер паза пос киреенең айғасчатханнар чыылысханнар. Оларның аразында регион синіндегі марығның 34 араласчызы сыйыхха турысхан. Оларны чеестирінде паза сыйых читірерінде Хакасия пазы Валентин Коновалов паза кӧстегліг министерство-ведомстволарның кізілері араласханнар.
Хакасия правительствозы, республиканың экономика тилізі министерствозы паза «Минің пос киреем» кін ӱзінҷі чылы марығны иртірчелер. Чылдаң чылға ол чуртағҷыларның хайиин тартча, аннаңар араласчыларның саны хозылча. Пӱӱл республиканың 13 город-аймахтарынаң марығда 109 идінҷек паза предприятие араласхан. Прай сигіс номинация кӧрілген: «Прорыв года», «Чииттернің пос кирее», «Ипчілернің пос кирее», «Посха тоғыс таапчатханнар», «Иб хыриндағы садығ туразы», «Быт полызығларының туразы», «Хакасияның промышленнигі», «Туризм». Ідӧк пос киреен тилітчеткен аал чӧптері араласчаң алынҷа номинация полған. Марығ араласчылары алты ай аразына иң артых атха турызар ӱчӱн ӱс чардыхта кӱстерінең сынасханнар. Финалға сыххан 34 араласчының пос кирее хайди парчатханын сыныхтап, жюри кізілері чорыхнаң чӧргеннер. Полған на номинацияда ӱзер сыйыхтығ орын пирілген, пасха араласчыларға дипломнар читірілген. Чиңісчілер марығ статуэтказын паза 100 муң салковайға сертификат алғаннар. Ікінҷі орынға турысханнарға 30 муң пирілген, ӱзінҷізіне – 10 муң салковай.
Чиңісчілерні чеестир алнында Хакасия пазы Валентин Коновалов, кічіг паза ортын пос киреенең айғасчатханнарны алғыстап, оларның тоғызы тузалығ полчатханын таныхтаан.
– Хакасия правительствозы пу марығны ӧнетін пастаан, пос киреенең айғасчатханнарға паза предприятиелерге чыл сай алғыстас сӧстерін читірер ӱчӱн. Піс, оңдайлар таап, идінҷектерге хазна хабазиин тӧреміл чахсыландырчабыс. Пӱӱнгі кӱнде республикада кічіг паза ортын пос киреенең айғасчатханнарның саны 17200 чит парған, посха тоғыс таапчатханнар – 22 муңа. Амғы оой нимес туста олар, оңдайларын паза товарларын алғыдып, тиліпчелер. Сірернің кӱстенізіңер сылтаанда Хакасияның паза Россияның экономиказы тиліпче паза тыыпча. Республика правительствозы мыннаң мындар сірернең хада-пірге тоғынар, – чоохтаан Хакасия пазы Валентин Коновалов.
Идінҷектерні алғыстап, культура кінінің ӧмелері, алғыстас сӧстеріне хозылып, улуғ нимес концерт турғысханнар.
Финалға сығып, араласчы дипломынаң таныхтатханнарның санында идінҷек Илона Топоева. Ол пӱӱл «Ипчілернің пос кирее» номинацияда аралазарға чаратхан. Илона Олеговна «Фабрика предпринимательства» школа бизнезінің устағҷызы полча. Ол олғаннарға паза саарбахтарға хоза ӱгредіг пирҷең кӧстегҷе істенче. Палаларны пасха оңдайнаң сағынарға, пос киреенең айғазарға алай чахсы устағҷы поларға ӱгретче.
– Пос киреенең мин ікінҷі чылы айғас парирбын. Ол сағыс 2018 чылдаң сығара полған, че аны 2021 чылда чуртасха кирерге оң полған. Пілдістіг, кредиттер аларға киліскен паза инвестор полызии полған. Инвестор минің хонғаным Алексей Топоев полыбысхан. «Хакасия идінҷегі» марығда мин пастағызын на араласчам. Хайдағ марығ полчатханын піліп аларым килген. Мағаа «Ипчілернің пос кирее» номинация килістіре полған. Марығда аралазарға кӧңніме кірген, сынны чоохтаза, мин ікінҷі чардығына даа сых полбаспын тіп сағынғам. Аннаңар финалға читкеніме ӧрінчем. Пу марығ кізее пос кӱзіне киртініс хосча паза мыннаң мындар пӧгіннер турғызарға полысча.
Марығ чиңісчілеріне алнынзар ла парарға алғапчам. Турғысхан пӧгіннері киліс турзын паза республикабысты тилідерінде хаҷан даа аралас турзыннар, – чоохтаан Илона Топоева.
Сом Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде
