Тоғыс чорығы. Хакасия пазы Валентин Коновалов iкi кӱн Москвада тоғынды

Ӱртӱн айының 24-ӌi кӱнiнде Хакасия пазы Валентин Коновалов Россияның энергетика министрi Сергей Цивилевнең тоғасхан. Кӱн суриина нинӌе-де сидiк сурығ сығарылған, оларны федеральнай кiннiң хабазиинаң на пöгiп аларға чарир.

Iди хазна программаларынӌа Хакасияның чарытхы читiрӌең комплексiнiң iзестiг тоғызын чахсыландырарынаңар чоох парған. Пӱӱнгi кӱнде республиканың хай пiрее муниципалитеттерiнде наа подстанциялар пӱдiрерге, сетьтернiң кӱc иртiрӌең оңдайларын алғыдарға киректелче.

Хакасиядаң iскер хара тасты ызар синнi öскiрерi паза РЖД-ның ӱстӱнзархы, iдöк алтынзархы-кидеркi порттарзар хара тасты ысчаң пааларын тӱзiрер оңдайлар ӱзӱрiлген.

Валентин Коновалов Хакасияа хайчатхан паза федеральнай синде уғаа кирек чуртас-экономика сурығларын пöгерге хабасчатхан ӱчӱн Сергей Цивилевке алғызын читiрген.

Ӱртӱн айының 25-ӌi кӱнiнде Валентин Коновалов Россияның Хазна Думазының энергетикаӌа комитедiнiң алғым чыылиинда чоох тутхан. Ол комитет кнезi, Хакасиядаң табылған депутат Николай Шульгиновтың устаанынаң ирткен. Чыылығның ööн сурии – хазнада иргiлен парған чылығ читiрӌең тирiгнi амғы тусха килiстiре паза экологияа ӱрег чох тирiге алыстырары.

Валентин Коновалов искiриинде Россия президентi Владимир Путиннiң чахиинӌа Сибирь паза Ыраххы Восток регионнарына тимнелген наа федеральнай программаның проектiне Хакасияның чöптерiн искiрген. Ол иргi тирiгнi нааға алыстырарға хығырча.

Республика пазының таниинаң, Хакасия правительствозы федеральнай кiннең тöремiл тоғыс апарған сылтаанда 2023 чылдаң сығара Ағбан паза Харатас городтар «Экология» нацпроекттiң «Арығ кии» проектiне кирiлгеннер. Регион правительствозы пастаанаң проектке хара тастаң пасха чылығ пирӌең оңдайларға кiрерiнӌе чуртағӌыларға хабазарынӌа мероприятиелер кирiлген.

Че, Хакасия пазының сöстерiнең, «Арығ кии» проекттiң мероприятиелерi, ол санда чарытхы котелларын турғызары, ööн сетьтерге хозылары, ыс сығарбинчатхан хара таснаң тузаланары паза пасхазы, Хакасияның iкi ле ööн городына теелчелер. Ағбан-Харатас агломерацияның нинӌе-де аалы паза посёлогы пу федеральнай проектке кирiлбин халчалар. Пу сидiк сурығны иргi тирiгнi нааға алыстырарынӌа наа федеральнай программа пастыра пöгерге чарир.

Сом Хакасияның Москвадағы тöремiл представительствозыни

Сомда: Валентин Коновалов наа программаның кирексiнiзiнӌе чоох тутча