«Тимiр сығарызы» кӧстегҷе ӱгредiгнiң наа тынызы
19.07.2024
Хабарлар
Хакасия правительствозы паза тоғыс пирчеткеннер хада тоғынардаңар чӧптес салдылар
Чӧптезiг. Хакасияның правительствозы паза республиканың экономика секторы организацияларының устағҷылары «Тимiр сығарызы» кӧстегҷе ӱгредiг-производство кiнiн азарынаңар паза аны тилiдерiнеңер чӧптезiгде хол салғаннар
Аны Саяногорсктағы политехническай техникумда «Профессионалитет» проект хоостыра азарлар, анда читі тоғысчы профессияҷа тимненiс апарылар. Техникум пӱӱл федеральнай проекттiң 100 млн салковайлығ грантын утып алған. Амды ортын профессиональнай ӱгредiг учреждениезiнде алюминий сығарызында iстенер тоғысчыларны паза специалисттернi тимнирлер. Студенттер ол предприятиелерде практика иртерлер. Олар заводтарда тузаланылчатхан амғы тустағы оборудованиенең тоғынарға ӱгренерлер. Андағох пӱӱнгi кӱннiң прай кирексiнiстерiне нандырчатхан оборудование грант ахчазына техникумға алылар. Аннаңар чиит специалистке, тоғысха сыхса, таныс нимес техниканаң тоғынарға хатап ӱгренерге килiспес. Ӱгредiг учреждениезi, oборудованиенi алчатса, килiстiре полчатханы хоостыра алюминий сығарчатхан предприятиелер специалисттерiнең чӧптезерлер.
Iдӧк Саяногорсктағы политехническай техникумда, кӧзiдiмге, «Россети» паза «Абаканвагонмаш» предприятиелерге специалисттернi тимнирлер. Че ӧӧн тоғыс пирчеткен предприятиелер «РУСАЛ-Саяногорск» паза «РУСАЛ-САЯНАЛ» полчалар. Таныхтирға кирек, пу организациялар 34 млн салковайҷа постарының ахчазын техникумда тыхтағ тоғыстарын апарарына пирчелер. Прай пу ахча 11 ӱгредiг орнын тӧстирге полызар, оларда иң чахсы оборудование турғызылар. Студенттер техникумзар ӧӧнiнде кӧстеглiг ӱгредiг чӧптезиинҷе алыларлар тiп кӧрiлче. Анзы оларны предприятиелерзер iкiнҷiлес чох тоғысха аларлар тiп iзендiрер.
Хакасияның ӱгредiг паза наука министерствозының профессиональнай ӱгредiг пӧлиинiң устағҷызы Евгения Черныхтың чооғынаң, республикада пу пастағы кӧзiдiм, хаҷан предприятие ӱгредiг организациязын тилiдерiне пу син ахча пирче. «Iдӧк алюминий сығарызынаң айғасчатханнар грант мариина пiчiктернi тимнирге полысханнар, чӧптер пиргеннер. Аннаңар Саяногорсктағы техникум чиңiс тутханында оларның хозымы парох. Мындағ полызығ ӱчӱн пу предприятиелерге улуғ алғызыбыс читiрчебiс», – таныхтапча Евгения Юрьевна.
«Тимiр сығарызы» кӧстегҷе ӱгредiг-производство кiнiн тӧстирiнiң пастағҷызы Хакасия правительствозы полча. Республика пазы Хакасияның ӧӧн ис-пайы – аның чуртағҷылары тiп удаа чоохтарында таныхтапча. Регион предприятиелерiнде тоғынар специалисттернi тимнирiне кӧп хайығ айландырылча. Че оларны тимнирi асхынах, оларны Хакасияда тут халарға кирек. Аннаңар чииттерге тоғыс орыннарын тӧстирiнҷе, оларның чурт оңдайларын чахсыландырарынҷа тоғыс iдӧк ӧткiн апарылча.
Хакасия правительствозы саринаң чӧптезiгде республика пазы Валентин Коновалов, ӱгредiг паза наука министерствозы саринаң министр Анатолий Бутенко, ӱгредiг кiн орнығар ӱгредiг учреждениезі саринаң Саяногорсктағы политехническай техникумның директоры Наталья Каркавина хол салғаннар.
Пасха саринаң хол саларында тоғыс орыннарын пирҷең организацияларның устағҷылары араласханнар: «РУСАЛ-Саяногорск» АО-ның устапчатхан директоры Евгений Щербаков, «РУСАЛ-САЯНАЛ» АО-ның устапчатхан директоры Сергей Сорокин, «Инжиниринг Строительство Обслуживание» ООО-ның Саяногорсктағы пӧлиинің устағҷызы Андрей Юнг, «Саяногорский вагоноремонтный завод» ООО-ның директоры Артём Аргунов, «РМ Рейл Абаканвагонмаш» АО-ның устапчатхан директоры Андрей Симбирцев, «Россети Сибирь» ПАО-ның «Хакасэнерго» пӧлиинің директоры Николай Шепырев араласханнар.
Iдӧк хада-пiрге тоғынардаңар чӧптезiгде хол саларына чарыдылған мероприятиеде Хакасия Ӧӧркi Чӧбiнiң культураҷа, ӱгредiгҷе паза наукаҷа комитедiнiң кнезi Оксана Разварина, коммунальнай хоных паза сервис техникумының директоры Александр Матейко, Харатастағы отрасльлар технологиялары техникумының директоры Наталья Поликарпова, Харатастағы тағ-пӱдiрiг техникумының директоры Лариса Ващенко полғаннар.
Сом Дмитрий Сунчугашевти
Автор :
Татьяна Кыштымова
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы
Хакасияда
Россияда
Тилекейде