Чағынғы туста тузаланысха кирілерлер
23.10.2024
Хабарлар
Хакасия пазы Валентин Коновалов республиканың нааҷылалчатхан олған имнег туразының тузаланысха хаҷан кирілерін сыныхтаан
Нацпроект. Киҷее Хакасия пазы Валентин Коновалов Ағбанда хаҷаннаң нааҷылалчатхан олған имнег туразының паза Арбан орында пӱдірілчеткен олған имнег туразының тимненізін сыныхтаан
Республикада «Хазых хайраллиры» национальнай проект хоостыра илееде объект пӱдірілче паза нааҷылалча. Аны хоостыра Ағбанда Чертыгашев орамазындағы республиканың олған имнег туразы хаҷаннаң нааҷылал парир. Амды аның тимненізін сыныхтирға паза паалирға чӧрген Хакасия пазы Валентин Коновалов. Аннаң хада полғаннар республика устағҷызының орынҷызы Юрий Курлаев, Хакасияның хазых хайраллаҷаң министрі Олег Ананьевский паза подряд организациязының устағҷылары.
Пастап таныхтирға кирек апарылчатхан тоғыстарның алғымын. Пу объектте ӧӧн подрядчик полча «СЗАСК-Водрем» компания. Тастынаң кӧрзе, имнег туразының прай даа корпустары аймах ӧңніг сіліг плиталарнаң чабыл парғаннар. Че оларның істінде тыхтағ тоғыстары ам даа хыызында апарылчалар, прай чирде тозын пырлапча.
Валентин Олеговичке пастап олған туразының стационар пӧлиин кӧзіткеннер. Анда компьютер томографиязын иртірҷең нап-наа аппаратура турча. Наа компьютер оборудованиезі ікі хости кабинетте тоғынар. Прай аппаратура тоғынарға тимде полчатханы таныхталған.
Педиатрия пӧлии прай нааҷылалған, аның істінде чазағлығ тоғыстар апарары ла халтыр. Итсе, андар чылығ ам даа пирілбеен. Хайди подрядчик устағҷызы Валентин Коноваловха искірген, пу неделяда андар чылығ пирер сурығ пӧгіл парар. Пӧліктегі хай пірее стенелерні, сайап, хати пӱдірерге киліскен, прай кӧзенектер нааға алыстырылғаннар. Лифттер ам даа тоғынминчалар. Объектте кӧп тоғысчы хайынча, техника даа пар. Амды пу пӧліксер кирек имнег оборудованиезін ағылып пастапчалар.
Имнег туразының ікінҷі корпузында ам даа илееде тоғыс апарарға кирек. Анда ам чарытхы проводтары тартылчалар. Ӱс хадылзар сығар пасхыстарның перилалары чоғыл, сизіктіг, иптіг чӧрерге кирек. Пӱкӱлее алза, имнег туразы ибіркізін ам даа иптирге кирек, аның пір ле саринда тротуарлар плитканаң чабыхтар. Подряд организациязының кізілері Хакасия пазын чағынғы туста прай тоғыстарны толдыр саларбыс тіп ізендіргеннер. Тыхтағ, пӱдіріг тоғыстарына федеральнай паза республика бюджеттерінең 700 миллион салковай позыдылча.
Ідӧк Валентин Коновалов Ағбандағы Арбан орында пӱдірілчеткен олған имнег туразын кӧрерге чӧрген. Ол учреждение Итыгиннің орамазында орныхча. Андағы чолҷа сыбыра кӧп автомобиль чӧрче, ол санда аар таарлағ тартчаң машиналар. Амды пу имнег туразы тимге сых парир. Олған поликлиниказынзар кӱнде 200-че пациент чӧрері кӧріл парған. Арбан – ол наа орын, анда уғаа кӧп наа тура пӱдірілген, чуртағҷылар саны кӧп полар, ол санда, палалар саны.
Пу объект ідӧк «Хазых хайраллиры» национальнай проект хоостыра пӱдірілче. Амды поликлиниканың ибіркізі иптелче, кірлес пӱдірілген, постары чӧр полбинчатханнарға пандустар турғызылған. Объект 2025 чылда тузаланысха кирілерге кирек.
Пістің хазнада, ідӧк республикада палаларның хазиин хайраллирына «Хазых хайраллиры» нацпроект чахсы хабасча.
Сом Дмитрий Сунчугашевти
Автор :
Николай Султреков
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
