Иң кічіглерге - Нымахтар
Ағбанда олғаннар библиотеказында «Орыс чонының нымахтары» нымахтар чыындызының презентациязы ирткен. Пу чыындаа «Ала Таңағас», «Салғын», «Тоғылағас», «Тураҷах» нымахтар кирілгеннер. Нымахтар чыындызын Лидия Баинова тимнеен, Н.Ф.Катановтың адынаң Хакас хазна университедіндегі филология паза культура палғалыстары институдының хакас филология кафедразының устағҷызы Инга Кызласова нымахтарны орыс тілінең хакас тіліне тілбестеен.
- Нымахтар чыындызын сығарар сағыс декрет отпускында тӧреен. Паламны хакас кибірлеріне тӧстеніп ӧскірерге паза пос тілінең книгаларны хада хығырарға сағыныбысхам. Че иң кічіг олғаннарға хакас тілінең пазылған книгалар уғаа асхынах. 2015 чылның июльында Хакасияның экономика министерствозының гранттар мариинда араласхабыс. Сентябрьда «Чиит сӧбіре институдын тыыдары» номинацияца 80 муң салковай грант утып алғаннаңар піліп алғабыс, - чоохтаан Лидия Баинова.
«Орыс чонының нымахтары» чыындыны сығарарға полысхан кізілерге Лидия Баинова улуғ алғызын читірген. Оларның санында орыс тілінең хакас тіліне тілбестеен паза грант мариина проект тимнирге полысхан Инга Кызласоваа, хоосчылар Марианна Касимованаң Ольга Ожигинаа, верстальщик Людмила Топоеваа.
- Чайғыда минзер Лидия Баинова килген. Минің чазыт сағыс пар тіпче: ікі тілнең пазылған ӧңніг книга сығарыбызарға, - чоохтаан Инга Кызласова. - Ол позының сағызын мағаа «чухтыр» салған. Мағаа пілдістіг аның чӱрексінізі. Минің позымның тӧрт часха читкелек пала пар. Сынап таа хакас тілінең книгаҷахтар асхынах, аннаңар мин палама орыс чонының нымахтарын, хығырбин/ хакас тілінең чоохтаҷаңмын. Мин ағаа полыс пирерге кӱстен сыххам. Ол тоғысты студенттерге пир саларға сағынғам, че чайғы туста студенттер прайзы аалларда, аннаңар нымахтарны позым тілбестеем. Илья Топоевке, тілбестегні хоос саринаң кӧр пирген ӱчӱн алгыс!
Таныхтирга кирек, «Вконтакте» социальнай сетьте хакас тілінең нымахтар чыындызын сығарарға ахча киректелче тіп искіріг сыххан. Кӧп кізі, пу сурынысха хайығ айландырып, ахчанаң полыс пирген. 19254 салковай чыылған. Ол ахчаа дисктер алылған паза звукорежиссёрларға тоғыс ӱчӱн тӧлелген. Іди «Орыс чонының нымахтары» аудиодиск сыххан. Аны дискке А.М.Топановтың адынаң драма театрының артисттері хығырғаннар.
«Орыс чонының нымахтары» нымахтар чыындызы 300 экземплярлығ сыххан. Ол школаа парғалах олганнарға паза пасталығ класстар ӱгренҷілеріне кӧріл парған.
Лидия Баинованың кӱстенізінең сых парған ӧңніг книга кічіг палаларға паза оларның іҷе-пабаларына туза полар. Хакас чииттері аразында Лидия Баинова осхас ӧткіннер пары ӧріндірче. Книга сығарызында пу аның пастағы тоғызы. Арса, ол пасха даа чииттерні пу хынығ, че оой нимес тоғысха тартар.
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |