Спортнаң айғазарғахынчатханнарның марии
10.07.2024
Хабарлар
Хубачардағы имнег туразының ӧмезi
Спартакиада. Хакасиядағы имнег киреенең айғасчатхан чон ирткен неделяда Ағбанда «Локомотив» стадионда кӱзін спорт марығларында сынаан
Республиканың имнег тоғынҷыларының кибірi хоостыра чыл сай иртірілчеткен cпартакиадазы – ӱлӱкӱн чіли иртірілчеткен улуғ мероприятие. Че мындағ пайрамға имҷiлер, фельдшерлер, медсестралар постарының кӱзін спорттың аймах кӧрiмнерінде сынир ӱчӱн чыылысчалар. Ағбанда олар чыл сай «Локомотив» стадионда марығласчалар. Пӱӱл оларның спартакиадазы 21-ҷi хати иртірілді, ол Хакасияның хазых хайраллирының 100 чылына чарыдылған.
Спартакиадада республикадағы аймах-пасха имнег организацияларынаң тиксі 18 команда араласхан. Олар – Алтай, Ағбан пилтiрі, Таштып, Пии, Шира, Орджоникидзе аймахтардағы имнег тураларындағы ӧмелер, iдӧк – республиканың ӧӧн имнег туразындағылар, офтальмология имнег туразының, онкология паза наркология диспансерінiң, Ағбандағы табырах имнег полызии службазының паза городтың имнег туразының, Харатастағы ӧӧн паза олған имнег тураларының ӧмелері паза аннаң даа пасхазы.
Спартакиаданың пайрамнығ чардығында ӧмелер, стройнаң турып, стадионның чӱгӱрҷең чолынҷа соон сӱрістіре ирткеннер. Хайзы-да ӧмеде алнында парчатхан кізiлер постарының имнег организациязының тании хоостал парған плакат алай транспаранттар холда тутханнар. Чоохтирға кирек, полған на команданың спорт кип-азаа пасхазынинаң пасхалалған. Пір ӧме хызыл футболка паза кепка кизiп чазанған полза, ікінҷiзiнің спорт кип-азаа ноған ӧңніг, пӧріктерi сарығ ӧңніг полған, ӱзінҷiзiнде кӧк ӧңніг кип-азахты таллап алтырлар. Стадиондағы хурчи чолҷа стройнаң иртчеткен командалар анзынаң уғаа чазағлығ кӧрімніг пілдіргеннер, спорт чазызында аймах ӧңніг порчолар чайхалысчатхан осхас пілдірген. Анаң олар кӧрігҷілер одырчатхан кидеркі трибуна хыринда тохтааннар.
Пу улуғ спорт пайрамын азып, оларны алғыстааннар Хакасияның хазых хайраллаҷаң министрінің тоғызын толдырчатхан Наталья Аверина, республиканың профсоюзтар федерациязының кнезі Евгения Ольховская, Россиядағы хазых хайраллиры тоғынҷылары профсоюзының республикадағы организациязының кнезi Татьяна Рыбаченко.
– Хазых хайраллаҷаң тоғынҷыларның спартакиадазы – уғаа чарых спорт ӱлӱкӱні, хайзы прай имнег тоғынҷыларының кӧңнiне кірче. Мындағ марығлар полызиинаң піс физкультуранаң, спортнаң ӧткін айғасханы паза хазых чуртасха тудынғаны туза полча тіп кӧзiт полчабыс. Паза имнег тоғынҷыларына постары істенчеткен ӧмелерде улам ынағ тудынарға полысчатхан мероприятие полча. Пӱӱн иң не кӱстіг команда чиңic тутсын тіп алғапчам. Итсе-де, чиңic ле ӧӧні нимес, че марығда араласханы – иң не ӧӧн ниме. Прай араласчыларға талааннығ поларға алғапчам, – чоох тудып, таныхтаан Наталья Аверина.
Чоох тутхан кізілер араласчыларға чиңic тударға, спорт ойын-марығлар хынығ иртсін, андағ ізіг кӱнде, пірдеезі пиртінмезiн, часкалығ кӧңніліг ползыннар тіп алғааннар. Спартакиаданың ӧӧн спорт чарғыҷызы Николай Свириденко, марығлар регламентінең таныстырып, чооғында таныхтаан:
– Чир ӱстӱнде иң не аарлалчатхан паза иң не кирек полчатхан профессиялығ кізілер сiрер, имҷілер, полчазар. Сірер кізілернің чуртазын ал халчазар.
Имнег тоғынҷылары спартакиадада прай 9 спорт кӧрімінҷе марығласханнар. Арға-мӧрій спорт эстафетазынаң пасталған. Чапчаң чӱгӱрерінҷе пір саңай ӱзер команда аралас турған. Командадағы пастағы араласчы, позының этабын чапчаң чӱгӱрібізіп, эстафета ағазаан iкiнҷізіне читір пирче, ӱзінҷізi – тӧртінҷізіне, пизінҷізі азах меетсер прай кӱзін салып маңзырапча. Трибунада турып, оларның марығласчатханын кӧр турзаң, полған на араласчы махалығ табырах чӱгӱрче тiп сағынчазың. Че спорт чарғыҷылары оларның узын саңай пасха иде паалапчалар: команда эстафетаны нинҷе минута-секунда аразына чӱгӱрібіскен. Мында пӧзік салтарға Ағбандағы имнег туразының командазы читкен, ол эстафетаны 59.03 секунда аразына чӱгӱрiбістір. Iкiнҷi орында гигиена паза эпидемиология кініндегiлер полыбысханнар, ӱзiнҷізінде – Ағбандағы табырах имнег полызии службазындағылар.
Анаң, эстафета соонаң, ӧӧн марығлас пір саңай футболҷа, волейболҷа, баскетболҷа, узунға сегірерінҷе, турникте холнаң тартынарынҷа, шахматча, скакалканаң сегiрерінҷе паза дартсча апарылған. Нинҷе-нинҷе cпорт ачығы пiр саңай тоғынған. Кӧзідімге, тӧрт футбол чазызында пiр саңай 8 команда ойыннарда араласхан, ікі волейбол площадказында пiр саңай тӧрт ӧме улуғ суулаахта марығлас турған. Стадионның ӱстӱнзархы саринда ырах сегiр полчатханнар кӱзін сынааннар, олох арада тастыхти арах турғызылған турникте иреннер холнаң тартынғаннар. Скакалканаң сегірчеткен араласчылар, кӧлектіг орында турып, марығлас сыхханнар. Ӧмедегі ӱc-тӧрт кізее, соон сӱрiстiре турып алып, пилiнең удур-тӧдiр айлан салып, скакалкаға пір дее харлыхпин сегiрерге киректелген. Узун скакалканы ікі пазынаң iкi кізі ибір турған. Ол-пу марығны кӧріп, сынында мында спортсменнер нимес, че чонны имнепчеткен кізілер піди чапчаң тудынчалар, футбол-волейбол махалығ ойнапчалар тіп піреезіне чоохтазаң, киртiнместер дее.
Харатастағы олған имнег туразының ӧмезi скакалка сегiрiп марығласчалар
– Кӧріңердек , хыстар! Пістің марығлар сынап таа хынығ иртчелер йа, – піссер кӧріп, кӱлiмзіреп ала чоохтанған хости турчатхан ипчі. Сарығ футболка паза ах бейсболка кис салтыр паза хара очкиліг. Ол Татьяна Рыбаченко полған.
– Пу спартакиаданың тӧстегҷiзi паза спонсоры пiстің организация полча – имнег тоғынҷылары профсоюзының республикадағы организациязы. Кибір хоостыра спартакиада Имнег тоғынҷызы кӱніне чарыдылып иртiрiлче, пӱӱл, тізең, ол Хакасияның хазых хайраллирының 100 чылына чарыдылча. Имнег тоғынҷылары мында хынып араласчалар. Пу чыл мероприятиенi хандых айында наңмырлығ кӱннер сылтаанда, тузында иртiр полбин, от айынзар чылдырарға килic парған. Ам талаан полды, марығларға удур ап-айас кӱннер турча. Спорт кӧрiмнерінең пасха, пӱӱн арғамҷы тартызып кӱзiн сынирлар. Пу – спартакиада санына кірбинчеткен марығ. Анда алынҷа сыйых кӧріл парған. Ӧӧн сыйых – ахчалығ сыйых. Пiс, профсоюз организациядағылар, 30 муң салковайны иң чахсы профсоюз командазына читiрерге пӧгiнчебiс. Командада профсоюзха кiріп алған прай нинҷе кізi араласчатханын хайди даа санға аларбыс. Піске спартакиаданы иртiрерге полысчалар Хакасияның хазых хайраллаҷаң паза спорт министерстволары, республиканың пiрiктiрілген командаларын спорт саринаң тимнепчеткен кін. Пӱӱн спартакиада араласчыларының узын спорт чарғыҷыларының 19 командазы паалапча. Олаңай чоохтаза, профессиональнай спортсменнер чарғыҷы полчалар, – чоохтаан Татьяна Ильинична.
Піс аннаң чоохтасчатхан арада дартсча марығда имнег учреждениелерiнің устағҷылары, профсоюз организацияларының кнестері араласханнар. Анда иң не халғанҷызынзар теес читкен Ағбандағы табырах имнег полызии службазына. Аның устағҷызы, ӧӧн имҷі Айвар Кольчиков дротиктернi таңмазар тастап сыхханда, чарғыҷы аны ӱр нимеске тохтатхан.
– Тохта! Сағам дротик тастабин турдах! Хайхастығ даа, пӱӱн 10 саннығ таңмаа Сірер ле пастағызын теерте тастап алдар. Айдас! – чоохтанып ала, чарғыҷы Айвар Николаевичті, хол тудып, махтаан.
Аннаң андар команда капитаны Айвар Кольчиков дротиктерні 8-9 саннығ таңмаларзар хап-орта хазап турған. Iди чичең хази тастапчатхан ӱчӱн пазох ла махтағлығ cӧстер ағаа чоохталған.
Айвар Кольчиков дартсты хази тастапчатхан туста
– Мин позым спартакиадада 2009 чылдаң сығара араласчам. Андада Хубачардағы имнег туразында icтенчеткем. Табырах имнег полызии службазында 2020 чылдаң тоғын парирбын. Пістің ӧме 2022 чылда спартакиаданың чиңicчізі полыбысхан. Пылтыр иң кӱстіг пастағы пис команда санына кiріп алғабыс. Итсе-де, піске иң ӧӧнi – марығда араласханы. Имнег тоғынҷыларына, пос аразында ла чоох алыспин, пасха организациядағыларнаң танызып алар оңдай пар. Санапчам, спортнаң прайзына айғазарға кирек, пӱӱн имҷiлер пасхазына чахсы кӧзiдiм полчалар. Кізінің хазии арығ киинең тынғанынаң, чахсы чіҷең нименең не сылтағлығ полбинча нооза. Iдӧк физкультуранаң, спортнаң айғазарға кирек. Кӧзідімге, чӱгӱр чӧрерге, футбол ойнирға, кӧңніне кiрчеткен спорт кӧрiмінең айғазарға. Чоохтирға кирек, пicтің командада 33 кiзi араласча, оларның кӧбізі имҷілер, – сағызынаң ӱлезіп, чоохха хозылған ӧӧн имҷі.
Республиканың ӧӧн имнег туразының ӧмезі пылтыр спартакиадада пастағы орынға турысхан. Пу чыл ӧме пазох ӧӧнінде имҷiлердең, ол санда хирургтардаң, травматологтардаң, терапевттердең паза пасха даа специалисттердең тӧcтелген. Оларнаң, капитан полып, устаан айти-службаның пастығы Вадим Казаков. Ағаа ӧменең устирға полыс турған терапевт-стоматолог Вера Барашкова. Ол республиканың имнег туразындағы профсоюз организациязының кнезі полча. Хайди ол теен, спартакиадаа ӧмені тимнирге сидiк полбаан. Пасха саринаң сидікciніс поладыр: имҷiлер тоғыста уғаа маң чохтанчалар, спартакиадада аралазар ӱчӱн оларға маң тус табарға кирек нооза. Аннаңар пу марығларға прайзы ла килгелек полтыр, кӧзідімге, хайзы-да хирург иртен операция идібіскен соонаң на пеер чиде салар. Марығларда аралазарға маңнанарлар тіп ізендірген. Вера Петровна пу имнег туразында 30 азыра чыл, имҷi полып, істен парир. Анда істенчеткен 1300 тоғынҷының чарымы – профсоюзха кiріп алған кізілер.
Таштыптағыларнаң, тізең, марығларда устаан аймахтағы ӧӧн имнег туразының ӧӧн медсестразы Татьяна Доронина. Команда араласчыларының саны – 30 кізі. Оларның ӧмезi спартакиадада чыл сай ӧткін араласчаттыр.
– Пылтыр пiстің алынҷа спорт кӧрімнерінҷе чахсы салтар полған. Арғамҷы тартызарынҷа марығда пастағы орынға турысхабыс, дартсча – ікінҷі орынға. Пӱӱл пic шахматта ойнап полбаабыс. Ноғадаңар? Шахмат чахсы ойнапчатхан имҷі паза фельдшер кил полбаан. Марығларда ам ӧмедегілерге полысча имҷі-патологоанатом Михаил Ултургашев паза аның санитары, юрист Игорь Бабийчук паза пасхазы даа, – теен Татьяна Владиславовна, марығларда уғаа маң чохтанза даа.
Спартакиаданың салтарлары иділгенде, чиңicчiлер адалғаннар. Пастағы орынны Ағбандағы имнег туразы холға кирген. Iкiнҷi орынға турысхан Ағбандағы табырах имнег полызии станциязы. Ӱзiнҷi орынға республиканың гигиена паза эпидемиология кіні сығып алған.
Сомнар Альбина Чистогашевани паза Лариса Бакановани
Автор :
Инора Боргоякова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
