Россия чемпионадында аралазарлар
31.01.2024
Хабарлар
Чиңіс тутхан Хакасияның иреннер командазы
Марығ. Ирткен неделяда Ағбан стол теннизінҷе Сибирь мариин удурлаан
Хакасия совет тузындох РСФСР-да стол теннизінің кініне саналҷаң. Саблығ тренер Юрий Лебедевтің ӱгренҷілері аймах-пасха синде иртчеткен марығларда тӧреміл чиңіс тутчаңнар. 2021 чылда пу спорт кӧрімі наа тыныс алып алған тирге чарир. Тузаланысха Стол теннизінің кіні кирілген нооза. Ол Н.Г.Булакиннің адынаң спорткомплекстің чардығы полча. Спорт объектiнде чон ӱзілбинче. Спортсменнер турнирлерге, тренировкаларға чыылысчалар.
22 – 27 январьда анда Сибирьнің чемпионады ирткен. Улуғ марығларны Ағбан ікінҷізін удурлады. Пӱӱл арға-мӧрійде СФО-ның 8 регионының – Алтай паза Хызылчар крайларының, Иркутск, Новосибирск, Кемеров, Томск областьтарының, Тува паза Хакас республикаларның – оол-хыстары устарын кӧзіткеннер. Тиксі алза, 200 артиинаң кізі. Оларның аразында 30-ча Россияның спорт узы, 60 артиинаң спорт узына кандидат. 8 спортсмен Россияның піріктірілген командазынзар кірче, олар хазна марығларында сыйыхтығ орыннарға сыхханнар. Аннаңар искірген Хакасияның стол теннизінҷе федерациязының президенті Дмитрий Нагибнев.
Программа хоостыра пастап ӧмелер марии ирткен. Ир кізілердең Хакасия ӱчӱн Марат Султанов, Денис Тебеньков, Антон Котов, Максим Киселев паза Роман Ермолаев турысханнар. Теннисисттерібіске хатығ чуххан. Хазыр харбазығда олар Хакасияа алтын медаль ағылғаннар. Хыстар командазында Наталья Смагина, Оксана Юношева, Дарья Бекишева, Софья Тормозакова паза Мария Горбунова ойнааннар. Халғанҷы тӧрт спортсмен – тренер Дина Кириченконың ӱгренҷілері. Хайди таныхтаан Дина Владимировна, хыстар Сибирь марығларында удаа чиңіс тутчалар. Амғы чемпионатта абахайларға ідӧк оң полды. Алтын медальлар утарға сағынчатсаң, тоғынарға кирек. Ағаа хоза, Ағбанда теннисисттерге истіг оңдайлар тӧстелген. Мындағ кін Cибирьде паза чоғыл.
24 – 27 январьда спортсменнер алынҷа паза iкiлердең ойнааннар. Абахайлар аразында Алина Шамаева чиңіс тутхан, Дарья Шевцова – кӱмӱс призер. Олар Кемеров облазынаңнар. Пістің Оксана Юношеванаң Мария Горбунова хола медальлар утханнар. Ооллар турыстыра ойнабысханнар. Пьедестал Хакасияни полған. Пастағы орынға сыххан Максим Киселев, ікінҷі орынға – Марат Султанов, Артём Котов паза Александр Митрофанов – хола призерлар. Халғанҷы спортсмен Новосибирск облазынаң.
Iкiлердең марығда Хакасияа кӱмӱс медальларны Оксана Юношеванаң Мария Горбунова ағылғаннар, Екатерина Кременецкаянаң Виталина Сладкова ӱзінҷізi полыбысханнар. Максим Киселев паза Марат Султанов, хада-пірге ойнап, чиңіс тутханнар, Антон Котовнаң Денис Тебеньков кӱмӱс медальлар утханнар. Ипчі паза ир кізі паралар мариинда Антон Котовнаң Наталья Смагина ӱзінҷі орынға сыхханнар. Тиксі алза, Хакасияның 12 медаль: 4 алтын, 3 кӱмӱс, 5 хола. Чемпионат салтарлары орындағы стол теннизінің чахсы тилізін киречiледі. Амды спортсменнер Россия мариина тимненчелер. Арға-мӧрій мартта Санкт-Петербургта иртер.
Сом Наталья Данинани
Автор :
Тимнеен Майя Кильчичакова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде