Хабазыға килерге тимделер
29.05.2024
Хабарлар
Михаил Побызаков фермер Иннокентий Казагашевке алғыстас пічиин читірген туста
Сыйыхтас. Хакасия пазының орынҷызы Михаил Побызаков Россияның пос кирее кӱніне удур идінҷектерге алғыстастарны читірген
Хакасияда ирткен неделя Пос кирее неделязы тіп чарлалған. Идінҷектерге ӱгредіг программазынаң пасха аймах чӧрімнер иртірілген: «Дети плюс Бизнес» шахмат турнирі, Идінҷектер аллеязында ағас одыртары паза пасхазы. Пос кирее неделязын сілкер айының 24-ҷі кӱнінде сыйыхтастар чапхан. Хакасия правительствозының чыылығлар залында пір стол кистінде одырғаннар аймах кӧстеглерҷе пос киреенең айғасчатхан идінҷектер: фермерлер, ас-тамах сығарчатханнар, имнег киреенең айғасчатханнар, БПЛА сығарчатханнар паза пасхазы. Прай 20-ҷе кізі. Оларзар алғыстас сӧстерінең айланған республика пазының орынҷызы Михаил Побызаков:
– Аарлығ идінҷектер, сірерні профессия ӱлӱкӱнінең алғыстапчам. Піc пілчебіс, хайдағ даа туста пос киреене хабазығ паза тиліс киректелче, аннаңар піс сірернең хайдағ даа туста хадабыс паза пірге тоғыс салтарларын кӧрчебіс. Сірернің пастағларың чуртасха ниик кирілзіннер, пос кирее, тізең, ӧзізін узаратсын!
Михаил Анатольевич идінҷектерге Хакасия пазының алғыстазын читірген. Сыйых алғаннар санында полғаннар Маткичіг аалдағы фермер Иннокентий Казагашев паза идінҷек Иван Миндибеков (аның орнына толдырығлығ устағҷызы полған). Иннокентий Иннокентьевич маллар ӧскірерінең 1993 чылдаң сығара айғас парир.
– Пӱӱнгі кӱнде мин пос киреенең ікі оолғымнаң, Артёмнаң паза Тимурнаң, хада айғасчам, – чарыт пирген кресен-фермер хонии пазы. – Олар ікізі сӧбіреліг, полысчалар, хада тоғынчалар. Хазна хабазиинаң, 10 миллион салковай алып, мал хазаазын пӱдіріп алғабыс. Інектердең пасха ідӧк хойлар паза аттар ӧскірчебіс. Пістің ӧрінізібіске, дерматит ағырығ піcке читпеен. Хорыххабыс.
Иннокентий Казагашев аал хониинда тіспен істенчеткен ӱчӱн тӧреміл хазна сыйыхтарын ал турча. Россияның пос кирее кӱніне удур тиктең нимес сыйыхха турысхан. Пӱӱнгі кӱн ӱлгӱдең СВО-ға паза аның араласчыларына хабасчатхан идінҷектерге алынҷа хайығны киректепче. Аннаң пасха, пос киреенең айғасчатханнар чуртастың сидік оңдайларына урунған сӧбірелердеңер паза палалардаңар ундутпинчалар, аймах полызығлығ чӧрімнерде араласчалар.
– Идінҷектер хынминчалар, хаҷан оларны чон алнында махтап сыхсалар, олар чахсы киректерін олаңай кирек чіли турғысчалар. Пос киреенең айғасчатхан кізі, арса, андағ поларға кирек? – таныхтап салған Михаил Анатольевич. – Халғанҷы чыллар аразына республикада пос кирее чахсы тиліпче. Анзын хазна чахығларына садығларда орындағы идінҷектер араласчатханы киречілепче. Чылдаң чылға оларның саны хозылып одырчатханы ӧріндірче.
Идінҷектер дее ӱлгӱ хайиина чылығ алғыстас сӧстерінең нандырғаннар. Оларның сӧстерінең, сағам пос кирее ниик «тынча», сыныхтағлар чох чуртапча, че хаҷан полза, ол каникуллар тоозылар, анаң сыныхтағ органнары килеріне тимде поларға кирек. Анзын оңарчатханнар паза прай кирексініcтерге нандырығлығ хайчатханнар пар. Олох туста пос киреенең айғасчатханнар сығарыс сині ӧс парғанын постарыох таныхтапчалар.
– Хайдағ даа полза, піc иң пастағызын пос чирі ӧңнензін тіп сағынчабыс, аның ӱчӱн кӱстенчебіс паза мыннаң мындар полызыға килерге тимдебіс, – тееннер олар.
Сом Дмитрий Сунчугашевти
Автор :
Наталья Боргоякова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде