Спорт чидіглеріне Хакасия поғдархапча
25.10.2024
Хабарлар
Хакасия пазы Валентин Коновалов, спорт министрі Cергей Кочан, чиит спортсменнер паза тренерлер
Сыйыхтас. Хакасия правительствозында «Азия олғаннары» чоннар аразындағы ойыннарның призёрларын чеестееннер
Пістің хазнада чиит спортсменнерге кӧрілген илееде турнир иртче. Оларның аразында иң танығлығ – «Азия олғаннары» чоннар аразындағы арға-мӧрій. Марығ тархынын 1996 чылдаң апарча. Саарбахтар арға-мӧрійге, Олимп ойыннарына чіли, тӧрт чылда пір хати чыылысчалар. Пӱӱл турнир Якутскта 25 хандыхтаң 7 отха теере ирткен. Араласчылар 24 спорт кӧрімiнде устарын кӧзіткеннер. Хакасиядаң марығда 15 спортсмен кӱзін сынаан. Олар Сибирьдегі федеральнай округтың піріктірілген командазынзар таллағ иртiбіскеннер.
Чиит спортсменнер стол теннизі, волейбол паза 3*3 баскетбол марығларында медальлар ӱчӱн харбасханнар. Салтарлар ӧріндірче. Теннисист Виталина Сладкова ікілердең марығда Хакасияа хола медаль ағылған. Олох чидіге ӧменең читкеннер волейболист хызыҷахтар Варвара Бурцева, Арина Анненко, Александра Дудко, Надежда Речкова, Александра Терехина, Мария Дулгеру, Полина Карева, Анна Алешина паза Анастасия Морозова. Орындағы ооллардаң волейболҷа піріктірілген командада Хубачарның чуртағҷызы Никита Журавин на ойнаан. Сибирьнің волейболисттері «Азия олғаннары» ойыннарда кӱмӱс медаль холға киргеннер. Пу чидігде Никитаның хозымы пар. Баскетболисттерге – Антон Дроновха, Михаил Петровха, Иван Сергеевке, Артём Суржикке – cыйыхтығ орынға кӧмес ле читпиндір. Олар пизінҷізі полыбысханнар.
23 чарыста таланттығ палаларнаң Хакасия пазы Валентин Коновалов тоғасхан. Ідӧк мероприятиеде республика пазының пастағы орынҷызы Татьяна Курбатова, Хакасияҷа ӧӧн федеральнай инспектор Андрей Соковиков паза спорт министрі Cергей Кочан араласханнар. Тоғазығны асхан Валентин Коновалов. Валентин Олегович, саарбахтарны чидіглерінең алғыстап, теен:
– Улуғ марығларда сыйыхтығ орынға сығып, Хакасияны чоннар аразындағы синде турыстыра кӧзіткен ӱчӱн алғызым читірчем. Сірерге пістің республика ла нимес, прай хазна поғдархапча. Пу чидіглерге паба-іҷелернің, тренерлернің хозымы улуғ. Оларның киртінізі cірерге кӱс хосча. Спортта чиңістер тударға, чахсы ӱгренерге алғапчам.
Алғыстас cӧстерi сыйыхтаснаң узарадылған. Тренерлер Андрей Бочкарёвха (баскетбол), Ирина Золотухинаа (волейбол) паза Марина Павликоваа (стол теннизі) Хакасия пазының алғыстазы читірілген, олғаннарға – Россия президентінің Сибирьдегі полномочиеліг кізізінің алғыстас пічіктері паза улуғ нимес сыйыхтар. Алында «Азия олғаннары» чоннар аразындағы ойыннарның 11 призеры пір хати пирілчеткен тӧлег алған. Аның сині 10 муң cалковайдаң 20 муң cалковайға теере. Ахча Хакасия бюджедінең спорттаңар паза физическай культурадаңар республиканың законы хоостыра позыдылған. Cпортсменнерге пӧзік чидіглерi ӱчӱн тӧлегні 2024 чылдаң пиріп пастааннар.
Призерлардаң Виталина Сладкованы алынҷа таныхтирға кирек. 15 частығ саарбах «Азия олғаннары» ойыннарда медаль утхан Хакасияның пастағы теннисизі полча. Хызыҷах – спорт узына кандидат. Ол «Кимдегі Сибирь», «Сойанның оттары» тиксі Россия марығларында чиңістер тутхан. Пылтыр Виталина ӧӧрезі Екатерина Кременецкаянаң хада ікілердең марығда Сибирьдегі чемпионатта хола медаль утхан. Чоннар аразындағы ойыннарға таллағ пӱӱл Томскта Сибирь первенствозында ирттір. «Азия олғаннары» турнирге пастағы паза ікінҷі орынға сыххан теннисисттерні ысханнар. Спортсмен тренер Марина Павликованың холында узын таптапча. Виталина стол теннизінең онынҷы чылы айғас парир. Тренировкалар неделяда алты хати иртчелер. Тынағ кӱн – понедельник. Мында таңнаҷаң ниме чоғыл. Виталина Сладкова Алтай аймаандағы Кӧк хайа аалдаң. Ол аалдағы школада ӱгренче, 10 чыл изере Ағбанзар теннис ойнирға ӧнетін чӧрче. «Азия олғаннары» турнирде Виталина Сладкова Екатерина Койнованаң (Новосибирск облазы) хада ікілердең марығда ӱзінҷі орынға сыххан. Марина Павликова даа, Виталина Сладкова даа арға-мӧрійге пӧзік паалағ пиргеннер. Тренерлерге паза спортсменнерге чахсы оңдайлар тӧстелген, марығласхан улустың узы пӧзік полған.
Кӱмӱс медальны холға кирген волейболист Никита Журавин Хубачар аалдаң полтыр. Ағаа 16 час, ол 10-ҷы класста ӱгренче. Саарбахтың пастағы тренері – Илья Станиславович Куш. Никита волейболҷа Хакасияның піріктірілген командазына кірче. Ӧменең Дмитрий Александрович Азаров тоғынча. Спортсмен тренировкаларға неделяда пис хати чӧрчеттір, ікізі Ағбанда иртчеттір. «Азия олғаннары» марыға таллағны Никита Зеленогорскта ирткен арға-мӧрійде иртiбіскен. Ол спортха хынчатхан сӧбіредең. Аның пабазы, туғаннары пос туста волейбол ойнирға хынчаттырлар.
Сыйыхтас тузында Хакасияның спорт министрі Сергей Кочан ӧріністіг хабарнаң ӱлескен. Пу наада Хакасия паза Тува 2028 чылда «Азия олғаннары» хысхы чоннар аразындағы ойыннарны иртірердеңер сурыныс пічиин ызыбысханнар. Кирек киліссе, ікі республика улуғ спорт пайрамын удурлир.
Сом Дмитрий Сунчугашевти
Автор :
Майя Кильчичакова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
