Чӱрек чылиин, паарсазын сыйлапчалар
Сыйыхтас. Киӌее М.Ю.Лермонтовтың адынаң драма театрында Хакасияның иң артых ӱгретчiлерiн чеестееннер
Тиксi Хакасияда 230 азыра ӱгредiг организациязы саналча, оларда прай 10 муң азыра ӱгретчi тоғынча. Ӱгретчi кӱнi алнында оларның санынаң республиканың паза хазнабыстың ӱгредiг киреене улуғ хозым ит салған, кöп чыл профессиязына тӱгеде пирiнiп iстен салған 80 азыра тоғынӌаа аарластығ аттар паза танығлар читiрiлген.
– Олғаннарға пiлiстер пирерi – оой нимес тоғыс. Айғасчатхан киреене саңай хынчатхан на кiзiлер палаларнаң тоғын поларлар. Ӱгретчi ӱгренӌiлерiне чӱреенiң чылиин, паарсазын сыйлапча, оларзар хаӌан даа улуғласнаң хайча, – мындағ чылығ сöстернең айланған залға толдыра чыылысхан ӱгредiг кирее тоғынӌыларынзар Хакасия пазының тоғызын толдырчатхан Татьяна Курбатова. Iдöк ӱгретчiлернi профессия ӱлӱкӱнiнең Ööркi Чöп кнезiнiң орынӌызы Пётр Воронин, ӱгредiг паза наука министрi Анатолий Бутенко паза пасхазы даа алғыстааннар.
Пайрамда таныхтатханнар санында Асхыс аймаандағы Калининдегi школаның ӱгретчiзi Дора Кочелорова полған. Ағаа кöп чыл тӱзiмнiг тоғынғаны, пöзiк узы паза Хакасия тилiзiне улуғ хозым иткенi ӱчӱн «Хакасияның iстенiс сабланызы» медаль читiрiлген.
Дора Прокопьевна ӱгредiг киреенде 48-ӌi чылы iстен парир. Ол пасталығ класстар ӱгретчiзi полча, пӱӱл 1-ғы классха ӱгренӌiлернi алып алған. Улуғ опыттығ ӱгретчi Асхыс аймаанда ӱгредiг устанызында, коррекционнай школада социальнай педагог полып тоғынғанох, че анда пiр дее истенмеен. Ӱгретчi тоғызына сағынған, анаң аны Калининдегi школазар нандыра хығырғаннарында, ол пiр дее iкiнӌiлебин ынабысхан. Итсе, Дора Прокопьевна кiчiгде актриса поларға сағынғам тiп чоохтапча. Че iӌезi ағаа сигiс класс соонаң педучилищезер кiрерге теен. Чиит хыс iӌезiнiң сöзiнең тоғыр поларға тiдiнмеен. «Че амды iӌем ӱгретчi чолын таллирға полыс пиргенiне тың öрiнчем. Ӱгретчi полып, мин артист тее, ырӌы даа полчам. Кем не поларға килiспинче», – ӱлесче сағыстарынаң пасталығ класстар ӱгретчiзi.
Дора Прокопьевна ӱгренӌiлерiн хакас тiлiне кöнiктiрерге хынчам тiп чоохтапча. Че улуғ опыттығ ӱгретчiнi амғы туста олғаннарның тiл пiлбинчеткенi уғаа хомзындырча. «Хакас тiлi, сағынғанда, сидiк тiл. Ол пiске Худайдаң пирiлген тiл полар тiп санапчам, че аны ӱгренерге сағынчатханнар ӱгренiп алчалар», – чоохтапча ол.
Iдöк пöзiк танығлар алғаннар санында полған Виталий Чебодаев. Ол Асхыс аймааның Ис пилтiрiндегi школазында iстенче, тархын, география, ОБЗР предметтернi апарча. Ағаа «Россияның ӱгредiг киреенiң аарластығ тоғынӌызы» ат пирiлген. Виталий Захарович ӱгредiг киреенде iдöк кöп чыл iстен парир. Тоғызын ол 1985 чылда пастаан, пасталығ чаа тимненiзi (НВП) предметтi апарып. Анаң ол ОБЖ тiп адал сыххан. Пӱӱл ӱртӱн айынаң аның программазы пазох нааӌылалған, амды ол ОБЗР тiп адалча. Виталий Захаровичтiң чооғынаң, предметтiң программазы тың на алыспаан. Ол 8 класстаң апарылча, амды олғаннарға чаа предметтерiнӌе практика уроктары кирiлче. Iди олар, кöзiдiмге, автоматтарны паза пасха даа тирiглернi ӱгренчелер.
Ирен iдöк ӱгретчi полар тiп сағынмаандыр. Ол, пабазының чолын пазып, агрономға ӱгренерге иттiр. Че армиядаң кiчiг хырлас айында айланғанда, ӱгренерге кiрерге маңнанмаан. Анаң класс устағӌызы полған Константин Чертыков сержант званиелiг чиит оолны НВП предметтi апарарға школазар хығырып алтыр, чайғызына читiре тоғынып ал, анаң кöрiнер тiптiр. Iди Виталий Захарович амғы тусха читiре школада iстен парча.
Сом Дмитрий Сунчугашевти
Сомда: Дора Кочелорова паза Виталий Чебодаев аарластығ сыйыхтарға турысханнар
Пн | Вт | Ср | Чт | Пт | Сб | Вс |
30 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |