Тузалығ тоғазығлар паза чӧптезіглер
14.06.2024
Хабарлар
Хакасия пазы Валентин Коновалов паза «Россиядағы экология операторы» компанияның ӧӧн директоры Денис Буцаевнең чӧптезігде хол салған соонаң
ПМЭФ-2024. Петербургтағы чоннар аразындағы экономика форумында Хакасия пазы Валентин Коновалов пасха хазналарнаң, регионнарнаң паза компанияларнаң пірге тоғынардаңар кӧп чӧптезігде хол салған
Чӱзерлеп тоғыс орыннарын пирер
Хакасия правительствозы паза «РУСАЛ САЯНАЛ-2» компания промышленность-сығарыс сферазында наа инвестиция проекттерін чуртасха кирер пӧгіннердеңер чӧптезігде хол салғаннар.
Чӧптезіг хоостыра «Хакас технология ойымы» алынҷа экономикалығ орында чылбыраң фольганы паза соох оңдайнаң тимнелчеткен лентаны сығарары чылда 46,2 муң тоннаа теере ӧскірілер. Аны 2025 чылда чуртасха кирерге пӧгінчелер. Проект чӱзерлеп тоғыс орыннарын пирер, бюджетсер кірчеткен налог ахчазын ӧскірер.
Ідӧк «РУСАЛ» компаниянаң хада республиканың аал хониин паза туризмін тилідерінҷе тоғыс апарылча. Компания регионның чирінде промышленность кластерлерін тӧстирінде араласчаң оңдайларны кӧрче.
Валентин Коновалов «РУССКИЙ АЛЮМИНИЙ Менеджмент» акционер пірігізінің ӧӧн директоры Евгений Никитиннің пастыра «РУСАЛ» компанияа піcтің республиканаң пірге тоғысты тӱзімніг апарчатханы ӱчӱн алғызын читірген.
– Компания нинҷе-де чыл изере Хакасия правительствозының ізестіг партнеры полча. Ізенчем, республикадағы чуртасты улам чахсыландырар паза истіг идер пірге проекттер ам даа ас нимес полар, – таныхтаан регион устағҷызы.
Тӧреміл садығ апарчалар
Петербургтағы чоннар аразындағы экономика форумында Хакасия пазы ідӧк Казахстанның Россиядағы полномочиеліг илҷізі Даурен Абаевнең тоғасхан.
Казахстан – Хакасияның тӧреміл садығ апарчатхан партнерларының пірсі. Пістің республика ынағластығ хазназар химиялығ ниме-нооны, пластмассаны, пазахтығ ӧзімнерні, ӱреннерні, тамахтаң, уннаң, крахмалдаң паза сӱттең тимнелген ас-тамахты экспортха ысча, импорт оңдайынаң пӱдіріг материалларын, ас-тамахты паза полимерліг ниме-нооны алча.
Ирткен чылның ӱртӱн айында Хакасиязар Казахстанның бизнес-делегациязы кил парған, андар тӧрт компанияның кізілері кіргеннер. Чорых тузында олар орындағы идінҷектернең тоғасханнар, регион предприятиелері хайди тоғынчатханын кӧріп алғаннар, пірге тоғынар оңдайларны, ол санда экспорт сурығларын, ӱзӱргеннер.
Хакасия пазы пістің республика ынағластығ хазназар орындағы сығарығҷыларның улам кӧп продукциязын, ол санда аал хонии ас-тамаан, металларны паза хара тасты, минералларны паза ағасты, ызарға тимде тіп таныхтаан. Валентин Коновалов илҷіні пістің регионзар ааллап килерге хығырған.
– Даурен Аскербекович, Хакасияа хайығ салчатханыңар ӱчӱн сірерге алғызым читірчем. Піс Казахстаннаң партнер хайызығларын тилідерін кирексіпчебіс, чоохтазыға хаҷан даа азыхпыс паза пірге тоғыс тӱзімніг парарына ізенчебіс, – таныхтаан Валентин Коновалов
Чахсы хонҷых хайызығларны тилідерге
Форумда хонҷых Тыва Республиканаң регионнар аразындағы палғалыстарны мыннаң мындар тилідердеңер чӧптезіг иділген.
Регионнарның пастары – Валентин Коновалов паза Владислав Ховалыг – республикалар правительстволары иткен пірге тоғынардаңар чӧптезіг хоостыра 2025 – 2027 чылларға мероприятиелер планын чарадыға алыбысханнар.
Ол чӧптезіг тоғынған чыллар аразына аймах-пасха сфераларда хомай нимес салтарлар полған: ол санда аал хониинда, ӱгредігде, культурада, спортта паза туризмде.
Ікі чыл мының алнында Ростуризм Хакасиянаң, Тыванаң паза Хызылчар крайынаң Сибирьнің ӱстӱнзархызын федеральнай синдегі пірге турист чолын чіли тилідердеңер чӧптезіг иткен. Аны хоостыра пістің регионнарҷа иртчеткен «Сибирьдегі каникуллар» пастағы национальнай турист чолы тоғынып пастаан.
«Аалларның тиксі тилізі» хазна программазын чуртасха кирері хоостыра опытнаң ӱлезерінҷе пірге тоғыс апарылча. Тывадағылар Хакасияның опыдынаң танысчалар.
Республикаларны паза пір проект піріктірче – чол чӧрізін хорғыс чох идер кӧстегнең Ағбан – Абаза – Ах тобырах чолны иптирі. Ол ікі регионны піріктірчеткен чалғыс автомобиль чолы ла нимес, ол ідӧк Моол чирінің хырығларын иртчең пунктсар апарчатхан чол.
Хакасияның паза Тываның удур-тӧдір тузалығ пірге тоғысты мыннаң мындар узарадарына ам даа кӧп оңдай пар. Сарилар регионнар аразындағы чахсы хонҷых хайызығларны тилідерін кирексіпчеткеннерін кӧзіткеннер.
Садығ, туризм паза культура
Петербургтағы чоннар аразындағы экономика форумында Хакасияның паза Узбекистанның аразындағы партнер хайызығларын тыыдардаңар чӧптезіг иділген. Регион пазы Валентин Коновалов Узбекистанның Россиядағы полномочиеліг илҷізі Ботиржон Асадовнаң тоғазығ иртірген.
Узбекистан – Хакасияның тӧреміл садығ апарчатхан партнерларының пірсі, чирлерібіс чағын полған сылтаанда. Хакасия правительствозы аал хонииндағы, ас-тамах сығарчатхан паза ниме-ноо тимнепчеткен промышленностьтағы пірге тоғысты мыннаң мындар узарадарын кирексіпче. Пістің регион Узбекистанзар орындағы аал хонии ас-тамаан улам кӧп ызарға тимде, Узбекистан – хайзы товарларының экспортын ӧскірерге.
Туризмҷе хайызығларны алғыдары кӧрілче. Хакасия паза Узбекистан аразында кӧні авиарейстер асчаң оңдайлар кӧрілче.
Сарилар ідӧк культура палғалыстарын тыыдарын кирексіпчелер.
Сілкер айы тоозылчатханда Валентин Коновалов, Россия делегациязында полып, пістің хазна регионнарының паза Узбекистанның пастағы чӧбінің мероприятиелерінде араласхан.
Ол чорыхта Хакасия пазы Узбекистанның премьер-министрі Абдулла Ариповнаң тоғасхан. Тоғазығда ол санда ікі сарилығ палғалыстарны тилідердеңер, чуртас-экономикадағы пірге проекттерні чуртасха кирердеңер чоох парған.
Экономика хайызығларын пӱдірер кӧстегнең Хакасия пазы Узбекистанның делегациязын піcтің республиказар ааллап килерге хығырған.
Пірге кін тӧстелер
Форумда Хакасия пазы Валентин Коновалов паза Сбербанк правлениезінің кнезі Александр Ведяхин пірге тоғынардаңар чӧптезігде хол салғаннар. Сбер регионның хазна учреждениелеріне, предприятиелеріне банк полызығларын пирер, инвестпроекттерде аралазар оңдайларны кӧрче. Банк Хакасиядағы кічіг паза ортын бизнесті тилідеріне хабазарға, оларға искірігліг паза чӧптіг полызығ пирерге пӧгінче.
Ідӧк регионның инфраструктуралығ тиліс, пӱдіріг, нааҷылағ паза тиксі тыхтағ проекттеріне ахча позыдар сурығ ӱзӱрілче.
Регион чуртағҷыларына чурт ал полар оңдайлар азары – пірге тоғыстың паза пір кӧстее. Сбер чылығ паза суғ пирҷең системаларзар тӱзімніг тоғынҷаң паза ӱзӱрлеҷең технологиялар кирҷең программаларға, регионның аал-городтарының инженер инфраструктуразын нааҷылаҷаң программаларға кредиттер пирерінде аралазар.
Хакасияда чурт-коммунальнай полызығлар паза пасха даа полызығлар ӱчӱн тӧлеҷең система нииктелер. Анзына Тӧлеглернің паза биллингтің пірге кінін тӧстирінҷе тоғыс апарылар.
Тоғынҷаң оңдайлары улуғ
Петербургтағы чоннар аразындағы экономика форумында Хакасия пазы Валентин Коновалов паза Кемеров облазы губернаторының тоғызын толдырчатхан Илья Середюк садығ-экономикада, наука-техникада, культурада паза пасха даа сфераларда пірге тоғынардаңар чӧптезігде хол салғаннар.
Ол чӧптезіг хоостыра аймах-пасха отрасльлардағы партнерствоны алғыдары, Ағбан – Бийск автомобиль чолын пӱдірерінең палғалыстығ инвестиция проектін чуртасха кирерінҷе пірге тоғынары, ӱгредіг, культура, спорт паза туризм сфераларында пірге мероприятиелер иртірері кӧрілче.
– Хакасияның паза Кемеров облазының пірге тоғынҷаң оңдайлары улуғ. Пістің пӧгін – ол тӱзімніг тоғыс мыннаң мындар апарыларына регионнар аразындағы хайызығларны тыыдарын узарадары, – теен Валентин Коновалов.
Экологияны чахсыландырар пӧгіннең
Экономика форумында Хакасия пазы Валентин Коновалов паза «Россиядағы экология операторы» хатығ коммунальнай артхан-халғанынаң тоғынҷаң комплекстіг система тӧстирінҷе халых-право компаниязының ӧӧн директоры Денис Буцаев пірге тоғынардаңар чӧптезігде хол салғаннар.
Чӧптезігнің ӧӧн пӧгіні – хатығ коммунальнай артхан-халғанынаң (ТКО) тоғынар сферада, ол санда «Экология» нацпроекттің «Сӧп-сапнаң тоғынҷаң комплекстіг система» федеральнай проектін чуртасха кирері хоостыра, пірге тоғынары.
Хакасия правительствозы амғы туста республикада сӧп-сапнаң тоғынҷаң комплекс тӧстирінҷе тоғыс апарча. Ол комплекс Хакасиядағы хатығ коммунальнай артхан-халғанының 100%-ін алынҷа чыырынҷа, ідӧк полигонзар кӧмерге ызылчатхан сӧп-сап синін ікі хати хызырарынҷа тоғынар. Іди картон, чаҷын, пластик, сӱлейке, тимір паза пасхазы алынҷа чыылар. Ідӧк, органикалығ артхан-халғанын алынҷа чыып, аннаң техническай грунт паза удобрениелер тимнеп турарлар. Ол кӧстеглерге Ағбан пилтірі аймаанда чир участогы пирілген. Заводты пӱдірҷең орында хазнаның тархын-культура экспертизазы иртірілген.
– Экологияны чахсыландырары – Хакасия правительствозы тоғызының стратегиялығ пис ӧӧн кӧстеенің пірсі. Сӧп-сапнаң тоғынҷаң наа комплексті тузаланысха киргені республикада экология киреен чахсыландырарға, наа тоғыс орыннарын тӧстирге, бюджетсер кірчеткен налог ахчазын ӧскірібізерге оңдай пирер. Проект-смета пічіктері тимнелген паза хазна экспертизазы пирілген соонаң піс завод пӱдіриине РЭО ППК-наң иділген чӧптезіг хоостыра федеральнай ахча киріп аларға пӧгінчебіс, – чоохтаан Валентин Коновалов.
2023 чылның улуғ хырлас айында Хакасия пазы паза РЭО ППК чол картазында хол салғаннар, аны хоостыра Хакасияда ТКО-наң тоғынарынҷа комплекс 2026 чылға теере пӱдіріл парарға кирек. Аның ТКО-наң тоғынҷаң пір чылдағы кӱзі – 155 муң тонна, утилизацияа ысчаң кӱзі – 54 муң тонна.
Экономикада ӧзіс
Ідӧк Санкт-Петербургтағы экономика форумында Россия субъекттерінің инвестиция климадының национальнай рейтингін искіргеннер.
Чоохтирға кирек, пу рейтинг тӧрт кӧстег кӧзідіглерін кӧріп саналча: бизнеске полызығлар хайди пирілчеткені, инвестициялар тӱзімі, инфраструктура паза ресурстар пары, кічіг паза ортын пос киреене хабазығ.
Іди пір чылға Хакасия Россияда 35-ҷі орыннаң 25-зінҷізіне теере кӧдіріл парған. Сибирьдегі федеральнай округ регионнары аразында – алтынҷы орында.
Ағаа хоза, пу чылның пастағы ӱс айына ӧӧн капиталға инвестициялар сині ӧcкені хоостыра республика Россияда тӧрт пастағы регион санында, СФО-да – ікінҷі орында. Хакасияда промышленность сығарызында, пӱдірігде паза розничнай садығда ӧзіс таныхталған.
Сом r-19.ru сайттаң
Автор :
Тимнеен Альберт Толмашов
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде