Улуғлазып паза пiлiзiп чуртааны – часканың ӧӧнi
10.07.2024
Хабарлар
Александр Алексеевич паза Людмила Ивановна Чебодаевтер «Алтын хоныхтығ» номинация араласчылары
2024 чыл – Сӧбiре чылы. С.П.Кадышевтiң адынаң чон чайаачызының национальнай кiнi алнындағы ачыхта «Ромашка» чайаачы сӧбiрелернің республикадағы II фестивальы ирткен
Пiстiң хазнада от айының 8-ҷi кӱнiнде Сӧбiре, кӧӧленiс паза киртiнiс кӱнi таныхталча. Тигiриб кибiрi хоостыра пу кӱнде ах чарых ирепчi Пётрнаң Феврония Муромскийлернi сағысха кирiп аарлапчалар. Оларны хаҷаннаң сӧбiрелернiң паза хоных хончатханнарның арачылағҷыларына санапчалар. Аннаңар пу кӱнде иң пурун хоных хон салған кiзiлернi алғыстапчабыс, оларға часка паза амыр чуртас алғапчабыс.
Пӱӱл республикада ӱлӱкӱннi С.П.Кадышевтiң адынаң чон чайаачызының национальнай кіні алнындағы ачыхта иртiргеннер. Араласчыларның паза кӧрiгҷiлернiң ӧрiнiзiне, айас паза чахсы кӱн тур пирген. Хакасияның культура министрi Светлана Окольникова, фестивальны азып, чылығ алғыстас сӧстерiн читiрген. Пеер Хакасияның аймах-городтарынаң араласчылар чыылғаннар. Тиксі – 19 сӧбіре. Олар постарының чидiглерiн, чайаачыларын паза кибiрлерiн «Чиит сӧбiре», «Кӧп палалығ сӧбiре», «Чайаачы сӧбiре», «Спортнаң айғасчатхан сӧбiре», «Кӱмӱс хоныхтығ», «Алтын хоныхтығ» паза «Сӧбiре династиязы» номинацияларҷа турыстығ кӧзiткеннер. Фестиваль араласчыларын, оларның ӱчӱн «ағырарға» килгеннернi паза олаңай кӧрiгҷiлернi С.П.Кадышевтiң адынаң чон чайаачызы кiнiнiң ӧмелерi концерт турғызып ӧрiндiргеннер: аймах теелбектер салғаннар, сарыннар толдырғаннар паза даа пасха чайаачы номерлер кӧзiткеннер. Iдӧк фестивальны апарған устар кiчiг олғаннарнаң «Остров сокровищ» ойын ойнааннар. Аннаң пасха, чыылған кiзiлерге кӧзiдiглер тимнел парған паза Хакасияның чайаачыларының мастер-класстары иртiрiлгеннер, хайда полған на кiзее ағаста паза гипсте хоостир оңдай пирiлген. Паза нинчідең чазанҷыхтар, пряжадаң кӧклӧлер чайирға паза даа пасха чапсых тоғыстарнаң айғазарға чарир полған. Фестиваль алғым паза хынығ ирткен, полған на кiзi позының кӧңнiне килiстiре ӱтертініс тапхан.
Республиканың турыстығ сӧбiрелерiнiң аразында Александр Алексеевич паза Людмила Ивановна Чебодаевтер полғаннар. Ирепчi «Алтын хоныхтығ» номинацияда араласхан. Пӱӱл олар от айында хоныхта пiлiзiп, ынағлазып 50 чыл чуртапчатханын таныхтапчалар. Постарынаңар хысхаҷахти чоохтап пиргеннер.
– Мин Хызылчардағы ӧңнiг металлар институдында ӱгренчеткенде, Людмиланаң хоных хонғабыс. Итсе, пiс тоғыс класстаң сығара таныспыс, чуртас iди салыл парған, пiстiң кӧӧленiс тӧреен cтудент тузында. 1974 чылда пiс хон салғабыс. Пӱӱл чуртап салғаннаң 50 чыл полча. Сизiнмин дее халчазың, хайди чыллар ирт парғаннар. Ол син тус хада чуртап, пiстiң хынызыбыс паза паарсазыбыс уламох тыыпча тирге чарир, – теен Александр Чебодаев.
Ирепчi хоныхта iкi пала ӧскiр салған, амды пархаларын ӧскiрерге полысчалар. Фестивальда хайди аралазарға сағыныбысханнаңар чоохтабох пиргеннер.
– Александрнаң 50 чыл хада чуртап салғаннаңар пiчiктернi, тимнеп, палаларыбыс ЗАГС-сар пир салғаннар. Амды пiстi хонғанымнаң аймах мероприятиелерге хығырчалар, пiс чӧрчебiс. (Кӱлiмзiрепче. – Авт.) Пӱӱнгi фестивальға видео суурғабыс, аны кӧзiткебiс. Мындағ фестивальда пастағызын на араласчабыс, чапсых пiлдiрче, кӧңнiбiске кiрче, – сағыстарынаң ӱлескен Людмила Чебодаева.
Фестивальда араласхан сӧбiрелер прайзы даа турыстығлар – хайзы, палаларын ӧскiрiп, халых чуртаста ӧткiн араласча, хайзы сӧбiре тӧлдең тӧлге пiр кирекнең айғасча, хайзы чайаачы кирекнең алай спортнаң айғасча. Пiр сӧснең чоохтаза, прайзы даа махтаға турысча паза иң артыхтарның санына кiрче тирге чарир. Пу фестивальда араласханнар санына iдӧк Таштып аалда чурттығ Олеся паза Александр Адыгаевтер кiрчелер. Ирепчi 1999 чылда от айының 2-ҷі кӱнiнде хоных хонған. Пӱӱл хоныхта ынағлазып, пiлiзiп 25 чыл чуртап париғанын таныхтапчалар. Олеся Викторовна Таштып аймааның устағ-пастаанда бухгалтерия пӧлиинде ӧӧн специалист полып iстенче. Александр Владленович аймахтағы имнег туразында водитель полча. Сӧбiрелерiнеңер паза хайди фестивальда аралазарға чарат салғаннаңар хысхаҷахти чоохтап пиргеннер.
Александр паза Олеся Адыгаевтер
– Таштып аймааның устағ-пастаа паза ЗАГС тоғынҷылары фестивальда араласчаң сӧбiрелернi таллааннар. Чыылығ 2 июльда ирткен. Пiстiң ол кӱнде тойыбыстың пайрамнығ чылы таныхталған. Аннаңар фестивальда Таштып аймааның ӱчӱн пiстiң сӧбiребiс турызар тiп чарат салғаннар. Пiс «Кӱмӱс хоныхтығ» номинацияда араласчабыс. Тӧрт пала ӧскiрчебiс. Тун хызыбыс Анна, ағаа 24 час, Кемеров облазындағы Белов городта ӱгретчi полып iстенче. Владлен оолғыбыс полицияда тоғынча, кинолог полча. Елизавета 11 классха сыхты, иң кiчии Сергей – тӧртiнҷi классха, – чарытхан Олеся Адыгаева.
Адыгаевтер сӧбiрезi ӱӱҷік тамаан салчалар, чайғызын ынағ ӧменең анда хайынчалар. Олеся Викторовна аймах чахайахтар ӧскiрерінең айғасча. Хайди ол таныхтаан, чахайахтар ӧскірерге кӧңнiне кiрче. Iдӧк cӧбiренең республиканың танығлығ орыннарынҷа чорыхтарға чӧрерге хынчалар. Чайғы iзiг кӱннерiнде кӧллерзер, арығзар палаларынаң чӧрчелер. Анна хыстары Кемеров облазында чуртапчатханда, андар пар килчелер. Орғах айында Новосибирсксер пар килерге пӧгiнчелер.
– Сiрер 25 чыл хада чуртап парирзар, хоных наа ла хончатхан чииттерге хайди ынағлазып, пiлiзiп чуртирдаңар чазыттарыңнаң ӱлес пирерҷіксер.
– Сӧбiреде ӧӧнi – ирепчi улуғлазып чуртиры. Хаҷан даа пiр чӧптiг тудынып, пiлiзерге. Чӧптес полбинчатса, сӧбiреңерде ынағлас паза пiлiзіс полбас. Паза иң ӧӧнi – ирепчi аразында хыныс поларға кирек, ол чох часкалығ чуртас полбас, – теен Олеся Адыгаева.
Прай сӧбiрелер презентацияларын кӧзiткен соонаң, оларға дипломнар паза ахчалығ сыйыхтар читiрiлгеннер. Полған на сӧбiренi алғыстап таныхтаан соонаң прайзы сомға суурынып алған.
Мындағ фестивальлар иртiрiлчеткенi уғаа чахсы. Хакасияның прай пулуңнарынаң чыылысхан сӧбiрелер, танызып, чоох алысчалар, постарының чайаачыларынаң паза кӧңнiне кiрчеткен киректерiнең ӱлесчелер, постарын туртухпин тудынарға ӱгренчелер.
Сомнар Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 31 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
