Хакас тiлiнҷе наа специалисттер
12.07.2024
Хабарлар
Хакас кафедразының магистратуразын тоосханнар дипломнар алдылар
Пӧзiк ӱгредiг. Пу неделяда Хакас хазна университедiнiң филология паза искусстволар институдын тоосчатхан чииттер дипломнар алғаннар. Хакас филология кафедразын пӱӱл 15 бакалавр паза 14 магистр тоосты
Киҷеегi студенттер дипломнарын институт директоры Ольга Колесникованың холынаң алғаннар. Таныхтирға кирек, «Хакас тiлi паза литература. Англия тiлi» кӧстегҷе 5 бакалавр хызыл диплом алған. Магистратурада «Хакас тiлi, литература, культура» кӧстегҷе ӱгренгеннернiң алтызы хызыл дипломға тоосхан.
Хызыл дипломнар алғаннар санында Есения Токоякова паза Татьяна Майнагашева полғаннар. Есения Таштып аймааның Пыдырах аалынаң. Школа тоосхан соонаң специальность таллирынаңар сурығ турыбысханда, ол iкiнҷiлебин хакас тiлi ӱгретчiзiне ӱгренерге парарға чарадығ алған. Чиит хысты тӧреен тiлi чiтчеткенi сағыссыратча, аннаңар ол аны хайраллирына паза тилiдерiне позының хозымын идерге сағынған. Ӱгренiс тее ағаа аар пiлдiрбеен. Хынған кирекнең айғасчатсаң, сидiк пiлдiрбинче тiпче ол. Хакас кафедразының ӱгретчiлерi дее Есенияны кӱстенҷiк, пӧзiк пiлiстiг студент тiп уғаа махтапчалар. Ӱгренчеткен туста ол iдӧк чатханға хынчатханнарның клубынзар чӧрген. Бакалавр дипломын алып алған соонаң, чиит хыс специальнозы хоостыра тоғысха кiрерге паза ӱгредиин узарадарға пӧгiнче.
Есения Токоякова ИФИ директоры Ольга Колесникованаң хада
Татьяна Майнагашева Асхыс аймааның Сарығлар аалынаң. Бакалавр адын алған хыс пастап ӱгретчi чолын таллирға сағынминчатхан. Че тӧреен тiлiне хынызы аны хакас кафедразынзар ағылған. Татьяна ибде хакас тiлiнең чоохтасчабыс, аннаңар тiлнi чахсы пiлчем тiп чоохтапча. Ол, школада ӱгренчеткенде, хакас тiлi олимпиадаларында ӧткiн араласчаң, институтсар кiргенде, аймах конференцияларда аралас турған. Чиит хыс хызыл диплом алғанына уғаа ӧрiнче, мындағ пӧзiк чидiге чидерге полысханнары ӱчӱн ол ӱгретчiлерiне улуғ алғызын читiрче.
Бакалаврлар соонаң дипломнарны магистрлер алғаннар. Хызыл диплом алғаннарның санында Валерия Идимешева полған. Ол Асхыста тӧреен-ӧскен, амғы туста андағы лицейде хакас тiлi ӱгретчiзi полып iстенче. Тоғынып ала ӱгренерге сидiк полған ма тiп суриима ол, туснаң орта тузаланза, прай киректернi идерге маңнанып аларға чарир тiп нандырған. Валерия iҷе-пабазының чолын пасча, олар iдӧк хакас тiлi ӱгретчiлерi полып iстенчелер. Магистратуразар ол хакас кафедразындох бакалавриатты тоосхан соонаң кiрген. Анда ӱгренгенi кiзее кӧп наа ниме пiлiп алар оңдай пирче, алынҷа теманы тирең iстескенi наа кӧнiгiстернi аларға полысча тiп ӱлесче сағыстарынаң хакас тiлiнiң магистрi. Аннаңар ол чииттерге, чалтанмин, магистратуразар кiрерге чӧп пирче, кiзее нинҷе дее час полза, наа нимее ӱгренерге кирек ле тiп санапча.
Паза магистратураны тоосчатханнар санында Аршаннар аалында хакас тiлi ӱгретчiзi полып iстенчеткен Денис Миндибеков полған. Таныхтирға кирек, пӱӱл ол хакас тiлi ӱгретчiлерi мариинда араласхан, аймах синiнде чиңiс тутхан. Ол школада 17 чыл iстен парир. Сойан-Алтай тюркология институдын 2006 чылда «Хакас тiлi паза литература, хоза специальность: тархын» кӧстегҷе тоосхан. Магистратуразар кiрерге чӧптепчеткеннерiнде, кiрерге алай кiрбеске бе тiп ӱр сағынған. Анаң 2022 чылда пазох студент полыбызарға чарадыбысхан. Магистратура, наа пiлiстер алып, квалификацияны кӧдiрер оңдай пирген тiп таныхтапча Денис Миндибеков. «Ӱгренерге хынығ полған. Итсе, пiр туста тоғынарға паза ӱгренерге оой ла полбаан.Че магистр адын алып алғаныма ӧрiнчем. Хатап студент полыбызарға чапсых полған. Тиксi алза, студент тузы минiң кӧңнiме тың кiрген. Сессия тузында мин позымны, суғдағы палых ла чiли, тудынҷаңмын. Зачёттар, экзаменнер чит килзелер, iкiнҷi тынызым сых килҷең», – ӱлесче сағыстарынаң ол.
Амғы туста филология паза искусстволар институдында (ИФИ) «Педагогика ӱгредии: хакас тiлi паза литература, орыс тiлi» кӧстегҷе бакалавриатха паза «Филология: хакас тiлi, литература, культура» кӧстегҷе магистратуразар пiчiктер алылчалар. Бакалавриатха пiчiктернi от айының 15-ҷi кӱнiне читiре алчалар, магистратураа – орғах айының 12-ҷi кӱнiне читiре. Iкiнҷiлепчеткен кiзiлерге сағыстарын алыстырыбызарға ам даа тус пар. Кем пiлче, арса, таңда хакас тiлi специализiнiң хызыл дипломын холда сiрер тударзар?
Сомнар Дмитрий Сунчугашевти паза ИФИ-ның ВК-дағы страницазынаң
Автор :
Татьяна Кыштымова
Пн | Вт | Ср | Чт | Пт | Сб | Вс |
28 | 29 | 30 | 1 | 2 | 3 | 4 |
5 | 6 | 7 | 8 | 9 | 10 | 11 |
12 | 13 | 14 | 15 | 16 | 17 | 18 |
19 | 20 | 21 | 22 | 23 | 24 | 25 |
26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде