Матырлар ады ундудылбазын
03.07.2024
Хабарлар
Тойымдағы мемориал комплексі
Хумартхылас. Пу кӱннерде Шира аймаандағы Тойым аалда «Хумартхы» мемориал комплексі пайрамни азылған
Ол Илбек Ада чаа араласчыларына, чаа олғаннарына, тыл істенҷілеріне, ідӧк кічіг чаалазығларда паза ӧнетін чаа операциязында полған кізілерге чарыдылған.
Тойым аалдағы Культура туразының алнындағы ачыхта Тойымның паза хости ааллардағы чуртағҷылар чыылысханнар. Мындағы чонны танығлығ кӱннең алғыстирға килгеннер Хакасияның национальнай паза территориальнай политика министерствозының, Хакасияның Ӧӧркі Чӧбінің, Шира аймааның устағ-пастааның, Шира аймааның істеніс, чаа, Тирігліг кӱстернің паза право хайраллаҷаң органнарның кізілері, СВО ветераннары паза даа пасхазы.
Пастағы сӧсті алған Тойымдағы аал чӧбінің кнес тоғызын толдырчатхан Евгений Кулешов. Аның чооғынаң, пу пӱдіріг ӱс чылҷа парған. Грант ахчазына хоза орындағы чуртағҷылар полыс турғаннар. Амды хумартхы тас турғызыл парғанда, чуртастарын пир салған чир-суғҷыларын хумартхылап чахайахтар салҷаң орын пар. Мында Илбек Ада чаа ветераннары ла нимес, че ідӧк Афган, Чечен паза ӧнетін чаа операциязында араласханнарның ады-солалары пазыл парғаннар.
Хакасияның национальнай паза территориальнай политика министрінің тоғызын толдырчатхан Виталий Кунучаков позының чооғында Тойым аалның чуртағҷылары мындағ улуғ паза кирек тоғыстаң хыйа турбинчатханнарын таныхтаан. Пу мемориал ӧсчеткен тӧлні чир-сууна хынарға паза аны арачылирға ӱгретче. Анаң Виталий Георгиевич мемориал комплексін пӱдірерінде ӧткін араласхан кізілерге алғыстас пічіктерін читірген.
Чоохтирға кирек, 2024 чылда Шира аймаандағы Тойым аал чӧбі республика синінде иртчеткен муниципальнай пӱдістер аразындағы марығда позының проектінең ікінҷі орын алып алған. Ағаа республика бюджедінең 1,3 миллион cалковай сыйых ахчазы пирілген. Пӱдіріге ідӧк ахча хосханнар аймахтағы паза аал чӧбіндегі бюджеттер, спонсорлар. Тоғыстар, 2021 чылда пасталып, амды тоозылғаннар.
Мемориал комплексінде матыр чир-суғҷыларның ады-солалары аразында пар Совет Союзының Матыры, авиацияның генерал-лейтенанты Василий Тихонов. Ол Тойым аал чӧбіне кірчеткен Ӧлең аалда тӧреен нооза. Ідӧк ӧнетін чаа операциязында араласхан Виктор Тумановтың паза Николай Тачеевтің аттары пар.
Сом авторни
Автор :
Светлана Астанаева
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде