Хакас тілін ӱгренчеткен имҷі
03.07.2024
Статья
ХГУ-ның студенті Дамирбек Маматов
Абитуриент-2024. Н.Ф.Катановтың адынаң Хакас хазна университедінде 20 хандыхта приемнай кампания тоғынып пастабысхан. Филология паза искусстволар институдының хакас кафедразына пӱӱл асхынах нимес орын пирілче
Кафедра устағҷызы, филология наукаларының кандидады Инга Кызласованың искіриинең, пӱӱл хакас филология кафедразы бакалавриатха паза магистратураа чииттерні алча.
– Хакас хазна университеді пӱӱл бакалавриатха 23 тикке ӱгренҷең орын позытхан. Льготалығ 2 орын, кӧстегліг оңдайнаң ӱгренерге сағынчатханнарға 7 орын пар. Профильлері – «Хакас тілі паза литература. Орыс тілі». Чоохтирға кирек, халғанҷы туста кӧстегліг оңдайнаң ӱгренерге сағынчатханнарға орын асхынах нимес позыдылча, че андар кӧп кізі килбинче. Іди ӱгренчеткеннерге Хакасияның ӱгредіг паза наука министерствозы хоза стипендия тӧлепче, – чоохтапча Инга Людовиковна.
Магистратураның профильі – «Хакас тілі паза литература. Культура». Пӱӱл ағаа 13 орын пирілген.
– Піс сыбыра ікі профиль кирерге кӱстенчебіс. Анзы чииттерге ікі пасха кӧстегҷе тоғынарға оңдай пирче. Ағаа хоза, школаларда хайдағ даа предметтең ӱгретчілер чидіспинче тирге чарир. Піс ирткен чылларда тархын ӱгретчілерін илееде тимнеп салғабыс, соонаң англия тіліне кірібіскебіс. Ам хакас тілінең хада орыс тілі специалисттерін тимнепчебіс. Килчеткен чылларда, арса, алызығлар кирербіс. Піс республиканың ӱгредіг министерствозынаң, ӱгредіг организацияларынаң хада-пірге тоғыс апарчабыс, оларнаң чӧптесчебіс.
Амғы туста іcкеркі тіллер чахсы тиліпче – корея, хыдат тіллері. Піс оларны кирерге сағыс тутчабызох, че олох туста чочынчабыс – пістің хакас тілібіс тилібин сығар. Аннаңар піс кафедрада, хакас тілі курстары чіли, пу тіллерҷе андағох курс азарға сағыс тутчабыс, – пӧгіннерінең ӱлесче кафедра устағҷызы.
Студент полыбысхан чииттерні ӱгредігдең пасха, ахча сурии сағыссыратча. Пастағы курсха кіріп алғаннарға пастағы чарым чыл академическай стипендия тӧлелче. Аны прайзы алча. Аның сині ортымахти 3 муң салковайға тиңнелче. Соонаң сессияны хайди тудыбысханынаң палғалыстығ полар. Экзаменде «4», «5» паалағлар алзалар, аннаң андар стипендия тӧлелче, че уйан піліс кӧзіт пирзелер – ахча чох халарлар. Магистранттарның андағох. Чуға чуртапчатхан сӧбірелер палаларының социальнай стипендия алар праволары пар. Аны пічіктернең киречілеп пирерге киректелер.
Общежитиенең амды сурығ турбинча. Прайзына орын читче. Амды олар комнатада пірер-ікілер ле кізінең чуртапчалар.
Хакас филология кафедразынзар хаҷаннаң аймах нациялығ паза улуғ частығ кізілер ӱгренерге кірчелер. Ирткен чылда магистратурада ідӧк чапсых студент ӱгреніп пастаан.
Дамирбек Кенешбаевич Маматов 1975 чылда тӧреен. Хакасияда пір чыл чуртап парир. Ол, республиказар киліп, Ағбандағы имнег туразының хирургия пӧлиинзер тоғынарға кірген. Олох туста Минсуғ городтағы, Сус поселоктағы, Харатас городтағы паза Орджоникидзе аймаандағы Копьевтағы имнег тураларында хоза істеннерге маңнанча. Итсе, халғанҷы орыннаң ӱр ниместе саназыбысты. Аның пис имнег специальнозы пар: хирург, травматолог, проктолог, рентгенолог, уролог, узист, эндоскопист. Имнег киреене ол Бишкекте ӱгренген, ординатураны Саратовта тоосхан. Соонаң Москвада ӱгредиин узаратхан, анаң Рязаньда. Ідӧк Алма-Атадағы тархын институдынзар ӱгренерге кірген, че аны тоозарға киліспеен, Хакасиязар килібіскен. Таныхтирға кирек, ідӧк ол аймах тӱрк тіллерін пілче: казах, хырғыc, татар, башкир, кыпчак, каракалпак, узбек, туркмен, турк. Амды, тізең, тыс пілбес имҷі хакас тілін ӱгренче.
Москвадағы улуғ имнег учреждениезін артыс салып, пылтыр Хакасиязар ӧнетін тіл ӱгренерге килген. Аспирантураа кірерге пӧгінген. Че аның филология кӧстеенҷе профессиональнай ӱгредии чох полғаннаңар, ХГУ-ның хакас кафедразының устағҷызы Инга Кызласова ағаа пастап магистратураны тоозып аларға чӧп пирген.
Ирткен чылда пастағы курстың студенті полыбысхан.
– Хада ӱгренчеткеннерім пастап минзер ӱрӱгіснең кӧрҷеңнер. Пу улуғ частығ паза хакас нимес кізі ниме мында итче тіп сағынған полбастар ба. Кураторыбыс мині, пу имҷі, Москвадаң Хакасиязар киліп, хакас тілін, культуразын істезерге тимненче тіп таныстырған. Пастағы сессияны «4», «5» паалағларға тудыбысхам. Ниик полбаан, кӧп тимненерге киліскен. Тоғыс соонаң харааларда учебниктер хығыр турғам, Николай Доможаковтың адынаң национальнай библиотеказар, ХакНИИЯЛИ-ның паза ХГУ-ның библиотекаларынзар кӧп чӧрчеткем, хада ӱгренчеткен арғыстарымзар, ӱгретчілерімзер полызығ сурап удаа айланчатхам.
Тіл ӱгренерінде мағаа «Хакас чирі» газетада сыхчатхан хабарлар чахсы полысчалар. ХГУ-ның хакас кафедразының ӱгретчілері газетаа пазынчалар, олар аны хығырып алзалар, сурап алчам. Пастағы страницадаң халғанҷызына теере хығыр салчам. Амды позым ағаа пазын саларға сағынчам. Газетаны неделя сай имнег учреждениезінзер ағылчаттырлар. Анда алып ал турарбын.
Туғаннарымнаңар чоохтаза, мин университетсер кіріп алғанымда, хакас тілін ӱгрен сыхханда ла оларға чоохтаам. Піс сӧбіреде сигіс харындас-пиҷебіс. Оларның хайзы-да хатхыр ла салған, кем-де, минің тӱрктерні істезерге хынчатханымны піле, пір дее ӱрӱкпеен. Орта итчезің тіп чоохтан салған, – сағысха кирче студент.
Анда-мында тоғынарға, олох туста ӱгренерге сидік нимес пе тіп сурғанымда, ол мин кӧнік парғам, Москвада ӱр чуртаам нооза тіп нандырған. Дамирбек хонғанынаң хада ӱс пала ӧскір салған. Пірдеезіне ол имҷі поларға чаратпаан. Сидік тоғыс тіпче ол, сыбыра ӱгренерге, пілісті тилідерге кирек. Хыстары, аймах хазналарда чуртап, тоғынчалар, палаларын ӧскірчелер.
Дамирбек Хыдаттың іскеркі саринда чуртапчатхан тӱрктерні істезерге тимненче. Аның ӱчӱн андар парарға сағыс тутча. Магистратура соонаң ол аспирантуразар хайди даа кірербін тіпче. Ідӧк Хакасияның национальнай паза территориальнай политика министерствозы республикада чуртапчатхан хакас нимес чоннар аразында иртірчеткен тіл мариинда кӱзін сынап кӧрерге сағынча.
Пу кӱннерде ідӧк ортын профессиональнай ӱгредіг организацияларында приемнай кампаниялар тоғынчалар. Хайди искірче Хакасияның ӱгредіг паза наука министерствозы, 2024-2025 ӱгредіг чылына республиканың колледж-техникумнарында 2765 бюджет орны кӧріл парған: 875 – профессияларға, 1890 – специальностьтарға. Приемнай кампаниялар ӧӧнінде 15 орғахха теере тоғынарлар, че хай піреезі абитуриенттердең пічіктерні аларын аннаң даа ирте тоозар.
Ідӧк Хакасияда «Профессионалитет» проекттің ӱгредіг программаларынҷа приемнай кампаниялар парча. Абитуриенттерге «Ӱгредіг» кӧстеенҷе читі программа азылған. Н.Ф.Катановтың адынаң Хакас хазна университеді паза Харатастағы отрасльлар техногиялары техникумы «Школа алнындағы ӱгредіг» кӧстегҷе сурыныс пічіктерін алча, Аал хонии техникумы, Харатастағы отрасльлар технологиялары техникумы паза Саяногорсктағы политехническай техникум – «Пасталығ класстар ӱгретчізі» кӧстегҷе, Харатастағы отрасльлары технологиялары – «Специальное дошкольное образование», «Коррекционная педагогика в начальном образовании», Олимп резерві училищезі – «Адаптивная физическая культура», «Спорт», Хакасияның кӧп профильліг техникумы паза Олимп резерві училищезі – «Физическая культура».
Пу ӱгредіг программаларынҷа чииттердең сурыныс пічіктері 15 орғахха теере алылар. «Профессионалитет» федеральнай проект хазнада тоғысчы профессиялар чидіспинчеткен сурығны пӧгеріне кӧстегліг.
Сом Альбина Чистогашевани
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде