ХакНИИЯЛИ-ға – 80 чыл. Киӌее пайрамнығ тöреен кӱнiн ӱгретчi, iстезiгӌi, экономика наукаларының кандидады Пётр Бурнаков таныхтаан

Пётр Петрович Хакасияның тiл, литература паза тархын наука-iстезiг институдында ӱр iстен салған. Ол экономика паза социология секторынаң устаан, институттың ученай хачызы полған.

Пётр Бурнаков Асхыс аймаандағы Оот пилтiрi аалда кöп палалығ сöбiреде тöреен. Паба-iӌезi Пётр Афанасьевич паза Дарья Егоровна тöрт оол öскiр салғаннар. Оларны ирепчi иб аразында хайынарға, чахсы ӱгренерге кöнiктiрген. Палаларының полғаны ла профессия алып алған. Михаил Новосибирсктегi электротехническай институтты тоосхан, Григорий – Москвадағы хазна университедiн, Константин – Москвадағы геодезия паза картография институдын, Пётр – Новосибирсктегi чон хонии институдын.

Пётр Петровичтiң экономика кöстеене паза спортха хынызы армияда служба апарчатханда тöреен (1968 – 1970 чч.). 1970 – 1975 чылларда ол чон хонии институдында «планирование промышленности» специальностьча ӱгренген. Ағаа «экономист» квалификация пирiлген.

Хакасияның тiл, литература паза тархын наука-iстезiг институдында Пётр Бурнаков 1981 – 1985, 1997 – 2005 чылларда тоғынған. Пастап кiчiг наука тоғынӌызы полған, соонаң – улуғ. Iдöк ол институттың экономика секторының устағӌызы, директор орынӌызы полып iстенген. Аның iстезiг тоғыстары экономика секторының аал хонии сидiксiнiстерiне чарыдылған. Ол «Современное состояние отраслей промышленности» (1982 ч.), «Агропромышленный комплекс Хакасской автономной области» (1983 – 1985 чч.), «Анализ современного состояния перерабатывающих отраслей промышленности Хакасии» (1986 ч.), «Современное экономическое положение и уровень жизни населения в Республике Хакасия» (1998 ч.), «Кризис в реальном секторе экономики России и ее субъекте Хакасии: причины и пути выхода» (1999-2000 чч.) темаларнаң айғасхан. Аның iстезiглерiнӌе наука статьялары сығарылған.

Аар чылларда Пётр Петрович банк секторында iстенген паза лекциялар хығырған. Аннаң пасха ол халых тоғыснаң кöп айғасхан.

Пётр Бурнаков iкi пала öскiр салған. Аяна экономика институдын тоосхан, Виталий – электротехническай институтты. Олар амды Москвада чуртапчалар, тоғынчалар.

Сом авторның архивiнең