Сағысты чӱгӱрiк итчеткен спорт кӧрімі
25.09.2024
Статья
Хакасияда ирткен чемпионаттың араласчылары паза тӧстегҷілері
Спорт. Россия тилекейде пастағы хазна полча, хайзы киберспортты спорт кӧрiмi тiп чарлабысхан. Ол 2016 чылда полған. Пу тустаң хазнаның регионнарында компьютер спортынҷа федерациялар тӧстел сыххан. Хакасияда, тiзең, федерациянаң Денис Шпигальский устапча
Хайди чоохтапча Денис Олегович, хазна ӱлгӱзi тиктең нимес киберспортты спорт кӧрiмнерiнiң санына кирген. Прайзы сизiнче полар, наа технологиялар – пiстiң таңдағыбыс. Хынчабыс ағаа пiс алай чох, че олар пiстiң чуртазыбысха хаҷанох тирең кiр парғаннар. Улам саарбахтар пiрiгiстерiнде.
– Удаа компьютер спортын геймерлернең алҷаастапчалар. Хай пiрее чииттер компьютерде аны-мыны кӧрглеп алып, пастары айлан сыхча, пiрееде чобағ даа пол парча. Компьютер ойыннары, тiзең, ол саңай пасха. Ол – спорт! Ойыннарның программаларын ӧнетiн специалисттер тимнепчелер. Олар олғаннарның миистерiн, хылыхтарын ардатпинчалар. Пу спорт кӧрiмiнең айғасчатхан спортсменнернiң сағыстары чӱгӱрiк пол парча. Аны удаа гонкаларнаң айғасчатхан спортсменнернең тиңнестiрчелер. Машина тiнiн тутчатхан спортсменнер, чол тастына ойладыбыспас паза азах меетке пурун чидер ӱчӱн, табырах сағынчалар. Компьютер ойыннарынаң айғасчатханнар андағох пол парчалар. Марығда утыр салбас ӱчӱн, чапчаң сағыстығ поларға кирек. Анзы оларға iдӧк анаң ӱгредiгде, тиксi чуртаста туза ағылча. Аннаңар пала ибде компьютер кистiнде кӧп тус иртiрчетсе, iҷе-пабалар оолахтарын пiссер пирiбiзерге кӱстенчелер. Мында олғаннар тусты тузалығ иртiрчелер нооза. Ағаа хоза, Хакасияның хайдағ даа пулиинда чуртапчатхан пала киберспортнаң айғас полар. Интернет пастыра ол ойынға хозылча. Ӧӧнi – аның кӱстiг компьютер техниказы ползын, – чарытча Денис Олегович.
Компьютер ойыннары ӧӧнiнде оолахтарға хынығ, аннаңар олар клубта кӧп. Спортсмен тренировкаларда утчатса, аны республиканың пiрiктiрiлген ӧмезiнзер алып алчалар. Компьютер ойыннарынҷа марығлар, тiзең, сыбыра иртче. Олғаннарны тимнирге паза марығларда паалирға федерация тренерлернi паза чарғыҷыларны сыбыра тимнепче паза санын алғытча. Олар ӧнетiн курстар паза ӱгредiглер иртчелер.
Хайди тiпче федерация устағҷызы Денис Шпигальский, тренировкалар иртiрерге техника пар полза даа, ол читкiҷе нимес. Аннаңар олар Хакасияның физическай культура паза спорт, чииттер политиказы министерстволарының грант марығларында удаа араласчалар. Утып алған ахчаа хоза техника аларға кӱстенчелер. Компьютерлер кӧп полза, марығлар улам удаа иртiрер оңдай полар нооза. Анда, тiзең, Хакасияның прай муниципалитеттерi араласча. Ортымахти 100 – 200 кiзi.
Федерацияның араласчызы Александр Коротков, «Молодёжная инициатива-2024» грант мариинда аралазып, «Стрим-школа «Территория будущего!» проектте утхан. Ол киберспорт паза фиджитал мероприятиелерiн чарыдарға полысча. Анзы федерацияа хоза парыс ағылар. Чоохтирға кирек, киберспортча марығлар прай тикке иртчелер. Россия синiнде дее иртчеткен марығлар ӱчӱн федерация тӧлепче.
Хакасияда компьютер спортынаң 30-ча олған айғасча. Пӧзiк чидiглерге читчеткеннернiң аразында Владислав Кулемеевтi паза Денис Мамышевтi адирға чарир. Владислав Ағбандағы 22№ школада улуғ класстарда ӱгренче.
Денис – Н.Ф.Катановтың адынаң Хакас хазна университедiнiң студентi.
Владислав Ағбан городта тӧреен-ӧскен. Компьютер спортынаң ӱс чыл азыра айғас парир. Аның алнында чиит оол олғаннарның хоза ӱгредии кiнiнзер чӧрчеткен. Анда ол iдӧк компьютер кружогында араласхан. Владислав компьютер ойыннарына кiчiгдең тартылған. Аның кӧңнiне стратегия ойыннары кiрче. Анда кӧп сағынарға, табырах, орта таллағ идерге кирек.
Нинҷе-де чыл Владислав каратэ секциязына чӧргенӧк, че ол ағаа хынығ полбин сыххан. Компьютер спорты, тiзең, аның хайиин тарт сыххан.
– Компьютер ойыннарынҷа клубсар пар килгем. Анда турнир иртчеткен. Мағаа пу спорт кӧрiмi хынығ пiлдiр парған. Орта чоохтаза, чағын паза пiлдiстiг. Клубсар чӧрер алнында мин, ибде удаа компьютер ойыннарын ойнап, кӧп тус хорат салҷаңмын, амды, тiзең, мин, олаңай одырбин, турнирлерге тимненчем. Улуғларым мағаа пiр дее ниме тiбинчелер. Олох туста мин позым экран алнында ӱр одырарға кӱстенминчем, пiлчем, ол кiзi хазиина хомай теелче.
Компьютер ойыннарының тузазы улуғ тiп санапчам. Ол кiзiнiң миизiн табырах тоғындырча, iдӧк спортсменнер пiр ӧменең тоғынарға ӱгренчелер. Мыннаң мындар пу спорт кӧрiмi чахсы тилир тiп санапчам. Ағаа федеральнай синде улуғ хайығ салылча. Нинҷе-де чыл мының алнында пiстiң региондағы чииттер тиксi Россия синiнде ирткен марығда чиңiс тутханнар. Анда сыйых чыындызының синi пiр миллион салковайҷа полған. Сағынчам, пасха спорт марығларына андағ турыстығ ахча позытпинчалар, – чоохтапча Владислав Кулемеев.
Пӱӱл Хакасияда киберспортча республика чемпионады ирткен. Анда Владислав «технический симулятор» кӧстегде чемпион полыбысхан.
Пӱӱл хазнада пастағызын на «Игры будущего» чоннар аразындағы спорт турнирi ирткен. Чиит спортсменнер Хазан городта чыылысханнар. Анда компьютер спортынаң айғасчатхан спортсменнер кӧп араласхан. Марығның сыйыхтығ чыындызы 10 миллион доллар полған! Марығ пайрамни азылғанда, Россия президентi Владимир Путин араласхан. Хайди ол таныхтаан, «Игры будущего» турнир спортты, науканы, ӱгредiгнi паза технологияларны пiрiктiрче.
Марығда тилекейнiң 260 ӧмезi паза 2 муң азыра спортсменi араласхан. Марығ 21 кӧстегҷе ирткен. Ол робототехника, киберспорт, виртуальная реальность, искірiглiг технологиялар, арған сағыс паза даа пасхазы. «Игры будущего» чыл сай иртчеткен марығ полар, аннаңар спортсменнерге ӧсчең кӧстег пар.
Владислав Кулемеев чағдапчатхан чылда школа тоозар. Ол «ударник» полча. Ӱгренҷi, пiрге хазна сыныхтағларына тимненiп, маң чохха тӱсче. Чиит оол чуртазын аннаң андар искірігліг технологияларнаң палғалыстырарға пӧгiнче.
– Хазна ӱлгӱзi IT-cпециалисттерiне кӧп хабазығ кӧр салған. Кӧзiдiмге, тӧбiн проценттiг ипотека. Амғы туста чурт суриин пӧгiп аларға оой ла нимес, аннаңар, пу кӧстегҷе профессия алып алзам, тоғыс табарынаң сидiксiнiстер полбас паза чурт суриин пӧгiп алар оңдай полар тiп санапчам, – сағызынаң ӱлесче спортсмен.
Компьютер ойыннарынҷа тренировкалар неделяда нинҷе-де хати Пушкиннің орамазындағы 99 «А» тураның iкiнҷi хадылында (Республиканың Шахмат туразы) иртче. Анда федерацияның алынҷа орны пар. Аны араласчылар пос алынҷа «лагерь» адапчалар.
Сомнар Денис Шпигальскийни
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
