Тун пайрам прайзын хығырча!
06.06.2024
Хабарлар
Программа. Хандых айының 14-15 кӱннерінде Асхыс аймаандағы Сағай чазызында Тун пайрам алғым таныхталар. Ол Россия синіндегі Сӧбіре чылына чарыдылча. Хакасияның чуртағҷыларына паза аалҷыларына 9 чайаачы ачых тоғынар
Хандых айының 14-ҷі кӱнінде 16.00 часта ӧӧн ачыхта С.П.Кадышевтің адынаң алыптығ нымахтар толдырарынҷа ІІ Республика марии полар. Андох 22.00 часта «Ӧбекелерібіске пазырчабыс» кибірліг программа иртер.
Хандых айының 15-ҷі кӱнінде 11.00 часта ӧӧн ачыхта республиканың чайаачы ӧмелері пайрамны «Тилекейнің тадии – айранның тадии» театр кӧзідиинең азарлар. Андох 18.00 часха теере В.Г.Чаптыковтың адынаң Хакас филармониязының, С.П.Кадышевтің адынаң чон чайаачызы кінінің, республиканың культура-тынағ учреждениелерінің артисттері, пос кӧңнінең тӧстелген ӧмелер паза чииттер хайхастығ чайаачы иир апарарлар.
«Айтыс» ачыхта 15.40 – 16.00 часта тахпахчыларның республика синіндегі 34-ҷі фестиваль-марии иртер. Аның ӧӧн пӧгіні – хакас чонның кӧг чайаачызының кибірліг кӧрімнерін хайраллиры паза сабландырары.
Кип-чоохтар ачығында 12.00 – 15.15 частарда муниципальнай пӱдістернің аразында республика синінде ікі марығ полар. «Чайлағ» марығда чарғыҷылар аалҷыларны удурлапчатхан кибірлерні, хакас иблернің тастындағы кӧрімін, род ағастарының презентацияларын, «Алтын столның» ис-пайын паалирлар. Муниципальнай пӱдістернің ибіҷектері хыринда «Чапчаң килескінің ойыннары» ӱтертістіг марығлар иртер. Анда пайрамның прай аалҷылары аралазар оңдайлығ.
«Хакас чонның ас-тамаа» ачыхта 12.00 – 13.00 часта «Иң чахсы хакас ас-тамаа» республика марии полар. Муниципальнай пӱдістернің чуртағҷылары ӱлӱкӱннің аалҷыларын хакастарның пис аймах ас-тамаанаң сыйлирлар: чарбалығ ӱгре, потхы, хан, талған паза айран. Аалҷылар чиистерні амзап алған соонда иң чахсы ас-тамахха ӱн пирерлер. Анаң комиссия чиңісчіні табар. Андох 16.00 часха теере хакас ас-тамаан тимнирінҷе мастер-класстарда аралазарға чарир.
«Чирімнің ӱннері» ачыхта 13.00 – 16.00 частарда Хакасияның халых пірігістері паза диаспоралар аразында чайаачы концерт иртер, 16.00 – 17.00 часта – Хакасияның театр деятельлері пірігізінің чайаачы программазы, 17.00 – 18.00 часта – Хакасияның композиторлар пірігізінің концерті.
«Ойын» ачыхта 11.00 – 18.00 частарда олғаннарға аймах чилеңместер тоғынар, 13.00 частаң пасти сӧбірелерге хакас чонның ойыннары иртірілер.
«Устар аалы» ачыхта 10.00 – 17.00 частарда Хакасияның декоративно-прикладной искусство устарының кӧзідіг-ярмарказы полар. Анда ӱлӱкӱннің аалҷылары постарына чапсых сувенирлер алып аларлар паза от чейін хайнадарға ӱгренерлер. Пуох ачыхта 12.30 – 17.00 частарда «Алтын чазы» хакас чонның кип-азааның марии иртер. Анда сӧбіре династиялары аралазар. Марығҷылар ӱс номинацияда кӱстерін сынирлар: «Хакас чонның кибірліг костюмы», «Наа костюм», «Сцена костюмы».
«Марығ» хакас чонның ойыннары паза арға-мӧрійлері ачығында 12.00 – 18.00 частарда «кӱрес», «хапчаң тас», «ағаснаң тартыс», «тобит», «охчаадаң атыс» марығлар иртер.
«Ат чарызы» ачыхта 12.00 – 15.00 частарда ат чарызы парар паза хой хырыхчатхан устарның мастер-клазы иртер.
Сом «Хакас чирі» газета архивінең
Автор :
Аскар Артамонов
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
