Ӱртӱн тойы – ӧбекелерiбiс артыс пирген культура ис-пайы
25.09.2024
Хабарлар
Ӱлӱкӱнде ыр-кӧглер чайылған, сіліг теелбектер салылған
Ӱлӱкӱн. Ӱртӱн айының 21-ҷi кӱнiнде республиканың ипподромында Ӱртӱн тойы алғым таныхталды. Ол Тӱрк пiчиинiң паза культуразының кӱннерiне, Сӧбiре чылына чарыдылған
Устағ-пастағның алғыстазы
Чир тамаа садығҷылары, ус холлығлар, культура тоғынҷылары пу чарых кӱнде ипподромзар иң пурнада чыылысчалар. Оларға аалҷыларны удурлирға тимненерге кирек нооза. Хайзы садығ киреен апарҷаң истiг орында иртеезiнӧк тур саларға маңзырапча. Анаң ағылған ниме-ноозын столға толдыра, уламох кiзi хайиин тартар иде ипти салғлап турғысхлапчалар. Ол арада артисттер сцена хыриндағы ибiҷектерде хайынысчалар, чазанчалар.
Иртен тигiр хойығ пулуттарға тартыл парған полған. Наңмыр даа чабызарға тӧӧй. Кӱcкӱнiң сӧрӧн кӱннерiн чайғының чылиинаң тиңнестiр полбас. Аннаңар кiзiлер чылығ киптерiне кiр сыхтылар, ӱлӱкӱнге халын тонанып килглееннер.
Чир тамаа пайрамы «Читi хыс» театр ойынынаң пасталған. Аны С.П.Кадышевтiң адынаң чон чайаачызы кiнiнiң режиссёры Антонина Тутатчикова турғысхан. Пурунғы кип-чоох хоостыра пiр хакас сӧбiреде читi хыс ӧстiр. Иң улииның ирге парҷаң тузы читкенде, ағаа турыстығ иреннi таллирға киректелген. Мының алнында кӱлӱк ооллар Айран солындызы ӱлӱкӱнде аймах марығларда араласчаңнар: «Кӱрес», «Охчаадаң атыс», «Хапчаң тас» паза пасхазы. Iди иң мирген оол, прайзын чиңiп алып, хысты ипчее алча. «Читi хыс» ойында А.М.Топановтың адынаң Хакас драма театрының паза В.Г.Чаптыковтың адынаң Хакас филармониязының артисттерi араласханнар.
Театр ойыны
Анаң сценазар хакас родтар кiзiлерi сыхханнар: Сунчугашевтер Ағбан городтаң, Кичеевтер Саяногорсктаң, Катаевтер Сорығдаң, Топоевтер Харатастаң, Султрековтар Алтай аймаанаң, Боргояковтар Асхыс аймаанаң, Чебодаевтер паза Чаптыковтар Пии аймаанаң, Толмашовтар Боград аймаанаң, Баклаевтер Орджоникидзе аймаанаң, Кулумаевтер Таштып аймаанаң, Сагалаковтар Ағбан пилтiрi аймаанаң, Абдиннер Шира аймаанаң.
– Аарлығ нанҷылар, прайзын Ӱртӱн тойы ӱлӱкӱннең алғыстапчам. Чир-чайаанны улуғлааны, аның пай сыйыхтары ӱчӱн алғызыбыс читiргенi тӧлдең тӧлге парча. Ол кибiр-чозахтар пiске прайзына чағын. Пу пайрамда аал хонии тоғызының салтарлары идiлче. Пу чылны оой тирге чарабас. Аал хонии тоғынҷылары, тоғасхан сидікciністернi турыстығ тобырып, пӧгiннерiн толдырғаннар. Пӱӱн прайзы оларның чидiглерiне ӧрiнчебiс паза тiспен iстенiстерiне поғдархапчабыс. Аарлығ чир-суғҷылар, пic хада-пiрге Россиябыстың тилiзi ӱчӱн тоғынчабыс, хынған Хакасиябысты ӧңнендiрчебiс, неонацизмнең тоғыр кӱресчебiс. Прайзына амыр чуртас, улуғ чидiглер, часка алғапчам! – ӱлӱкӱнге чыылысхан чонны чылығ сӧстернең алғыстаан Хакасия пазы Валентин Коновалов.
Регион устағҷызы Валентин Олегович Асхыс аймаандағы кресен-фермер хонии пазы Георгий Сергеевич Сарлинге аал хониинда пӧзiк чидiглерге читчеткен, халых тоғызында ӧткiн араласчатхан паза ӱр чыллар тiспен iстенчеткен ӱчӱн «Россияның агропромышленнай комплексiне хозым итчеткен ӱчӱн» кӱмӱс медаль читiрген. Аал хонии колледжiнiң преподавательi Лариса Леонидовна Джумаева агропромышленнай комплекс системазында ӱр чыллар чахсы iстенчеткен ӱчӱн Россияның аал хонии министерствозының Аарластығ пiчиин алған. Iдӧк Хакасия пазының – Хакасия правительствозы кнезiнiң алғыстазынаң таныхтатханнар: Ағбан пилтiрi аймааның кресен-фермер хонииның пастары Александр Анатольевич Дельвер, Виктор Евгеньевич Максименко паза Шира аймаандағы «Ширинский элеватор» ООО-ның халых кадрларынҷа инспекторы Наталья Викторовна Тараканова.
Хакасия пазы Валентин Коновалов кресен-фермер хонии пазы Георгий Сарлинге «Россияның агропромышленнай комплексіне хозым итчеткен ӱчӱн» кӱмӱс медаль читірген
Хакас чонның Улуғлар чӧбiнiң кнезi Пётр Воронин Ағбан городтың чуртағҷыларын паза аалҷыларын Улуғлар чӧбiнiң, Ӧӧркi Чӧптiң паза позының адынаң ӱлӱкӱннең алғыстаан.
– Россия президентi Владимир Владимирович Путин 2024 чылны Сӧбiре чылы тiп чарлаан. Хакасияда ол Кӧп палалығ сӧбiре чылы тiп таныхталча. Сӧбiре iстiнде культура кибiрлерi паза улуғлас салылча. Анда тоғысты улуғлирға, чир-сууна хынарға, пос чонының кибiрлерiн аарлирға ӱгретчелер. Ӱртӱн тойы – пiстiң ӧбекелерiбiс артыс пирген культура ис-пайы. Ол Хакас чирiнде чуртапчатхан аймах тiллiг чоннарны пiрiктiрче. Аалларда сӧбiре кибiрлерi чахсы хайраллалча. Ӱлгӱнiң пӧгiнi – аал хонии тоғынҷыларының чуртас-экономика оңдайларын чахсыландырары. Республикада чабал мал ағырии тараан. Хакасия правительствозы аны тохтадарына паза чох идерiне чуртағҷыларға паза кресен-фермер хоныхтарына республика бюджедiнең чарым миллиард салковай позытхан. Пӱӱн пiс аал хонии тоғынҷыларына улуғ алғызыбыс читiрчебiс. Хуруғ алай чут кӱннер турза даа, олар, тiспен iстеніп, чир тамаан сығарарға прай кӱстерiн салчалар, – теен Пётр Иванович.
Анаң алғасчы устағ-пастағны, муниципальнай пӱдiстер пастарын, хакас родтар кiзiлерiн От иненi азырирға хығырған. Ол Ӧӧркi чайааннардаң пайрам чахсы ирт парзын тiп сурынған.
– Синi улуғлап, сағаа пазырчабыс, От ине. Улуғ киртiнiснең ас-тамахнаң, пызылахнаң азырапчабыс, ах iнек сӱдiнең суғарчабыс, От ине. Чоныбыс хазых чуртазын. Пiстiң ооллар ырах чирде матыр полып чӧрчелер. От ине, оолларыңны кӧр чӧр. Олар ибзер изен-хазых айланзыннар. Пiстiң сурынған сӧcтерiбiс тигiрге, чайааннарға, тағларыбысха прай читсiн. Алғызыбыс сағаа читiрчебiс, От ине, – айланған алғасчы.
Алғасчы От инені азырапча
Ӱртӱн тойы пайрамда муниципальнай пӱдiс пастары чиит сӧбiрелернi алғыстиры, оларға танығлығ сыйыхтар читiрерi кибiрге кiр парған. Пӱӱл iдӧк наа хоных тӧстееннернi чеестееннер.
– Аарлығ хакас чоным, улуғ изен читiрчем сiрерге паза ӱлӱкӱннең алғыстапчам. Прайзы изен-хазых ползын, чолларыбыс азых ползын. Пӱӱн пiс наа сӧбiренi кӧдiре алчабыс. Олар чуртастың улуғ чолына сыхчалар. Пик чуртазыннар, паарсассыннар, хаҷан даа ынағ ползыннар, – матлама хакастап, алғыстаан Таштып аймаа пазы Николай Чебодаев позының аймаандағы сӧбiренi.
«Чыл кiзiзi» сыйыхтас
Пу ӱлӱкӱнде Хакас чонның Улуғлар чӧбiнiң президиумы аал хонии тоғызында чахсы салтарлар кӧзiткен тоғынҷыларға «Чыл кiзiзi» пӧзiк танығ читiрчелер. Пӱӱл ол кибiр узарадылған.
Пилтiрдегi ветеринар участогының устағҷызы Фаина Апосова паза Пиидегi ветстанцияның ветеринар пунктының устағҷызы Борис Тохтобин профилактика вакцинациязын 100 %-ке толдырыбысханнар. Таштып аймаандағы кресен-фермер хонииның пазы Семён Бозыков, маллар паза хойлар тудып, оларны чахсы тӧллендiрче. Орджоникидзе аймаандағы Е.В.Иванов фермернiң тракторист-машинизi Василий Кабыжаков пӱӱл от чахсы тимнебiскен паза хыра тамаан чыыбысхан.
Таштып аймаандағы Ӧлең чазы аалдағы мал имҷiзi Людмила Камалова аймахтағы ветеринар службазының тоғызын пӧзiк синде апарча, аны тилiтче. Алтай аймаандағы «Аршановское» ООО-ның ӧӧн бухгалтерi Оксана Кучугешева пiчiктернең iзестiг тоғынча паза аал хонии киреене улуғ хозым ағылча. Асхыс аймаандағы кресен-фермер хонии пазы Таисия Сагалакова, iнек паза чылғы маллар, хойлар тудып, республиканың аал хониин тилiтче.
Шира аймаандағы фермер Максим Трошкин чылғы малының санын iкi хати ӧскiрiбicкен, iдӧк чӱгӱрiк аттарын чарыстарда ӧткiн араластырча паза олғаннарны ат спортына кӧнiктiрче. Пии аймаандағы кресен-фермер хонии пазы Юрий Чебодаев, хойларны паза iнектернi ӧскiрiп, чахсы салтарлар кӧзiтче. Ағбан пилтiрi аймаандағы идiнҷек Сергей Чистанов iдӧк iнектер паза хойлар тутча. Ол «Агростартап» грантты аларына таллағны ирт парыбысхан. Прай пу адалған аал хонии тоғынҷылары хакас чонның Улуғлар чӧбiнiң «Чыл кiзiзi-2024» пӧзiк атха турысханнар.
«Чыл кізізі-2024» таныға турысхан аал хонии тоғынҷылары
Чайаачы марығлар
Пайрамда муниципальнай пӱдiстер ӱс чайаачы марығда араласханнар: «Чарас» той кибiрi, «Пик сӧбiре – кӱстiг чон» роднаң таныстырары паза хакас ибнi кӧзiдерi, «Кӱскӱ сыйыхтары» чир тамаа кӧзiдiг-марығ. Полған на марығны улуғ опыттығ чарғыҷылар паалааннар. Пiс iдӧк аймах-городтар ӱлӱкӱнге хайди тимнен килгенiн кӧргебiс.
Абазаның ибiҷегi тастында «тiрiг» улуғ орыс пезi турған. Ол прайзын iзiг чей iзерге хығырған. Ограда iстiнде хаңааға кӧлiлген ағас ат турған. Хаңаазына ӱӱлдiре ӱӱҷiк тамаа салылған: сiлiг тыквалар, килкiм кабачоктар, узун морковьтар, ӱгӱрсӱлер. Алынҷа тасхахтардағы iдiстерде помидорлар, тадылығ перецтер хызарчатханнар. Тайға хузуғы – Абазаның паза Таштып аймааның ис-пайы – iдӧк кӧзiдiгнi чазаан. Чурт иркiнiн алтаанда, чиит оол хойығ ӱнiнең прайзын алтын стол кистiнзер чиистiң аймаан амзирға кӧглiг хығырған. «Орындағы виноградты чiп кӧрiңер, Абазада ӧскiрчебiс», – ол аалҷыларны хыҷыхтандырған. «Хакасияда сынап виноград ӧсче бе?» – чапсааннар ортын частығ ипчiлер, хара виноградты амзап ала.
Хости Ағбан городтың ибiҷегi турған. Анда аалҷыларны Сунчугашевтер род пазы Радион Дмитриевич Сунчугашев туған-чағыннарынаң хада чылығ удурлаан. Хайхастығ, ограда iстi аймах сiлiг чахайахтарнаң чазалған. Аар-пеер харах тастаза, ибiре саңай чахайахтар. Ограданың пiр пулиинда чиит сӧбiрелернiң алачығы турғызыл партыр. Iстiнде хакас кип-азахтығ ирепчi кӧклӧҷектернi одырт салтырлар. Пiлдiстiг, Сӧбiре чылы нооза. Кӧзiдiге яблоколарның аймаа сығарылған, iдӧк вареньелер, компоттар, хысхы салаттар столға толдыра турған. Андох суғ харғазы сӧӧгiне кiрчеткен Сунчугашевтернiң род ағазынаң танызып аларға чарир. 14 тӧлге теере пазылған род Пурчух аттығ кiзiдең пасталча.
Сӧбіре мариинда чиңіс тутхан суғ харғазы родынаң Сунчугашевтер улуғ аалҷыларны удурлапчалар
Род пазы Радион Дмитриевич хакас иб iстiндегi кӧзiдiгдеңер чарытхан. Иң пурнада «Ағас чилегелерiнең пик, кiзi, тiзең, сӧбiрезiнең» стенд кiзi хайиин тартхан. Анда Сунчугашевтер родының саблығ кiзiлерi сомнал парғаннар, паза кем хайдағ чуртас чолын ирткенiнеңер, иртчеткенiнеңер, хайдағ чидiглерге читкенiнеңер, хазнаа паза республикаа хайдағ хозым ағылғанынаңар пазыл парған. Олар – Илбек Ада чаа матырлары, саблығ юристтер, учёнайлар, культура тоғынҷылары. Ада чир-суу ӱчӱн чуртастарын пир салған чааҷыларның, прай 35 кiзi, аттары алынҷа пазылых полған. Хости 1937 чыллардағы политика репрессияларына хаптырған иреннернiң аттары пирiлген.
– Пу ат тирiглерiн пабам Дмитрий Егорович тiккен. Ол аал хонииның саблығ тоғынҷызы полған. Кирi абам Егор Павлович, хакас ады Кразан, ат тирiглерiне чазанҷыхтар хосхан. Ол Илбек Ада чаада араласхан, аннаң айланып, 1946 чылда, аар палығларға сыдабин, ах чарыхтаң парыбысхан. Ағамның пабазы Павел Константинович, репрессияа хаптырып, ызыға ыстырыбысхан, – чоохтаан род пазы Радион Сунчугашев.
Сунчугашевтер чайаачы кiзiлерге пай. РСФСР культуразының саблығ тоғынҷызы, Хакасияның чон артизi Клара Ефимовна Сунчугашеваны республикада ла нимес, тиксi хазнада чахсы таныҷаңнар. Пӧзiк чайаачылығ музыкант Пётр Фёдорович Сунчугашев «Кӱн чахайағы» ансамбльда араласхан, школада кӧг урогын апарған, чайаачы ӧмелернең устаан. Пӱӱнгi кӱнде «Архай» этногруппаның араласчызы Александр Дмитриевич сабланча. Ол ӧмее сарыннар пасча, хомыснаң паза ыыхнаң ойнап, морсымнығ хайлапча. Кӧзiдiге аның хакас кӧг тирiглерi сығарылған.
Iдӧк хамның кип-азаа харахха тасталған. Род пазының таниинаң, ол чиит хам Алексейнiң кип-азаа одыр. Мының алнында Аркут паза Карсак кӱстiг хамнар полтырлар. Оларның сомнары кӧзiдiгде полғанох.
2016 чылда, род пазы Анатолий Сунчугашев полчатханда, «Сунчугашевы из рода Суғ Харғазы» кинде чарыхха сығарыбысханнар. Аның автор-составительі «Хакас чирі» газетаның ӧӧн редакторы Радион Дмитриевич Сунчугашев полча. Книгада ӱлгӱде, кӱс структураларында, ӱгредiгде, наукада, культурада, аал хониинда, СМИ-да iстенген алай ба iстенчеткен кiзiлердеңер пазылча. Алынҷа таныхтал парғаннар репрессияа хабылған, Илбек Ада чаада араласхан Сунчугашевтернiң матыр ооллары. Пу книга iдӧк кӧзiдiге сығарылған.
Пӱӱлгi Ӱртӱн тойында род кiзiлерi ӧнетiн чаа операциязында чуртастарын пир салған матырларның сомнарын сығарғаннар. Улуғ хомзынысха, Сунчугашевтернi ол хыйал, теңмин, иртпеен. СВО-да чиит ооллар Анатолий Сергеевич паза Григорий Андриянович, чуртастарына айабин, Чир-суун арачылааннар.
Сунчугашевтер пай столға саңай хакас ас-тамаан салғаннар: талған, айран, пiчiрӧ, тадар арағазы, аарчы, палых, iстi-харыннаң тимнелген чиис. Хакас ибiҷектiң ипчi саринда iдiс-хамыс, ол санда 18 чӱс чылдағы самовар, хакас кӧгенектер, поғолар полған.
Муниципальнай пӱдiстернiң кӧзiдiглерiн кӧрiп ала, Орджоникидзе аймааның хакас ибiҷеене читкебiс. Хуруннар аалындағы «Тамырлар» хакас кiннiң устағҷызы Тарине Сулекова пiстi чылығ удурлаан.
– Пiс позыбыс иткен вареньелер, тустаан ниме-ноо, компоттар ағылғабыс. Ӱӱҷiктерiбiсте ӧскiрiп алған чир тамаан читiргебiс, – ӱлескен Тарине Рудольфовна.
Орджоникидзе аймааның ӱчӱн ах хасха сӧӧгiнiң Баклаевтер роды турысхан. Прай тимненiстi Баклаевтернiң килнi Валентина Владимировна холға алған. Ол iдӧк «Тамырлар» кiнде iстенче.
– Пу минiң хастым Фёдор Борисовичтiң сомы. Ол аал хонии марығларының тӧремiл чиңiсчiзi паза Iстенiс ветераны полған, чуртас тооза Хуруннар аалында чуртаан, чабан паза малҷы полып тоғынған. Чуртазының кӧп чардығын механизатор полып iстенген, анаң тынаға парыбысхан. Хонғанынаң хада тӧрт оол, iкi хыс ӧскiр салғаннар, – улуғ сомзар пастырып, чоохтаан Валентина Баклаева.
Таштып аймааның алнын хобый сӧӧгiнiң Кулумаевтер роды алған. Хонғанының фамилиязынаң Анастасия Кулумаева таныстырған. Ол Пыдырахтағы школанаң устапча паза физкультура уроктарын апарча.
– Кӧзiдiге род ағазын ағылғабыс, ол сигiс тӧлге теере пазыл парған. Пу стендте саблығ кiзiлерiбiс адал парғаннар. Пiс спортха сабыл парған род полчабыс, аннаңар медальларыбыс толдыра. Позым республика синiндегi дартсча марығларға тӧремiл чӧрчем, саналығ чӱгӱрчем, ГТО-да аралазып, пастағы орыннар алчам, волейбол ойнапчам. Позым тӧрт хыс ӧскiр салғам. Олар iдӧк республика паза аймах синiндегi марығларда араласчалар. Хыстарым институттарны чахсы тоосханнар, мин чiли, ӱгретчi полчалар. Хазинем Елизавета Николаевна Кулумаева хакас тiлiнең кӱстiг ӱгретчi полған, ам тынағда. Пiс ӱгретчi cӧбiрезi полчабыс, – теен Анастасия Васильевна.
Таныхтирға кирек, Кулумаевтер роды, «Чарас» той кибiрi марығда аралазып, сценада кӱлкiстiг ойын кӧзiткеннер. Полтазы хоостыра, Тохтобиннернiң паза Кулумаевтернiң оол-хыстары, тоғас парып, удур-тӧдiр кӧӧленiзiбiсчелер. Хыстың сазын ӱрiбiзiп, чарасха тимненiбiскеннер.
– Че, туғаннарым, чарасха парар тус читтi, анда иптiг полыңар, хырыспин, тудыспин, сӧклеспин, – алғапча сӧбiре пазы.
Чол пара, Кулумаевтер ызых чирлерде iлiг тастап одырғаннар. Iди парар чирге читкеннер. Тура ээзi, ипчi кiзi, кӧзенек ӧтiре кӧрiп, хайхапча:
– Йо, хайдағ иптiг кiзiлер килдiлер!
– Хайдағ кiзiлер? Кемнер? Хызыбыс ибде бе? – сизiк хаап, хазырлан сыххан апсаа.
– Хызыбыс ибде чоғыл, ибде хонминдыр! – пичеллен сыххан iҷе кiзi.
– Минiң чалғыс хызымны тут парыбыстырлар, айналар, амох кӧрер ниме кӧрерлер! Пу оғыр ала саасханнарның хузурухтарын толғирбын! Чӱлмелернi кирбеспiн! – хазырланча чурт ээзi.
Ол арада аарлығ аалҷылары тураа иртчелер.
– Ноо нимее сӱстір килгезер? Мин сiрернi амох чыс пирербiн! Харахтарыңны тундыра сабызарбын! Тiстерiңнi санап пирим ме?! Соғын оғырлар! – хынығ ойнапча ирен.
– Хынзаңар, соғыңар, сығара сӱрiңер, че пiс чаразарға килдiбiс, Кулумаевтер полчабыс, – амыр ӱннең нандырған аалҷы ирен. – Чол пара, саңай сухсап пардыбыс, ӧзiбic хуруп парды. Чурт ээлерi чiрчее суғ сус пирген ползалар, улуғ алғызыбыс читiрербiс.
Аалҷыларға суғ пирчелер. Ирен, тооза оортабызып, олох чiрчее иреет урча, аны чурт ээзiне читiрче: «Кiзi чалғыс чуртабинча, чииттерiбiс хоных тӧстепчелер, пiс сват-худағайлар полаалар, чарас столын чазаалар, ағылған тулуптарны азаалар, чарас арағазын амзаалар». Iди Кулумаевтернең Тохтобиннер чағын туғаннар пол парғаннар.
Салтарлар
Ӱртӱн тойы пайрам пӧзiк синде ирткен. Аалҷылар позының кӧңнiне чарас ниме-ноо тапхан поларлар. Анаң марығларның салтарлары адалған.
«Пик сӧбiре – кӱстiг чон» марығда пастағы орынны паза 15 муң салковайлығ сертификатты Ағбан городтаң Сунчугашевтер роды утып алған. Iкiнҷi орын паза 10 муң салковайлығ сертификат Таштып аймаандағы Кулумаевтер родына читiрiлген. Ӱзiнҷi орынға сығып, 7 муң салковайлығ сертификаттың ээзi Пии аймаандағы Чаптыковтар роды полыбысхан.
«Чарас» той кибiрi марығда пастағы орынны Пии аймаандағы Чебодаевтер роды холған кирген, iкiнҷi орынны – пазох Таштып аймаандағы Кулумаевтер роды, ӱзiнҷi орынны – Асхыс аймаандағы Боргояковтар роды.
«Кӱскӱ сыйыхтары» кӧзiдiг-марығның пастағы орыннығ чиңiсчiзi Алтай аймаа полыбысхан, iкiнҷi орын Харатас городха пирiлген, ӱзiнҷi орынны Ағбан пилтiрi аймаа апарыбысхан.
Чир тамаа пайы
Ӱлӱкӱннерде национальнай ас-тамах ачығы тӧреміл улуғ кирексіністе. Хакасияның аймах пулуңнарынаң пайрамға читкен улусха кӱс алынып аларға кирек нооза. Идінҷектернең чоохтасханда, кӧбізі чыл сай тоғынчаттыр. Кӧзідімге, кибірліг ӱлӱкӱннернің ӧткін араласчызы – «Асхыстағы колбасалар» садығ туразының тоғысчы ӧмезі. Директор Татьяна Чертыкованың таниинаң, олар пайрамға ікі неделя азынада тимненіп пастааннар. Татьяна Владимировна чоохтапча:
– Пістің предприятие Тун пайрамда, Чыл пазында тӧреміл араласча. Ипподромда чарыстар иртсе, кӧрігҷілерні азырапчабыс. Сурыныс пічіктерi Хакасияның экономика тилізі министерствозынзар ызылчалар. Искірчебіс, нинҷе кізі тоғынар, ниме садарбыс. Садығда хайди даа аймах кӧрімніг колбаса пар. Ӱртӱн тойына 30-ча килограмм плов, 50-ҷе килограмм сістеен ит тимнеп салғабыс. Менюда хаарған купаттар, ізіг чей, кофе пар. Паалардаңар чоохтаза, пір порция плов, сістеен ит 300-ер салковайға турча. Пӱӱн 7.00 час иртеннең хайын парирбыс. Чоннаң тоғынарға кӧңнібіске кірче.
Ӱлӱкӱннерде идінҷектер чиисті ӧӧнінде хазаннарда пызырчалар. Чир-суғҷыбыс Айтас Бурнаков, тізең, фудтрак турғыс салған. Фудтрак – фургон, аннаң сосискалар, хот-догтар, мороженай сатчалар. США-да олар ХIХ чӱс чыллардох тузаланысха кирілгеннер. Хайди таныхтаан Айтас Эдуардович, ол «Сытый бай» кафенің адынаң тоғынча. Олар пастап, пасхазы чіли, хазаннарда чиисті пызырарға cағынғаннар. Че экономика тилізі министерствозында фудтрак турғызарға чӧп пиртiрлер. Тоғысчы ӧме Ӱртӱн тойына хан, ӱгре, потхы, хашлама, плов, оох халас, нымырттығ пудинг тимнеп салтыр. Пір порцияның улии – 150 грамм. Ханның паазы 180 салковай, чарбалығ ӱгренің – 150 cалковай, потхының – 150 cалковай, хой идінең хаарылған яблахтың – 350 cалковай.
Кӱлӱк чон иртеннең мӧӧт, мискелер, ӱӱҷік тамаан сат парчатхан. Асхыс чоғархы аалның чуртағҷызы Павел Чистанов садыға ханны, хойның істі-харнын, айранны, аарчыны, талғанны сығарған. 25 частығ оол чоохтапча:
– Пу тоғысха іҷем Инна Ильинична тартхан. Ол Асхыстағы поликлиникада медсестра полып істенче. Хойларны Ӱртӱн тойына соххабыс. Позыбыс ханны урғабыс, хоорылған кӧчедең талғанны тимнеебіс. Талғанны чарым килограммнаң сатчабыс, аның паазы – 150 салковай. Пір килограмм хан паза іcті-харын 300-ер салковайға турча, пір литр айран – 200 салковай, чарым литр аарчы – 150 салковай. Чон пісті таныпча, киртінче, аннаңар садығ чахсы парча. Ханны паза істі-харнын орыстар хынып садысчалар. Олар хакастар чиизінің тадиин оңарып алғаннар осхас.
Илимор аалдағы Топоевтер национальнай ӱлӱкӱннерні иртірбеске кӱстенчелер. Ярослав Михайловичтің паза Жанна Захаровнаның пис пала. Чыл пазында садығнаң Диананаң Аяс айғасханнар. Ӱртӱн тойына олар чарба, талған, палых одын, палых ӱзӱргенін тимнеп салғаннар. Хайди таныхтаан Диана Ярославовна, чарбаны паза талғанны кізілер чахсы садысчалар. Чон палых одын тӧреміл кирексіпчеттір. Кетаның ӱзӱргенін Диананың хада хонғаны Магадан облазынаң ыс пиртiр. Ол анда тоғынча. Чиит ипчі таныхтапча:
– Паалар олох ла. Пір килограмм талған 300 салковайға турча, чарба – 200 салковай, палых оды – 250 салковай. Чарым килограмм кетаның ӱзӱргенін 4 муң салковайға сатчабыс. Ӱлӱкӱннерде тоғынарға кӧнік парғабыс. Туғаннарыңа, таныстарыңа тоғасчазың, пасхазын кӧріп алчазың. Кӱн айас полза, кізінің кӧңні уламох кӧдірілче.
Матырлар мӧрійі
Ӱртӱн айының 21-ҷі кӱні cпорт мероприятиелерiне пай полған. Чӱгӱріснең айғасчатхан улус «Нацияның крозында» кӱзін сынаан. Пӱӱл Хакасияда пас меетке 3 муң артиинаң кізі cыхтыр. Кічіглер 1000 метр тобырғаннар, пасхазы – 4000 паза 6000 метр. Кибірліг спорт кӧрімнерiне хынчатханнар, тізең, «Матырлар мӧрійі» ачыхта чыылысханнар. Программа тӧрт марығдаң пӱткен: гиря кӧдірері, ағаснаң тартыс, хапчаң тас паза тобит.
Иң пурун пас меетке гиревиктер сыхханнар. 14 – 18 частығ ооллар 16 килограмм пасчатхан гиряны кӧдіргеннер, хыстар – 12 килограмм пасчатхан тирігні. Кӧрілген тус – 5 минута. Пастағылар санында полған Анатолий Аланов, аның іҷезінің хыс фамилиязы – Артонова. Пӧзік, сылағай Толя Боград аймаандағы Бородино аалдаң. Ол 11-ҷі класстың ӱгренҷізі, гиря кӧдірерінең читінҷі чылы айғас парир. Тренері – Александр Николаевич Шипилёв. Толя гиряны 152 хати кӧдірібіскен. Пу чидіг чир-суғҷыбысха кӱмӱс медаль ағылған. 19 частығ Николай Коков улуғлар аразында кӱзін сынаан. Ағаа 32 килограмм пасчатхан гиряны кӧдірерге киліскен. Николай Ширадаң, ол орындағы техникумда 4-ҷі курста ӱгренче. Хакас оол тренировкаларға неделяда пис хати чӧрчеттір. Иң улуғ чидии – 2022 чылда тиксі Россия мариинда чиңіс тутханы. Турнир Улан-Удэде ирткен. Ӱртӱн тойында Коля гиряны 60 хати кӧдірібіскен. Ол тӧртінҷізі полыбысхан.
Ширада гиря кӧдірерінҷе секцияны Александр Чипизубов апарча. Тренернің чооғынаң, киректер хомай нимес парча. Секцияа 30-ча кізі тӧреміл чӧрчеттір, оларның санында 10 хызыҷах. Иң кічіг спортсменге 8 час. 28 ӱртӱнде ширадағылар Хызылчар крайындағы Балахта поселоксар марыға парчалар. Анда 14 кізі аралазарға пӧгінче. 6 чарыста Харатаста 14 часха читкелек олғаннарға марығ иртер. Ӱртӱн тойында ширадағылар пір алтын паза пір хола медаль утып алғаннар.
Ағас тартызарынҷа марығ парча
Ағаснаң тартыста саңай ла орыс алыптар устарын кӧзіткеннер. Оларны кӧдірімнері хоостыра ікее чарыбысханнар: 85 килограммға теере паза 85 килограммнаң артых пасчатханнар. Итсе, прайзының хайиин тартхан Данила Баранов. Ол, ағаснаң тартызарында аралазып, Константин Абатулиннің пазынаң азыра сала ла учуғыбыспаан. 32 частығ ирен Самарадаң полтыр. Хакасиязар пір неделяа тынанып аларға килген. Ол чоохтапча:
– Алында Сибирьде поларға киліспеен, аннаңар прай ниме чапсытча. Пілгем, Хакасия – национальнай регион. Ӱртӱн тойына ӧнетін орыс чонның кӧгенеен киcкем. Санапчам, пасха чоннарның культуразынаң танысчатсаң, позыңның чоныңның культуразын ідӧк кӧзідерге кирек. Кӧгенек позымни, аны удаа кис чӧрчем. Хакасияда аллығ чӱректіг чон чуртапчаттыр. Ағаснаң тартызарында пастағызын на кӱзімні сынадым. Іди табырах утыр саларбын тіп сағынмаам. Ӧскен сыным 194 сантиметр, пос туста баскетбол ойнирға хынадырбын.
Че сынап пӱӱлгі Ӱртӱн тойының матырына Андрей Кляузовты санирға чарир. Ағбан пилтірі поселоктың чуртағҷызы гиря кӧдірерінде, ағаснаң тартызарында паза хапчаң таста чиңіс тутхан. Пайрамда тастың орнына 40 килограмм пасчатхан хапты тимнеп салғаннар. Кляузов аны иңнi азыра ікі минута аразына 30 хати тастабысхан.
Тобиттеңер чоохтаза, кӱскӱзін араласчылар саны кӧп полбинча. Иреннердең Виктор Бутанаев (Таштып аймаа) чиңіс тутхан, Ағбанның чуртағҷызы Виктор Вяткин – ікінҷі орында. Хола медаль ӱчӱн харбасханнар Моисей Шулбаевнең Василий Сагалаков. Салтарында Шулбаевке оң полған. Ипчілердең марыға ӱс ле кізі cыхтыр. Алтын медальны Валентина Епишина (Сорығ) холға кирген.
Ӱлӱкӱнде город чуртағҷыларына паза аалҷыларға В.Г.Чаптыковтың адынаң Хакас филармониязының паза С.П.Кадышевтiң адынаң чон чайаачызы кiнiнiң артисттерi паза чайаачы чииттер ыр-сарыннар, сiлiг теелбектер сыйлааннар.
Сомнар Ольга Байкаловани паза Равиль Дзязькони
Автор :
Татьяна Тютюбеева, Майя Кильчичакова
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде