Полина Николаевна Миягашева – Таштыптағы 2 № школада 50 чылға чағын тоғын салған ӱгретчi. Ол англия тiлiн апарча. Мин аның чуртас чолынаңар чоохтап пирерге сурынғам

Полина Николаевна позы Таштып аймаанаң, Хызыл суғ аалда тöреен-öскен. 7 класста ӱгренчеткенде, iӌезi ах чарыхтаң парыбысхан, пабазы пала тöреен соонаң оларны тастабысхан. Хызыӌахты ууӌазы öскiрген. 5 классха теере Полина Хызыл суғда ӱгренген, анаң 6-8 класстарда – Таштыптағы пансионда. Сағысха кирче:

– Пансионда олғаннарны хазна прай тонандырӌаң, азыраӌаң. Сағысха кiрче, хайди пiс пирген узун киптернi, посха килiстiре идiп аларға тiп, хысхаӌах хыплабысчаңмыс. Столовайда чиис тимнирге полысчаңмыс, стол салчатса, тееснең дежурить полӌаңмыс. Олған тузы хынығ иртчең.

9 – 10 класстарда Полина Николаевна Чоғархы Таштыпта ӱгренген. Школа тоосхан соонаң Ағбандағы ӱгретчiлер институдының пасха хан тiллерi пöлиинзер кiрiп алған. Ол полған 1969 чыл. Аалдағы хыстар-ооллар аның алнында городта пiр дее полбааннар, прай ниме оларға пасхаӌыл пiлдiрген. Ол туста Таштыптаң Асхысха теере асфальт чох полӌаң.

– Пастағызын аӌам минi юристке ӱгренерге чöптеен, че андада Хызылчарзар парарға кирек поларӌых. Чағыннарым минi iди ырах ызарға хынмааннар, аннаңар чöптезiп алған соонаң Ағбанда ӱгренерге чарат салғабыс. Марығ улуғ полған, мин школада немец тiлiн ӱгренген ползам даа, кiрiп алғам. Пiстiң группада 3 ле «немец» полған, аннаңар пастағы туста англия тiлiнең илееде наа сöс ӱгренерге килiскен. 4-5-ӌi курстарда пiс хоза немец тiлiн ӱгрен сыххабыс. Олох арада Чертыгашевтiң орамазында наа ла пӱдiр салған общежитиеде чуртап сыххабыс. Аның алнында физмат пöлии общежитиезiнде хыстынызып чуртаӌаңмыс. Харах алнында ам даа турча, хайди наа ла ӱгренерге килгенде, ол иргi общежитиенiң коридорларында, пасхыс ачыхтарында орғаннар турӌаңнар, анда абитуриенттер хонӌаң, че пiр дее ниме оларның чiтпеӌең, – аннаң андар сағысха кирче ӱгретчi.

1974 чылда чиит ӱгретчiнi Ибiгдегi школазар ызыбысханнар. Анда пiр чыл тоғынып, Полина Николаевна Таштыптағы 2 № школазар килiбiскен. Ол туста Терентий Евгеньевич Шулбаевнең хоных тöстееннер. Пӱӱл олар хонғаннаң 50 чыл толча.

– Терентийнең хада пiс ööремнiң Аңчулда иртчеткен тойында танызып алғабыс. Ол туста пiс iкöлең тоғынчатхабыс – мин школада, ол Таштыптағы училищеде. Хоныхта 2 хыс тöреен. Улии Кемеровта чуртапча, институтта ӱгретчi полча. Кiчии Ағбанда бухгалтер полып тоғынча.

– Сидiк нимес пе ол син чыл школада тоғынарға?

– Пала суулазына ӱгрен парғам нооза. Паза пенсия ахчазына чуртирға, сағынчам, оой нимес.

– Олғаннарны сидiк пе англия тiлiне кöнiктiрiп аларға?

– Тiл ӱгренерге хынчатхан пала предметке хайди даа тартылар. Пасха саринаң кöрзе, наа школа программазы най маңзыратча. Кöзiдiмге алза, мының алнында англия алфавидiн ӱгренерiне 2 четверть пирiлӌең, ам, тiзең, 1 ле. Паза тiлнi 5 класстаң ӱгренӌеңнер, ам – 2 класстаң. Предмет пала пазына чахсы сиип парча, хаӌан iӌе-пабазы ибде аннаң хада урокта ирткен нименi хатапчатсалар.

– Полған на класста англия тiлiн матап ӱгренчеткен олғаннар табыл ла парча. Сағысха кем иң пурнада кiрче?

– Марина Шулбаева, Лариса Сагалакова, Лариса Тинникова, Дима Дрыгин, Сережа Ласкин, Саша Афлин, Аня Яковлева...

Ӱгренӌiзi Мадина Ахпашева газетада хайди-да пасхан: «...Полина Николаевна Миягашева пiстiң класс устағӌызы паза немец тiлiнiң ӱгретчiзi полған. Прай класс немец тiлiн таллап алғаны Полина Николаевнаны маңат, кӱстiг ӱгретчi полчатханын киречiлеен. Класснаң устап сыхханда, пiс кöрӌеңмiс, хайди ол амыр оңдайынаң саарбахтарны нымзатчаң. Иптiг кöңнiлiг Полина Николаевна класс частарында посты орта тудынарға ӱгретчең, iди пiс удур-тöдiр, кiзiлернi улуғлирға кöнiкчеңмiс...»

Сом авторни