Сӧп-сапты чох идеріне – пірге чол картазы
05.06.2024
Хабарлар
Ӧӧркі Чӧп. Хакасиядағы чарадығ чох тӧстелген сӧп-саптығ орыннарны чох идер тоғыс тӱптестірілерге кирек, анзына алынҷа «чол картазын» тимнирге киректелче
Мындағ чӧпнең сыххан Хакасияның Ӧӧркі Чӧбіндегі экологияҷа эксперт чӧбі Хакасия правительствозының пу сурығҷа сан пирізінің салтарларынҷа.
Пӱӱнгі кӱнде сӧп-сап чыыл парған орыннарның тиксі улии 180 гектарға читче. Ол ілезіне сығарылған чарадығ чох тӧстелген сӧп-саптығ 66 орын. Муниципальнай пӱдістер олардаң тоғыр кӱрезіг апарчалар. Регион бюджедінең «улуғ арығласха» пу чылда 34 миллион салковай позыдылған. Республиканың чир-чайаан ис-пайы паза экология министерствозы ол ахчаа сӧп-саптығ читі орынны чох идібізерге паза Асхыс аймаанда чирні сӧп-саптаң арығлирынҷа проект тимнебізерге пӧгінче. Муниципалитет софинансирование оңдайынаң ол кӧстеге 400 муң салковай артиинаң позыдар.
Таныхтирға кирек, Асхыс аймаанда сӧп-сапты таарлаҷаң станцияларның пірсі тӧстелерге кирек. Андағ инфраструктура объекті Саяногорскта тоғынып пастабысхан. Автоматизациялығ система ТКО-наң тоғысты тӱзімніг ле итпинче, че ідӧк ол полызыға тарифті тударға оңдай пирче. Мусоровоз тӧкчеткен сӧп-сап мындох пресс алтына кірче, анаң аны чабых оңдайнаң полигонзар тарт парыбысчалар. Че пӱӱн Асхыс аймаанда сидіксініс сығыс килген. Аал чӧбі пазы чарғы пастыра объекттің орнын алыстырыбызарға кӱстенче. Санитар зоназы, комплекс паспорты тимнел парған паза Роспотребнадзор чарадығ пирген полза даа. Эксперт чӧбінің чыылиинда араласхан Хакасия пазының орынҷызы Юрий Курлаев правительство Арбитраж чарғызының чарадиина ізенчеткенін таныхтаан. Проектке миллионнар салковай хорадыл парған нооза.
Паза пір андағох сӧп-сапты таарлаҷаң станция Ширада орнығарға кирек. Килер чылда аның проектін тимнирінҷе тоғыстар пасталар. Амды муниципалитеттің устағ-пастаа килістіре орын тілепче.
«Экологияҷа паза чир-чайааннаң тузаланарынҷа эксперт чӧбі регион правительствозына чарадығ чох тӧстелген сӧп-саптығ орыннарны, ол санда кирек пічіктер тимнел парған, че аймах-пасха сылтағларнаң соона салдырылған объекттерні чох идерінҷе «чол картазын» тимнирге чӧп пирер. Аннаң пасха объекттерні, хайдағ ӱрег ағылчатханын кӧре, тӱптестір саларға киректелче», – салтарлар иткен Ӧӧркі Чӧптің профильліг комитедінің кнезі Ольга Городкова («Единая Россия» фракция).
Эксперттер ӱзӱрген паза пір сурығ – биологическай сӧп-сапты чох идері. Харатаста тоғынчатхан чалғыс крематорийнің тоғызын нииктебізер ӱчӱн андағох объектті Пии аймаанда пӱдір салары кӧрілче. Ол лицензиязы пар полчатхан «РОСИ» ООО-ның, хайзы хорғыс ағылчатхан артхан-халғанны ӧртирінең айғасча, филиалы полар. Пу сурығны сағам республика правительствозы ӱзӱрче.
«Ікінҷі крематорий киректелчеткенінде, тоғынчатханын сала пос идібізерінде, оңарылыс пар. Че олох туста Саяногорск паза Пии аймаа чуртағҷыларынаң хада халыхтар ӱзӱріглерін хайди даа иртірерге кирек тіп санапчам. Специалисттер комплекс хайди тоғынарын прай чарыт пирерге киректер. Чуртағҷыларның кирексіністері паза оларның чуртас оңдайлары хыйыхтал парбас ӱчӱн. Оларның хазиина паза чуртазына хорғыс чох поларға кирек», – таныхтаан депутат.
Алынҷа талазығ парған имнернің артхан-халғанынаңар, хайзылары оолығ полчалар. Олар кізі хазиина паза ибіркі чир-чайаанға иң улуғ хорғыс ағылчалар (Г классар кірчелер). Ол сурығны Федеральнай экологическай операторнаң чахсаан ӱзӱрібізерге кирек тіп чарат салғаннар эксперттер. Республиканың имнег учреждениелеріне, тізең, артхан-халғанны чох идеріне (хайзыларын имнег тураларындох чох идерге чарир) хоза утилизаторлар аларына Хакасия бюджедінде ахча кӧр саларға.
«Эксперт чӧбі ідӧк правительствоға киректелбеен алай тузы ирт парған имнерні, хайзылары чуртағҷыларның холында пар, чох идеріне субсидия позыдар программа тӧстирінҷе тоғыныбызарға чӧп пирер. Ам кізілер оларны олаңай сӧп-сап кӧнегінзер тастабысчалар. Анзы саба паза чарабас ниме. Ол оңдайнаң піс чир-чайааннығ ис-пайыбысты оохтырчабыс», – салтарлар идіп, таныхтаан Ольга Городкова.
Сом интернеттең
Автор :
Хакасияның Ӧӧркі Чӧбінің хабарлар пӧлии
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде