Рекордтарнаң ӧріндіргеннер
29.05.2024
Хабарлар
Россияның спорт узы Денис Чертыков – фестивальның ӧӧн матыры
Спорт. Пӱӱл «Чилдең табырах» фестивальда 2512 кізі араласхан
Россия ӱлгӱлері кӧп чон араласчатхан спортты улуғ хайығда тутчалар. Ол пӧгіннең кізілерге спортнаң айғазар истіг оңдайлар тӧстелче: наа объекттер тузаланысха кирілче, аймах марығлар иртірілче. Специалисттернің танығларынаң, 2000 чылларда хазых чуртасха тартылчатхан улус ӧӧнінде аймах оңдайлығ фитнесте кӱзін сынаҷаң. 2010 чыллардаң, тізең, улуғ кирексіністе чӱгӱріc полча. Аннаң ортын частығ улус айғазарға хынадыр. Кӧбізі марафон чӱгӱрібізерге пӧгін тутча. «Газета.ру» СМИ искіриинең, 2013 чылда Москвадағы марафонда 2500 кізі араласхан полза, пылтыр 42 километр 198 метрні 12 401 cпортсмен тобырған. Хакасия пу чӧрімге 2018 чылда хозылған тирге чарир. Андада Ағбанда «І Lovӱ Sғpӱrsport» чоннар аразындағы спорт школазының региондағы пӧлии тоғынарға пастаан. Школа араласчылары пасха городтарда иртчеткен марығларда араласчаңнар. 2021 чылда Ағбанда «Чилдең табырах» чӱгӱріс фестивальы чуртасха кирілген. Пӱӱл ол тӧртінҷізін иртірілді. Амғы туста аны Хакасияның спорт таниина санирға чарир.
2024 чылдағы фестиваль рекордтарнаң таңнатты. Кӧзідімге, пӱӱл марыға пазынысты ікі кӱн пазынаң чабарға киліскен. Пос орын халбиндыр. Прайзы аралас ползын тіп, тӧстегҷілер пазынысты пазох асханнар. 2022 чылда пас меетке 1390 араласчы сыххан полза, амды – 2512 кізі. Ол рекорд полча! Фестивальның пасха оңдайлары алыспиндыр. Анда ідӧк кічіглерге дее, улуғларға даа аралазар оңдай пар. Олған садынзар чӧрчеткен иркеҷектер 500 метр чӱгӱргеннер, улуғ арах палаларны 1000 метр дистанция сағаан. 3000 метр кӧп чон араласчатхан дистанция полтыр. Спортнаң тӧреміл айғасчатханнар 10 километрде кӱстерін cынааннар. Артыхтарның артығы чарым марафонға сыххан. Олар 21,1 километрні тобырғаннар.
Сизінгенде, араласчыларның илеедезі чӱгӱріс фестивальының пас меедіне чыл сай сыхчаттыр. Кӧзідімге, Артоновтар сӧбірезі марығда тӧртінҷізін кӱзін cынады. Олар Таштыпта чуртапчалар. Иван Семёнович физкультура ӱгретчізі полып істенче, хада хонғаны Наталья Петровна олған садында воспитатель полча. Ынағ ирепчінің ікі пала. Улии Анастасия полицияда тоғынча. 26 сілкерде ол тоғыста полтыр. Очызының ады Игорь, пӱӱл 4-ҷі класс тоосты. Ідӧк марығда Иван Артоновтың чееннері Алинанаң Милана араласханнар. Хызыҷахтар ниик атлетика секциязынзар чӧрчеттірлер. Сӧбіре пазы 10 километрні тобырған, пасхазы 3 километр дистанцияда устарын кӧзіткен. Хайди таныхтаан Иван Семёнович, «Чилдең табырах» фестивальда араласханы сӧбірені піріктірерге полысча.
Илья Шулбаев ідӧк Таштып чирінең сыххан, амғы туста Хакасияҷа МВД-да право пӧлиинде юрисконсульт полып тоғынча. Ол чоохтаан:
– Чӱгӱріске хынчам. Пос тус читпинчеткеннеңер, аннаң толдыра кӱснең айғас полбинчам. Фестивальда пастағызын на араласхам. Итсе, мында ачы туңмам Герман Шулбаевтің «пырозы». Ол УФСИН-да служба иртче. Марыға пазын салтыр, аны атысча турнирге ызыбысханнар. Он километрні турыстыра чӱгӱрібізерге пӧгініп, фестивальға пір ай тимнендім. Кӧңніме кірген.
Саблығ боксер Саяна Казыгашева ідӧк фестивальда чыл сай аралазарға кӱстенче. Пӱӱл хакас абахайға хада хонғаны Иван хозылған. Ирепчі 21,1 километрні тобырған. Саяна Васильевна таныхтаан:
– Мин ам даа марығласчам, аннаңар чӱгӱріснең тӧреміл айғазарға килісче. Пу ӱзінҷі фестивальым. Тынанып аларға пӧгінгем. Иван мині кӱстееннеңер пазох пас меетке сыхтым. Салтарлар ӧріндірче. 2022 чылда чарым марафонны 1 час 57 минутаа чӱгӱрібіскем, пылтыр – 1 час 53 минутаа, амды – 1 час 48 минутаа. Фестивальдаң фестивальға чииттең чиит полып одырчам, таң.
Иван Казыгашев Росгвардияда служба иртче. Фестивальның чарым марафонында пастағызын на аралазып, ол аны 1 час 42 минута аразына тобырыбысхан. Пазағы чылда Казыгашевтер марығда оолғын араластырарға пӧгінчелер.
Че «Чилдең табырах» спорт пайрамының «чылтызына» Россияның спорт узы Денис Чертыковты адирға кирек. Ол арғызы Артём Поповнаң хада пӧзік узынаң фестивальны кӧдір парыбысхан тізе, саба полбас, неке. Спортсменнер чыл сай чӱгӱрчеткен тустарын чахсыландырарға харасчалар. Пылтыр Денис Чертыков, чарым марафонны 1 час 5 минутаа чӱгӱрібізіп, фестивальның рекордын турғысхан. Пӱӱл наа чидіг. Денис Чертыков олох дистанцияда 1:02:23 тусты кӧзітті. Пазох рекорд! Россияның спорт узы Артём Попов улуғ арғызынаң кӧмеске ле халған. Ол чарым марафонны 1 час 4 минута 28 секундаа тобырыбысхан.
Фестиваль тӧстегҷілерін махтабызарҷыхпын. Улуғ мероприятиені иртірерге оой нимес. Че олар сидік туста даа, спонсорларны таап, чонға ӧрініс сыйлирға кӱстенчелер.
Сом Сергей Неделинни
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
