Кирек сурығларҷа айланыңар
18.01.2024
Хабарлар
Чааҷыларға полызығ. СВО ветераннарына паза оларның сӧбірелеріне сығысчатхан сурығларҷа «Ада чир-суубыс арачылағҷылары» фондтың Хакасияҷа пӧлии хабасча
Россияда ӧнетін чаа операциязы араласчыларына паза оларның сӧбірелеріне хабазар «Ада чир-суубыс арачылағҷылары» хазна фонды тоғынча. Хакасияда аның пӧлии пу адресче хабазығ тоғызын апарча: Ағбан г., Ленин ор., 56. Ідӧк аның специалисттерінзер сурығларҷа айланарға чарир пу телефонҷа: +7 (3902)248-520.
Амды фондтың республикадағы пӧлиинде ӧнетін чаа операциязы ветераннарына реабилитация иртчең техника тиріглері пар: тасхар паза ибде чӧрҷең кресло-коляскалар, тайахтар паза даа пасхазы.
Реабилитация иртчең тиріглерні фонд пӧлии тикке пирче, чааҷы саңай хазыхтанып аларына теере алай аны кинек полчатханын турғызарына теере. Аның соонда ағаа тӧстеніп, реабилитация иртчең тиріглерні Россияның Социальнай фондының Хакасияҷа пӧлии пирче.
Фондтың пӧлиинде таныхтапчалар: реабилитация оборудованиезінең тузаланарға итсе, кізее «Ада чир-суубыс арачылағҷызы» фондтың Хакасияҷа пӧлиинзер айланарға кирек, анда специалистнең прай сурығларны алынҷа ӱзӱріп аларға.
Ідӧк «Ада чир-суубыс арачылағҷылары» фондтың Хакасияҷа пӧлиинде ӧнетін чаа операциязының ветераннары, оларның сӧбірелері, ідӧк СВО-да чуртастарын пир салған матырларның туғаннары психологияҷа полызығ ал поларлар.
Пӧзік квалификациялығ ӱс психолог тоғазығлар апарча, олар ӧнетін тимненіс ирткеннер. Специалисттер, алынҷа чоохтазығлар апарып, психология тренингтерін иртірчелер.
Таныхтирға кирек, психология полызии ӧнетін чаа операциязының ветераннарын чаалазығлар соонда амыр чуртасха кӧніктірерге хабасча, ідӧк чуртастарын пир салған матырларның туғаннарына аннаң андар чуртирға полысча.
Специалист-психолог олаңай нимес сурығларны чарадарға хабасча, оларға орта хайарға ӱгретче. Ӧнетін иртірілчеткен тоғазығлар ӱрӱгіс синін тӧбін тӱзірерге полысчалар, оой нимес тусты иртерге хабасчалар. Имҷі-психолог килген кізіні паалир алай хомайлир пӧгін тутпинча, аны позының кӧрізіне айландырарға кӱстенминче. Психолог хайдағ-да чӧптер пирбинче, килген кізінің чооғы оларның аразында ла халча, аннаңар пірдеезіне искірілбинче.
Автор :
Елизавета Гончарова
Пн | Вт | Ср | Чт | Пт | Сб | Вс |
25 | 26 | 27 | 28 | 29 | 30 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде