Олимпиадада араласпастар
12.07.2024
Хабарлар
![Олимпиадада араласпастар Олимпиадада араласпастар](/upload/iblock/538/snbg25wur7d2rjnksb7almfk0smwir5g.jpg)
Шамиль Мамедов тилекейнің иң улуғ мариинда кӱзін сынирға пӧгінче
Спорт. Пістің хазнадаң нинҷе кізі пас меетке сығар ни? Араласчыларның саны кӱннің сай алысча
Ікі неделя пазынаң Париж Олимп ойыннарын удурлир. Арға-мӧрій от айының 26-ҷы кӱнінде пасталар. Программада 32 спорт кӧрімi. Кибір хоостыра иң кӧп кізі – 1800 артиинаң спортсмен – ниик атлетикада кӱзін сынир. Олар 48 медаль чыындызы ӱчӱн харбазарлар. Cуғҷа чӱзері – кӧп дисциплиналығ ікінҷі спорт кӧрімi. Анда 852 кізі аралазары кӧрілген. 2024 чылда Олимпиадада пастағызын на брейк-данснаң айғасчатханнар устарын кӧзідерлер. Программазар ідӧк хайаҷа cығарын, серфингті, скейтбордингті кир салғаннар. Олар наа олимп спорт кӧрімнеріне cаналчалар. Сынында пу дисциплиналарҷа пастағы марығлар 2021 чылда Токиода ирткеннер.
Тилекейнің иң улуғ марииның араласчылары прайзының табырах чӱзiбізерге, чӱгӱрібізерге пӧгінчелер. Россия чуртағҷыларының, тізең, пасха сағыссырас: пістің хазнадаң нинҷе кізі пас меетке сығар ни? Араласчыларның саны кӱннің сай алысча тирге чарир. Азынада искірілген: Олимпиадада гандболисттер, волейболисттер, хоос паза спорт гимнасттары, синхронисттер, суғҷа чӱзерінең айғасчатханнар, боксерлар, атығҷылар паза пасхазы араласпастар. Олар Олимп ойыннарына таллағны даа иртпееннер. Ізенгеннер дзюдоисттерге паза кӱресчілерге. Теннисисттерге чол азых полған. Специалисттернің таниинаң, 55-че спортсменнің арға-мӧрійде кӱзін сынир оңдай полар. Олар 15 медаль утып алар тіп ізеніc пар. Че Чоннар аразындағы олимп комитеді (МОК), полған на араласчыны пазох сыныхтап, алынҷа хығыртығлар тимнеен. Пу чарадығ прай пӧгіннерні cайбаан.
Кӱресчілердең иң кӱстіг спортсменнер – Абдулрашид Садулаев, Заурбек Сидаков, Заур Угуев, Муса Евлоев, Артур Найфонов – хығыртығ чох халғаннар. Пастағы тӧрт чир-суғҷыбыс – олимп чемпионнары, Найфонов – хола призер. Пістің тхэквондисттер тӧрт олимп лицензиязын утып алғаннар, пірдеезіне хығыртығ килбеен. Дзюдоисттердең 17 кізі Олимпиадаа таллағны иртiбіскен, тӧрт спортсменге чарадығ пиргеннер. Пу оңдайларда спорт федерациялары постарын аймахти тудынғаннар. Россияның дзюдоҷа федерациязы, cалтарларны піліп алғандох, марыға пірдеезі парбас тіп искірген. Спорт кӱрезінде кирек сағыбаан оңдайнаң парыбысхан. Пастағы хығыртығлар 15 хандыхта килгеннер. Андада Россияның спорт кӱрезі федерациязының президенті Михаил Мамиашвили теен:
– Чарадығ алған спортсменнер Олимпиадада аралассыннар. Піс оларға хабазарбыс.
Че от айының 6-ҷы кӱнінде СМИ-ларҷа искіріг тарапча: «Олимп ойыннары Россия кӱресчілері чох иртерлер». Хабар прайзын таңнатхан. Анзын СМИ-ларда сыххан материаллар, социальнай сетьтерде парчатхан ӱзӱріглер киречілепче. Михаил Мамиашвилинің чооғынаң, чарадығ улуғ ӧменең алылған. Ӱзӱрігде федерацияның кізілері, тренерлер, спортсменнер араласханнар. От айының 9-ҷы кӱнінде наа хабар: 23 частығ Шамиль Мамедов Олимпиадада аралазарға чаратхан. Кӱресчі Дагестаннаң, ол лезгин чонның оолғы. Олаңай кӱреснең 6 частығдаң айғас парир. Иң улуғ чидии – 2023 чылда тилекей чемпионадында ӱзінҷі орынға сыхханы. Ідӧк кӱресчі Ярыгиннің турнирінде 2022-2023 чылларда чиңіс тутхан. Мамедов 65 кг кӧдірімде харбасча. Социальнай сетьтерде пазох суум-саам. Пастағылары аны махтапча, Олимп ойыннары – ол полған на спортсменнің сағынған сағызы нооза. Ікінҷілері арғыстарынаң тоғыр парча тіп пыролапчалар. Илееде кізі Мамиашвилині хомайлапча. Хандых айында кӱресчілерні ізендірерге кирек полған ма?
Белоруссияда пу сурығны пасха оңдайнаң пӧгібіскеннер. Иң кӱстіг спортсменнерге ідӧк хығыртығ килбеендір. Оларның орнына пасха кӱресчілер (командада ікінҷі, ӱзінҷі орында парчатхан) аралазарға кирек полғаннар. Федерация марыға Абубакар Хаслахановты ла (грек-рим кӱрезі) ызарға чаратхан. Ол, тилекей чемпионадында хола медаль утып, Белоруссияа олимп лицензиязын ағылған. Шамиль Мамедов ідӧк олимп лицензиязын утхан, пӱӱл Россия чемпионадында чиңіс тутхан. Ағаа харығ поларға кирек пе? Наталья Малышева Олимпиадада араласпинчатханы хомзындырча.
Пу кӱнге Россиядаң Олимпиадада 16 кізі узын сынир: Даниил Медведев, Роман Сафиуллин, Павел Котов, Екатерина Александрова, Мирра Андреева, Диана Шнайдер, Елена Веснина (теннис); Тамара Дронова, Алена Иванченко, Глеб Сырица (велошоссе); Анжела Бладцева (батутта сегірері), Алексей Коровашков, Захар Петров, Олеся Ромасенко (каноэнең чӱзері); Евгений Сомов (суғҷа чӱзері); Шамиль Мамедов (олаңай кӱрес). Мамедовтың хоостыра ӱзӱріглер парча.
Сом интернеттең
Автор :
Майя Кильчичакова
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде