Азых паза сын оңдайнаң апарарға
09.02.2024
Хабарлар
Ӧӧркі Чӧп. Хакасияның Ӧӧркі Чӧбіндегі хазых хайраллирынҷа эксперт чӧбі пастағы чыылиин иртірген
Пастағы чыылығны Хакасияның Ӧӧркі Чӧп кнезі Сергей Сокол асхан. Хайди ол таныхтаан, эксперт чӧптерінің алнында ікі ӧӧн пӧгін турча: пастағызы – сидіксіністерні ілезіне сығарары, ікінҷізі – оларны пӧгерінҷе чӧптерні тимнирі. Законнар сығарҷаң ӱлгӱ толдырығлығ ӱлгӱнең хада ол сурығларны пӧгерлер тіп ізендірген парламент устағҷызы.
Хакасияның хазых хайраллирында, тізең, сидіксіністер ас нимес: имҷілер чидіcпинчеткені, оларның чал ахчазы турыстығ полбааны, имнег полызии читкіҷе нимес синде пирілчеткені паза пасха даа сурығлар.
– Тоғыс кӧп, сидіксіністер кӧп, – чоохтанған Сергей Сокол. – Оларҷа ӱзӱріглер азых паза сын оңдайнаң апарылзын. Улам пу эксперт чӧбі пӧзік пілістіг специалисттердең пӱтче.
Хазых хайраллирынҷа эксперт чӧбінің кнезіне, Хакасияның Ӧӧркі Чӧп кнезі Сергей Соколның чарадиинҷа, республиканың хазых хайраллаҷаң министерствозының олған хирургиязынҷа ӧӧн специализі, Ағбандағы имнег туразының имҷізі – олған хирургы Геннадий Канзычаков турғызылған. Пу пастағы тимнегліг чыылығда эксперт чӧбі кнезінің орынҷыларына «Шира» курорттың ӧӧн директорының орынҷызы Владимир Костюш паза Ағбан городтың табырах имнег полызии станциязының ӧӧн имҷізі Айвар Кольчиков табылғаннар. Эксперт чӧбінзер ідӧк республикадағы пасха даа имнег учреждениелерінің опыттығ устағҷылары кір парғаннар.
Хакасия правительствозынаң эксперт чӧбінің чыылиинда республика пазының орынҷызы Михаил Побызаков араласхан. Ол ідӧк Ӧӧркі Чӧптегі хазых хайраллирынҷа эксперт чӧбі кӱстіг специалисттердең пӱтчеткенін таныхтаан. Паза республика правительствозы сидіксіністерні пӧгерінҷе пірге тоғынарға хаҷан даа тимде тіп искірген.
Чыылығда хазых хайраллирынҷа эксперт чӧбінің 2024 чылның пастағы чарым чылында тоғынҷаң планы чарадыға алылған. Анда кӧрілер сурығларның санында онкологиянаң ағырыбысханнарға, хайзылары республиканың пасха аал-городтарынаң Ағбанзар имненерге килчелер, имнег полызиин пирерін тимнирі.
Хайди чарытхан эксперт чӧбінің кнезі Геннадий Канзычаков, чоох парча республиканың онкодиспансерінзер имненерге килчеткеннерге имнег туразында хонҷаң орын пир турардаңар. Онкология ағырығларынаң имненер процедуралар пір ле кӱн иртпинчелер нооза. Имнег туразында орғаннар чидіспинчеткен сылтаанда оларға кӱннің сай чолда ирееленерге килісче.
Паза пір сурығ – республиканың ыраххы кічіг аалларында имнернең чорыхтығ садығ апарары. Мындағ сурыныснаң республикадағы хакас родтарының Улуғлар чӧбі сыхтыр.
Ідӧк кӧрілген сурығларның пірсі ӧнетін чаа операциязы араласчыларына имнег реабилитациязын пиреріне чарыдылар.
Хакасияның Ӧӧркі Чӧп кнезі Сергей Сокол, эксперт чӧбінің тоғынҷаң планынаң танызып, сала удаа чыылызарға паза сурығларның санын алғыдарға чӧп пирген.
Сом Ӧӧркі Чӧп сайтынаң
Автор :
Альберт Толмашов
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде