Чахсы ӱгренче, спортнаң айғасча
23.10.2024
Статья
Дарья Пакачакова
Пiстiң ӧткiннерiбiс. Дарья Пакачакова Асхыс аймаандағы Кызлас аалда чуртапча, 11 класста ӱгренче. «4», «5» паалағларға ӱгренчеткен хыс школада ӱгредiг министрi полча паза спортнаң айғасча, класстағы ӧӧрелерiнең хада имҷi поларға сағынча
Пу ӱгредiг организациязында пӱӱл 11 класста тӧрт ле пала – ӱс хыс паза пiр оол. 9 классха теере, тізең, 18 пала полған. Олар Асхыстағы 18№ училищеде паза Ағбандағы профессиональнай ӱгредiг учреждениелерiнде аймах специальностьтар алчалар. Школада халғаннары прайзы чахсы ӱгренче.
Дарья Пакачакова класс командирi полча. Уроктар соонаң мылтыхтаң атарынҷа секцияа чӧрче. Аны тренер Владимир Андреевич Колченаев апарча. Олғаннар анда «воздушканаң» атчалар. Школаның пастағы хадылы алтында ӧнетiн зал пар. Тренировкалар анда иртче. Олғаннар 10 метр ырахтын атарға ӱгренчелер.
– Тренер Владимир Андреевич пiске мылтыхты холда пик тударға, атыбысса, чоғар кӧдiрерге, предохранитель хаҷан суурарға, хорғыс чох тудынарға ӱгретче, – чарытча чиит спортсмен.
Пу наада Асхыс аймаандағы школалар ӱгренҷiлерi аразында мылтыхтаң атарынҷа марығ ирткен. Анда Кызластағы оол-хыстар хомай нимес салтар кӧзiткеннер. Дарья Пакачакова iдӧк волейбол секциязына чӧрерге маңнанча.
Ӱр ниместе Дарья iдӧк Хазан городсар олимпиадаа пар килген. Анда араласханнар олғаннар, хайзыларына орыс тiлi тӧреен тiл нимес. Марыға аймах субъекттердең 200 азыра олған чыылысхан. СНГ хазналарынаң полғаннарох.
Марығның таллағлығ чардығын ӱгренҷiлер чайғызын ирткеннер. Олар интернет пастыра пирiлген тоғыстарны толдырғаннар, кӧп балл чыып алғаннарны олимпиаданың халғанҷы чардығында аралазарға хығырғаннар.
– Ӱгретчiм олимпиадада араластырғанда, тоғыр полбаам. Чиңiстеңер, чорыхха сығардаңар сағынмаам. Нандырығ килген, Хазан городсар учуғарға кирек тееннер. Хайхап таа парғам! Марыға iдӧк Пии аймаандағы Хызыл хара суғ аалдағы школаның 8-ҷi класс ӱгренҷiзі Сергей Тюкпеев устағҷызынаң хада парған.
Олимпиадада пастап пiс тоғысты пазып толдырғабыс, соонаң чоохтазығ чардығы полған. Иртен олимпиада тоғыстарынаң айғасчаңмыс, кӱн ортызы соонаң пiстi городча экскурсияларға, театрларҷа, музейлерҷе ал чӧргеннер. Олардаң айланзабыс, тоғыстарыбыс салтарлары тимде полған. Пiске алҷаастарыбыснаң танызып алар оңдай пир турҷаңнарох.
Призер полыбызарға, олимпиада араласчыларына 64 балл чыып аларға киректелген. Минiң 62 балл пол парған. Тоғызымны кӧрiбiскенде, эксперттер мағаа балларымны читiре санабаанын сизiнгем. Iди минiң тиксі 64 балл пол парған, призерлар санына кiргем, – ӧрiнiзiн чазырбинча абахай хыс.
Олимпиадада призер полыбысханы ӱчӱн ағаа Хазандағы университетсер ӱгренерге кiрчетсе, ЕГЭ балларына хоза баллар пирiлер.
Че Дарья Пакачакова имнег кӧстеенҷе ӱгренерге кiрерге сағыс тутча. Аның улуғ пиҷезi Ағбанның пiр имнег туразында медсестра полча. Ол ХГУ-ның имнег колледжiн тоосхан. Дарья терапевт поларға сағынча. Ағбанда, Новосибирскте алай Хызылчарда профессия аларға кӧстег турғысча.
– Ирткен чылда Томсктағы имнег университедiнiң ӱгретчілерi Асхыстағы культура туразында ӱгренҷiлернi имнег специальностьтарынаң таныстырғаннар, мастер-класстар иртiргеннер. Пiс андар прай класснаң чӧргебiс. Анда минiң имҷi полар сағызым улам тыып парған паза хада ӱгренчеткен ӧӧрелерiм iдӧк имнег киреенең палғалыстығ профессия аларға сағыс тут сыхханнар, – ӱлесче Дарья.
Тиксi алза, Дарья хакас тiлiнең, биологиянаң, орыс тiлiнең аймах паза республика синiнде иртчеткен марығ-олимпиадаларда удаа араласча. Школада ол ӱгредiг министрi полча – олғаннарның чахсы ӱгренiзi ӱчӱн нандырча, ӱгредiгҷе директор орынҷызынаң хада удаа хада-пiрге тоғынча.
Паза Кызластағы школада спорт паза культура министрлерi пар. Пастағызы школада спорт ойыннарын иртiрерiнең айғасча, олғаннарны хазых чуртасха кӧнiктiрче, Асхыс аймаанда иртчеткен марығларда араластырча. Культура министрi, тiзең, школада иртчеткен прай мероприятиелернең устапча. Ведущайларны тимнепче, «артисттернең» тоғынча. Аннаң пасха волонтерлар тоғызын апарчатхан ӱгренҷi пар. Ол пасха ӱгренҷiлерге ол-пу волонтерлар сайттарында санға турарға полысча паза школаның халых чуртазында ӧткiн тоғынча.
Iди 11 класстағы чииттер школаның устағ-пастаана ӱгренҷiлернең тоғынарға хабасчалар, ортын паза кiчiг класстағыларға кӧзiдiм полчалар.
Сом Дарья Пакачакованың архивінең
| Пн | Вт | Ср | Чт | Пт | Сб | Вс |
| 28 | 29 | 30 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 31 | 1 |
Кӱн таңмазы
Хакасияда
Россияда
Тилекейде
