Чиңісчілер хазна синіндегі марығларға парарлар
05.06.2024
Хабарлар
Марығларда тиксі 10 ӧме араласхан
Спорт. 29 сілкерде Таштып аалдағы «Урожай» стадионда «Президенттің арға-мӧрійлері» ирткен. Пу марығлар Россия президенті В.В. Путиннің чарадии хоостыра 2010 чылдаң сығара чуртасха кирілчелер. Олар ӱгренҷілернің спорт саринаң тимненістерін кӧріп аларына тӧстелгеннер
«Президенттің арға-мӧрійлері» пайрамни азылғанында кӧп кізі араласхан, оларның санында полғаннар: Хакасияның ӱгредіг паза наука министрінің орынҷызы Юрий Сагалаков, республиканың піріктірілген командаларын тимнеҷең спорт кіні устағҷызының орынҷызы Константин Панов. Кӱн айас турған, че соох чил ӱбӱргені чыылысханнарның кӧңнін кӧмес тӱзірібіскен.
Аалҷыларны паза араласчыларны Таштып аймаа пазы Николай Чебодаев удурлаан:
– Аарлығ нанҷылар, ӧрініснең удурлапчам сірерні Таштып чирінде. Мин санапчам, мындағ марығлар хайди дее киректер, чиит тӧлге олар улуғ туза ағылчалар. Пӱӱн сірернің аразында чиңісчілер табылар, ідӧк ізенчем, сірер мында наа арғыстар таап аларзар.
Юрий Сагалаков чарытхан:
– «Президент ойыннары» тӧрт синде иртчелер – школада, муниципальнай пірігісте, регион паза федеральнай синнерде. Пылтыр республика синінде Ибігдегі ӱгренҷілер утып алғаннар. «Орленок» лагерьде иртірілген хазна синіндегі марығларға парып, олар 80 азыра команда аразында 15-ҷі орынға сығып алғаннар. Анзы, мин санапчам, хомай нимес чидіг. Ниик атлетика эстафетазында, тізең, 9-ҷы орынны холға киргеннер. Ағаа хоза Ибігдегі хызыҷахтар пляжтағы волейболҷа чемпионнар пол парғаннар! Пӱӱл піс пастағызын на «Президенттің арға-мӧрійлерін» Ағбаннаң оортах иртірчебіс. Алнындағы чылларда олар Харатас городта апарылҷаңнар. Амды Таштыптағы наа тирігліг стадион республика синіндегі марығларны удурлирға тимде. Хабасхан ӱчӱн Таштып аймаа устағ-пастаан, уламох аймах пазы Николай Чебодаевті алғыстапчам. Марығ чиңісчілері ӱртӱн айында Россия синіндегі «Президенттің ойыннарына» парарлар, олар ідӧк Краснодар крайының Туапсе аймаандағы «Орленок» олғаннар хазиин пиктеҷең лагерьде иртерлер.
«Президенттің арға-мӧрійлерінде» 10 ӧме (прайзы 6 класс ӱгренҷілері) араласхан: Ағбан, Абаза, Харатас городтарның, Алтай, Асхыс, Орджоникидзе, Ағбан пилтірі, Таштып, Пии аймахтарының, Хакас национальнай гимназияның командалары.
Олғаннарға алғым программа тимнелген, олар кӱстерін аймах кӧстеглерҷе сынааннар: чӱгӱрісте, баскетболда, футболда паза даа пасхазында. Харбазығ хазыр парған. Стадиондағы хайыныс 11 час иртеннең 18 час иирге теере тохтабаан. Аймах площадкаларда чарғыҷылар ӱгренҷілернің нинҷе тартыныбысханын, атығыбысханын, чӱгӱрібіскенін алай ойнабысханын санааннар. Ӧӧн чарғыҷы Константин Панов полған.
Городтағы командалар аразында пастағы орынға Харатас сыххан, че ол чарадығны ағбандағылар талазыға сығарыбысханнар. Талазығ соонаң Ағбанның командазы 1 орында пол парған, Харатастаң килген олғаннарға 2 орын пирілген, 3 орын – Хакас национальнай гимназияның ӱгренҷілеріне. Аалдағылар аразында Таштып аймааның командазы (Ибігдегі школаның 6 «А» класстың ӱгренҷілері) чиңіcчі полыбысхан, 2 орынға Ағбан пилтірі аймаа турысхан, 3 орынға – Асхыс аймаа.
Чиңісчілер Россия синіндегі «Президент ойыннарына» парып, ӧӧн сыйых, Президент Кубогы, ӱчӱн паза спорт киреен тилітчең грант ӱчӱн харбазарлар.
Сом авторни
Автор :
Тарина Бутонаева
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
