Ас саннығ орындағы чон
03.07.2024
Хабарлар
Тлаҷах аалдағы этнокультура кінінде «Айланыс» шор культуразының фестивальы тузында
Хакасия – прайзыбыстың ибі. Республикада чуртапчатхан шорлар орындағы асхынах саннығ чонға cаналчалар. 25 чыл мының алнында пурун оларның «Шория» халых организациязы тӧстелген, соонаң – Асхыс паза Таштып аймахтарында род пірігістері
Амғы туста «Шория» пірігіс Россиядағы орындағы ас саннығ чоннарның ассоциациязынзар кирілген. Пу пірігісті тӧстир пастағнаң Ағбандағы шор интеллигенциязы сыхтыр. Іди ол 1999 чылда шорларның праволарын арачылирға, ідӧк культуразын, кибірлерін хайраллирға – ӧӧн кӧстеглердең тӧстелген. Пу кӱнде «Шория» хакас пірігізінең, кнес полып, устап парча Айра Николаевна Маргасова. Ол таныхтапча, пу кӱнде шорлар, ӧбекелері чіли, чир-чайаанны улуғлап, аңнап, палыхтап чуртапчалар, пос кибірлерін паза культуразын хайраллап халғаннар. Хамға киртініс ідӧк пурунғыдағылардаң пиріл парған. Олар тіл хоостыра, тӱрк тілліг чоннарнаң тиңнестірзе, хакастарға уғаа чағын чон полча тіп санирға чарир. Пӱӱн тіл сурии оларның ідӧк, пісти осхас, иң ағырсымнығ сурығ полтыр.
Айра Николаевна пу пірігістің кнезіне пылтыр табылған. Ол Илимор аалдағы Кызласовтар родының хызы полча. Іҷезі Нелли Ивановна Шельтрекова – шор чонның хызы. Аның тӧреен чирі Кемеров облазындағы Таштагол аймаандағы Ортын Бугзас аал полтыр. Хаҷан ағаа 7-8 час полғанда, улуғлары Шор чирінең, тайға-тағларны ас килібізіп, Таштып аймаанзар кӧс килгеннер. Хайди ам Айра Николаевна сағысха кирче ууҷазының чооғын, ол туста Кемеров облазында чон тың ӧзӧгісте чуртаан. Ууҷазы, тудынҷах-хабынҷахтарын хада алып, хызыҷағынаң пу чирлерзер чидіп алтыр. Соонаң Хакасияда Айра Николаевнаның чаҷазы, тайызы тӧрееннер. Іҷезі тун пала полған. Ол школа соонаң Ағбандағы кооператив училищезін тоозыбысхан, кӧстег хоостыра Асхыс аймаанзар тоғынарға парған. Анда Кызласовтар родының оолғынаң, Николай Павловичнең, танызып, сӧбіре тӧстеен.
Чиит ирепчінің Айра хызы Ағбанда тӧреен. Хаҷан ағаа 3 час толғанда, паба-іҷезі Байкал-Амур магистраль (БАМ) пӱдіриинде аралазар ӱчӱн Хакасиядаң кӧс парыбысхан. Іди хызыҷах ыраххы чирде ӧскен. Постаң чазына читкенде, тимір чолда даа тоғынарға маңнанған, почтаны тарадарынҷа экспедитор полтыр. Че олох туста Хабаровсктағы тимір чол транспортының инженерлер институдында пӧзік ӱгредіг алған. Амур облазында чуртап, андох ирге парып, хоных хонған. Соонаң 22 частығда, 1996 чылда, Хакасиязар отпускка киліп, мында чуртирға халарға сағыныбысхан. Андада пабазы Ағбанда чуртапчатхан, ол хызының хада андағ сағызынаң ӧрініснең чарас салған. Іҷезі, тізең, Тында городтаң ам даа кӧскелек полған.
Хакасияда А.Н.Маргасова 2006 чылдаң сығара халых тоғызынаң айғазып пастаан. Ол позы осхас ӧткіннернең шорларның наа пірігізін азып аларға сағынғаннар. Андада оларға чӧп пиргеннер: пилен тӧстел парған «Шория» пірігісті хатап «тірілдірерге», ол пічіктерде ле пар тіп саналҷаң. Аннаң уғаа нандырығлығ, кӱстенҷік ипчі Наталья Николаевна Федотова илееде чыл устаан. Ӧткіннерге кӧп сидіксіністі тобырарға киліскен. Аймах мероприятиелерде аралазып, сценазар постары даа сых турҷаңнар, теелбектер кӧзідіп, сарыннар ырлап, чонының культуразынаң таныстырарға матап кӱстенҷеңнер. Айра Николаевна, полбаста, «Аймах ӱнніг Хакасия» фестиваль-марығда пӧле пиҷезін, палазын араластыртчаң. Палаларға марығда 9 частығдаң аралазарға чарадылҷаң. Аның хызыҷағы андада 7 частығ ла полған, че іди дее полза, ағаа марығда аралазарға чараттырлар. Чайаачы пала сыйыхха турысчаң.
Таныхтирға кирек, Айра Николаевна ыраххы чирде ӧскен дее полза, ол хакас тілін пілче, арығ чоохтан полбинчам тіпче. Тӧреен тіліне палаларын даа ӱгретче, тун хызы тіл пілчеттір, очызы пос тілінең сала уйан арах чоохтасчаттыр. Аннаңар А.Н.Маргасованы аның ӱчӱн махтапчалар, пасхазына чахсы кӧзідім полча тіп.
Айра Маргасова
Шор тілін оңарчам, че чоохтас полбинчам тіпче. Іҷезі чир ӱстӱнде иң не паарсах кізі, шор чонына хынызын, улуғласты олған тузындох чӱрее-паарына сигдір салған. Аннаңар даа, неке, Айра Николаевна амды, шор чонның ӱчӱн турызып, пу халых тоғызынаң ӧткін айғасча, андар матап тартылча.
«Шория» пірігісте толдырылчатхан тоғыс ӱчӱн ахча тӧлелбинчетсе дее, аннаң ол хынып айғасча. Ол-пу тоғыстарға, пічіктерні тимниріне ахча киректелзе, пірігістегілернің «взностарын» чыып алчалар, анаң хорадығлардаңар сан-пиріс чектер пастыра иділчеттір.
– Пу пірігіс Хакасиядағы шорлар хада-пірге тудынып чуртазыннар тіп тоғыснаң айғасчатхан координатор полча. Пістің республикада шорларның ам хоза ӱс наа пірігіс ӱр ниместе азылған тіп искірілген. Пір ай мының алнындағы танығлардаң, регионда 22 пірігіс саналған. Олар территориальнай хонҷых паза род пірігістеріне пӧлілчелер. Род пірігізін алынҷа пір сӧбіре дее тӧстеп алча алай андар пір родтағылар ла кірчелер, хайзы-да туған-чағыннардаң пӱтче. Территориальнай хонҷых пірігістерінде шорлар саны 30%-тең тӧбін полбасха кирек. Андар хонҷыхтар, ідӧк шорларнаң пір чирде чуртапчатхан орыстар алай пасха даа национальностьтығ кізілер алылчалар. «Шория» пірігіс – халых организациязы. Андар сағам 16 пірігіс кірче, полғанында ла кнес пар. Тиксі араласчыларның саны – 157 кізі.
Чурағҷылар санға алылған халғанҷы танығлардаң, Хакасияда 1445 шор чуртапча. Амғы туста орындағы асхынах саннығ чоннар хазна реестрінде cанға алылчалар. Ол тоғыс кӧп полызығ пирҷең кін (МФЦ) пастыра апарылча. Пӱӱн хазна реестрінде, пічіктернең киречілеліп, шор национальностьтығ 600-че ле кізі cанға алыл парған. Арса, пу хабарны хығырып алған соонаң, позының шор национальнозын илееде кізі кӧзіт салар, – таныхтаан А.Н.Маргасова.
Хакасияда 2016 чылда Таштып паза Асхыс аймахтарында, чир-чайааннаң тузаланып, палыхтап паза аңнап чуртапчатхан ас саннығ чонға алынҷа чирлер кӧріл парған. Пӱӱн пістің регионда кибірліг чуртас апарып, чир-чайааннаң тузаланып, чыы чуртапчатхан шорлар чиріне тӧрт аал чӧбі саналча. Асхыс чирінде – Писхамҷыдағы поселок чӧбі паза Палыхтығ суғдағы аал чӧбі, Таштып аймаанда – Аңчулдағы паза Мадырдағы аал чӧптері.
Шорлар, хакастар чіли, От инені азырапчалар. Хам киртіністіг полып, суғ-тағ ээлерін улуғлапчатхан кибірлерге тудынчалар. Аймах культура мероприятиелерінде, ӱлӱкӱннерде, чир-чайаандағы кӱстерге пазырып, ол-пу кибірлернең чуртағҷыларны таныстырчалар.
Олар чылны Мылтых ӱлӱкӱннең таныхтап пастапчалар. Ол аңҷылар пайрамына саналча. Анаң Чыл пазын ӱлӱкӱннепчелер. Мал ӧскіреріне паза аал хониина чарыдылған национальнай ӱлӱкӱн Шор-пайрам адалчатттыр. Ідӧк республикада иртірілчеткен Тун пайрамда ӧткін араласчалар. Кӱскӱде Ас саннығ чоннар кӱнін таныхтапчалар.
Культура тоғызын уғаа тӱзімніг апарчатхан пірігістер аразында хайди даа таныхтирға кирек «Чылтыс» паза «Элим» пірігістерні. Пастағызы Мадырда іди матлама тоғын парча, аның устағҷызы – Наталья Алексеевна Шулбаева. Ікінҷізі Писхамҷы аалда орныхча, аннаң устапча Вера Николаевна Орешкова. Пу ікі пірігіс, регион синіндегі марығлардаң пасха, Хакасия ӱчӱн тиксі хазна синінде фестиваль-марығларда турысча. «Чылтыс» пірігіс саңай пос кӱзінең не іди маңнаныстығ тоғынча тіп таныхтаан «Шория» пірігістің кнезі. Олар, национальнай кип-азах тігіп, теелбектер тимнеп, шорларның ас-тамаан татхыннығ тимнеп алып, презентацияларын уғаа кӱстіг иртірчелер. «Элим» пірігіске, тізең, Шориядағы кізі уғаа маңат полысчаттыр. Андар удаа кил парча, пілістерінең ӱлезіп, ӱгрет турча, полызығ чох артыспинча.
– Мин алынҷа алғызымны читірерге cағынчам республиканың национальнай паза территориальнай политика министерствозына. Министрнің тоғызын толдырчатхан Лев Александрович Сафьянов піске кӧп полысча, тузалығ чӧптер пиріп хабасча. Ол – тирең пілістіг, оңдайынаң уғаа иптіг кізі. Ноо даа туста сығдыратсаң, хаҷан даа нандыр пирче, хайығ чох артыспинча. Чонға іди чахсы хайығ салчатхан ӱчӱн улуғ алғыс читірчем, – чылығ ӱндескен А.Н.Маргасова.
Республиканың халых организациязы кнезі полып, ӧткін ипчі пасха региондағыларнаң палғалыс тударға кӱстенче. Шорлар чуртапчатхан чирлерде кӧп кізінең нанҷылазарға кӱстенче, ағаа хоза пасха национальностьтығ регионнарнаң ынағласчалар, ол санда юргадағыларнаң, Сахалин олтырыхтағыларнаң. Опытнаң, пілістерінең ӱлесчеткеннернің санында Междуреченск городтағы шор тілі ӱгретчізі, тархыннаң айғасчатхан специалист Людмила Юрьевна Толтаеваны махтапча. Ол халых тоғызынаң 20 чыл азыра айғас парир тіп чоохтанған. Айра Николаевна позы пӱӱл часхыда Ханты-Мансийск городта ас саннығ чоннарның семинарында пол килген. Ӱс кӱн аразына позының опыдынаң ӱлескен, пасхазынаң наа нимелерге ӱгренген. Устағҷы республика организациязы ӱчӱн матлама турысхан. Андағы чуртағҷыларның амыр хылии, иптіг оңдайы ӱчӱн, аалҷыны чахсы удурлапчатханына морсынған.
Шорлар, тізең, аалҷыларны сыйлап, стол салып, хан, талған, абыртхы паза пасха даа чиис тимнеп алып сыйлапчалар. Шорлар пельменнері «пелбен» адалча, пирогтарны «перегештер» тіпчелер. «Арбычак» тоғылағастарны талғаннаң мӧӧт, ідӧк хузух поралап тимнепчелер.
Улуғ чидіге чидіп, чонда сабланчатхан шорлар аразында хайди даа Николай Сергеевич Уртегешевті адапчалар. Ол 2020 чылда филология наукаларының докторы полыбысхан. Ол Новосибирскте істенче, Россияның наукалар академиязының Сибирьдегі пӧлиинің филология институдында ӧӧн наука тоғынҷызы полча.
Cомнар А.Н.Маргасовани
(Хакасия правительствозы, национальнай паза территориальнай политика министерствозы хабазиинаң сығарылған)
Автор :
Инора Боргоякова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде