Чайғыдағы тынағ, хысхы тусха тимненіс
17.07.2024
Хабарлар
Правительство чыылиинда
Ӱлгӱ. Киҷее Хакасия пазы Валентин Коновалов республика правительствозының чыылиин иртірген
Чыылығның пастағы сурии Хакасияның муниципалитеттері аразында чазы читкелектернің опеказынҷа полномочиелерні толдырарына республика бюджедінең субвенцияны ӱлестірҷең оңдайны чарадыға алары полған.
– Чарыда чоохтаза, ол республика бюджедінде артызылчатхан ахча, – чарытхан Валентин Коновалов. – Іҷе-паба хайии чох халған паланы пос сӧбірезіне алчатхан сӧбірелер саны хозылза, ол ахча пу кӧстеглерге позыдылча.
Ол ахчаны муниципалитеттер аразында ӱлестірҷең оңдайнаң Хакасияның ӱгредіг паза наука министрі Анатолий Бутенко таныстырған. Аның искіриинең, 2024 чылда чазы читкелектернің опеказынҷа паза попечительствозынҷа полномочиелерні толдырарына республика бюджедінде тиксі 126 миллион 980 муң салковай кӧріл парған. Ӱлестірілбеен чардығы 6,4 миллион салковайға тиңнелче. Ана ол ахча муниципальнай пӱдістер аразында ӱлестірілер.
Министрлер кабинеді муниципалитеттер аразында чазы читкелектернің опеказынҷа полномочиелерні толдырарына республика бюджедінең субвенцияны ӱлестірҷең оңдайны талас чох чарадыға алыбысхан.
Пазағы сурығ республикада палаларны хазыхтандырҷаң кампания хайди иртчеткеніне чарыдылған. Хакасияның істеніс паза социальнай арачыланыс министрі Татьяна Раменская, пу сурығҷа чоох тудып, пастағы сменада олған хазиин тыытчаң 192 организация тоғынғанын таныхтаан. Ол олған лагерьлері, санаторий-курорттар паза даа пасхазы. Оларның 183-і Хакас чирінде орныхча. Пастағы смена тузына олған лагерьлерінде паза хазых тыытчаң пасха орыннарда тиксі 19656 пала тынанып алған, ол санда чуртастың сидік оңдайларында полчатхан 7681 пала.
Татьяна Раменская чоох тутча
– Кӧрімнерні алза, иң кӧп пала кӱнӧрте полҷаң лагерьлерде тынанған, – чоохтаан Татьяна Раменская. – Оларда 16131 олған тынанып алған, ол санда чуртастың сидік оңдайларында полчатхан 6227 пала. Город тастындағы олған лагерьлерінде ӱс муң артиинаң олған тынанып алған, ол санда чуртастың сидік оңдайларында полчатхан 1166 пала.
Алынҷа хайығ СВО араласчыларының палаларын тынандырарына салылтыр. Пастағы сменада ол категорияа кірчеткен 599 олған хазиин тыыдып алтыр, ол санда 492 пала – кӱнӧрте полҷаң лагерьлерде, 91 пала – город тастындағы олған лагерьлерінде, 16 пала – санаторий-курорттарда.
Аннаң пасха, 71 муң азыра пала кічіг кӧрімніг тынағда араластыр – экскурсияларда, походтарда, спорт мероприятиелерінде, мастер-класстарда паза даа пасхазында. Амғы туста ікінҷі смена тоғынып пастабысхан.
Ідӧк хандых айы пасталарынаң 1070 саарбахха тоғыс таап пиртірлер. Ол 14 – 18 частығ олғаннар, хайзылары пос кӧңнінең ахча тоғынып аларға сағыс тутханнар.
– Тиксі чайғыдағы хазых тыытчаң кампаниядаңар чоохтирға ирте, че пастағы сменаның салтарларын алза, турғызылған пӧгіннерні толдырыбызарбыс тіп сағынчам, – салтарлар иткен Хакасияның істеніс паза социальнай арачыланыс министрі.
Хакасияның ЖКХ паза энергетика министрінің тоғызын толдырчатхан Максим Виноградов республиканың чурт-коммунальнай комплексінің чылығ пирҷең тусха тимненізі хайди парчатханынаңар сан пиріс иткен.
Ол чарытхылығ сеть комплексі 2024-2025 чыллардағы чылығ пирҷең тусха хайди тимненчеткенін алынҷа таныхтаан. Хакас чирінде тӧрт территориальнай сеть организациязы (ТСО) тоғынча. Оларда чарытхынаң палғалыстығ саайларны чох идеріне ӧнетін бригадалар тӧстелгеннер: «Россети Сибирь» ПАО – «Хакасэнерго» (тӧрт бригада, 39 кізі, 22 техника, 12 РИСЭ – чарытхы пирҷең резервтіг источник), «Абаканские электрические сети» Ағбан г. МУП-ы (пір бригада, 16 кізі, алты техника, 4 РИСЭ), «Сетевая Компания Сибири» ООО (ӱс бригада, 27 кізі, 14 техника, тӧрт РИСЭ).
Министерство специалисттері сағыс-кӧрізінең, Ағбан пилтірі паза Боград аймахтарының аалларында чылығ пирҷең тустың иң соох кӱннерінде чарытхы ӱс турар тіп хорғыс пар.
Чылығ пирҷең килер тусха тимненері хоостыра Хакасияҷа тимненіс кӧзідімі 21,5% полча. От айының 1-ғы кӱніне тимнел парған:
– чурт чыындызы объекттерінің 17,3%-і (2710-наң 440-ы);
– котельнайларның 17,4%-і (155-тең 27-зі);
– чылығ пирҷең сетьтернің 25,9%-і (635,1 километрдең 164,3 километрі);
– суғ пирҷең сетьтернің 25,5%-і (1529,3 километрдең 389,4 километрі).
Муниципальнай пӱдістерге коммунальнай комплекс системаларын нааҷылирына паза тилідеріне 2024 чылда республика бюджедінең 303 миллион 740 муң салковай позыдылтыр.
Чыылығда ӱзӱрілген паза пір сурығ – республиканың пӱдіріг министерствозының холында полчатхан учреждениеде, тиксі пӱдіріг управлениезінде (УКС), проект-смета пічіктерін тӱзедерінҷе пӧлік тӧстирі.
Хакасияның пӱдіріг министрі тоғызын толдырчатхан Алексей Филюшин республика пазы чахиинҷа андағ пӧлік тӧcтирге чарадығ алылғанын искірген. Ӧӧн сылтағ – объекттернің проект-смета пічіктері тимнелгені уйан синде полғаны. Ол пӧлік 2025 чылда тӧстелер тіп кӧрілче.
Ол сидіксіністер иң не пурун, нацпроекттерні чуртасха кирчетсе, сығыс килчеттір. Проект-смета пічіктері уйан тимнелген сылтаанда пӱдіріг сӧӧ тартыл сыхча.Пічіктерні чапчаң тӱптестіреріне, тізең, хоза ахча хорадынарға килісче. Удаа ас нимес. Іди 2020 – 2023 чылларда УКС-ха проект-смета пічіктерінзер алызығлар киреріне, контракттар идіп, 17 миллион салковай хорадарға киліcтір.
– Хомзынысха, пістің регионда проекттерні чахсы тимнепчеткен организациялар ас, – таныхтаан Алексей Филюшин. – Оларға удаа кӧп тоғыс толдырарға килісче, аннаңар проекттерні тузына тимнирге маңнанминчалар. Анзы, тізең, пӱдіріг хаалағларына теелче. Салтарында нацпроектче позыдылған ахча тузында тузаланылбин халча. Пӱдіріг тоғызында специалист-проектировщиктер паза пӱдіріг хайди апарылчатханын сыныхтағда тутчатхан кураторлар араласханы сығысчатхан сурығларны чапчаң пӧгеріне хабазар тіп санапчабыс.
Ағбан городтың пазы Алексей Лёмин пу сурығҷа тиксі ӱгредіг школаларын тыхтирына хайығ саларға чӧп пирген. Пасха даа нацпроекттерҷе тоғыстар сӧӧ тартыл сыхча.
– Школалардаң пасти чолларға теере – ол уғаа улуғ чардых, – таныхтаан ол.
– Сағам кічігдең пастирбыс – регионның инвестпереченьінзер кирілген объекттердең, хайзылары УКС пастыра толдырылчалар. Аннаң андар, чахсы опыт полза, алғыдарбыс, – нандырған Алексей Филюшин.
– Пу тоғысха ситкіп хайарға кирек, ӧӧн кӧстеглерні орта турғыс саларға, – салтарлар иткен Хакасия пазы Валентин Коновалов. – Кадрларнаң киліс парза, арса, нинҷе-де тус пазынаң ол кӧcтеглер соон сӱрістіре толдырыл парар. Прай ниме хайдағ кадрлар сірерзер, УКС-сар, килерінең палғалыстығ.
Министрлер кабинеді пу чыылығда ідӧк физкультураа паза спортха, чииттер политиказына паза пасха даа сфераларға теелчеткен чарадығларның проекттерін ӱзӱрібіскен.
Сомнар кӧні эфир кӧзідиинең
Автор :
Альберт Толмашов
| Пн | Вт | Ср | Чт | Пт | Сб | Вс |
| 28 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде
