Хазнабыстың иң улуғ кӧзiдии тоғызын тоосты
10.07.2024
Хабарлар
«Россия» кӧзiдiг тоғызын килкiм пайрамнаң тоосхан
Поғдархас. От айының 6-ҷы кӱнiнде ВДНХ-дағы «Россия» кӧзiдiг чабылчатханына чарыдылған «Россия пiр дее чирде тоозылбинча» пайрам ирткен
Ирткен чылда кiчiг хырлас айының 4-ҷi кӱнiнде, Чоннар пiрiкчеткен кӱнде, Москвада «Россия» чоннар аразындағы кӧзiдiг-форум азылған. ВДНХ-да 200 муң азыра квадраттығ метр орында хазнабыстың прай 89 субъектiнең танызып аларға чарир полған. Iдӧк анда федеральнай министерстволар, корпорациялар паза халых организациялары ӧткiн тоғыс апарғаннар.
«Россия» кӧзiдiг-форумның ӧӧн пӧгiнi – тиксi хазнабыстың аймах-пасха кӧстеглерiнҷе чидiглерiн пiр орында чыып, чуртағҷыларны паза аалҷыларны амғы тустағы Россиянаң таныстырары. Че таңдағы кӱннеңер сағынып, кибiрлернi ундутпасха кирек. Кӧзiдiгде оларны хайраллирға кирек полчатханына кӧп хайығ айландырылған. Аннаңар анда пасха-пасха чоннарға тӧреен чир-суу полчатхан хазнаның тархынынаң танызарға полысчатхан аймах наа турист маршруттарынаңар чоохталған.
Кӧзiдiг-форум тоғынған тусха анда 18 миллион азыра кiзi пол килген, 17 муң азыра культура, спорт, ӱгредiг паза пасха даа мероприятиелер иртiрiлген. Анда ӱлгӱдегiлернiң, корпорациялар устағҷыларының, бизнес кiзiлерiнiң тоғазығлары, аймах фестивальлар, семинарлар, лекциялар, квесттер ирткеннер – прайзын адап полбассың даа, чайаачы ӧмелер концерттерiнең тӧремiл ӧрiндiр турғаннар.
Россияда пӱӱл Сӧбiре чылы чарлалған. Пу темаа кӧзiдiг-форумның прай даа мероприятиелерi чарыдылған. Че иң танығлығларның пiрсi – хазнабыстың 79 регионынаң килген чииттернiң хоных хон салғаннары. Сiлкер айында анда пiр саңай 151 сӧбiре тӧстелген, республикабыстаң парған Тарина паза Сабир Боргояковтар сӧбiрезiнiң тархыны анда пасталған.
Хакасия 75-ҷi павильонда орныххан. Кӧзiдiге хакас чонның чуртын таныхтапчатхан пӱдiрiглер тимнелген. Оларның пiрсiнде виртуальнай хам чуртаста полар алызығлардаңар чоохтап пирчеткен, пасхазында республиканың тархынынаң, хумартхыларынаң, чазыттарынаң, чидiглерiнең танызарға чарир полған.
Кӧзiдiг-форум чабылчатханына чарыдылған улуғ пайрамда кӧрiгҷiлернi чайаачыларынаң ӧрiндiргеннер: SHAMAN, Олег Газманов, Пелагея, OTҢKӰN ӧме, GҒRҒDӰ паза пасхазы даа.
ВДНХ-дағы «Россия» чоннар аразындағы кӧзiдiг-форум халғанҷызын от айының 8-ҷi кӱнiнде тоғынған. Россия президентi Владимир Путиннiң чарадиинаң кӧзiдiгнiң ис-пайын хайраллир национальнай кiн тӧстелер. Аның наа кӧрiмi «Экспоцентрде» азылар.
Сом интернеттең алылған
Автор :
Тимнеен Татьяна Кыштымова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 31 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
